07 июня 2018
Читаем по-коми
Раньше с новой коми литературой мы вас знакомили на странице "Читаем по-коми ("Лыддьысям комиöн"). Сейчас выпуски будут регулярно появляться здесь, в "Новостях". Вы сможете найти их по тегам "Лыддьысям комиöн" и "Читаем по-коми".
Читайте вместе с нами, читайте по-коми!
Лыддьысьöй миянкöд öтшöтш, лыддьысьöй комиöн!
2018-öд во. 38-öд петасъяс
| Напалков Виктор Егорович. Лэбöны вояс...: кывбуръяс, поэма. - Сыктывкар, 2017 (Услуги типографии). – 159 лист бок. Пер. загл.: Годы летят. |
Виктор Напалков – Россияса гижысь да журналист котыръясö пырысь. Кулöмдiн районса пыдди пуктана гражданин. Сыктывкарса почётнöй ветеран. Коми республикаса заслуженнöй уджалысь. Иван Куратов нима Коми Республикаса Правительстволöн премияа лауреат.
2017-öд воын Джеджим грездса библиотека Коми Республикаса Юралысь Грант вылö дасьтiс Виктор Напалковлöн творчество кузя литература экспозиция. Талун тайö библиотекаыс зiльö шедöдны «Виктор Напалков нима библиотека-музей» статус.
Виктор Напалковлöн петалiс дас квайт торъя небöг: «Козьнав мортлы муслун», «Чолöм и прöщай», «Томлун», «Туйвежъяс», «Ме тіянöс радейта», «О, Енмöй!...» да мукöд. Сылöн нёль роман: «Эзысь перна», «Утка туй», «Войся ангел», «Йöг каллян», а «Ульяна», витöд романысь медводдза главаяс, йöзöдлiс «Коми му» газет.
2017-öд воын петiс «Лэбöны вояс» сборник, кытчö пырисны бöръя кадö гижöм кывбуръяс да «Поп пи» нима поэма. Эм водзкыв «Гижысьыд сiйö, кодöс лыддьöны», кöнi Виктор Напалков висьталö ас йывсьыс.
Автор кутö лача, мый сылысь книгаяс лыддигöн йöзыс лоасны шаньджыкöн да сöстöмджык сьöлöмаöн. Шöр геройясыс: бать-мам да налöн челядь, сиктса олысьяс да вöвлöм фрöнтöвикъяс, коми аньяс, кодъяс томöн колины дöваясöн. Виктор Напалковлöн эмöсь кывбуръяс, кодъясöс сиöма война вылын усьöм батьыслы, пöчыслы, мамыслы. Сылöн кывбуръясын кылö чужанін дорö помтöм муслун. Кыпыд лола кывбуръяс сиöма томлунлы, муслунлы, Наташалы, Лидия Логиновалы да с.в.
| Обрезкова Нина Александровна. Сизим пыжа : висьтъяс = На семи лодках : рассказы / иллюстрации Марии Шишкиной и Софьи Милюковой. – Сыктывкар : Анбур, 2017. – 208 с. |
Нина Александровна Обрезкова чужис Удора районса Кослан сиктын. Помалiс Сыктывкарса канму университет. Уджалiс Коми наука шöринса кыв юкöнын, веськöдлiс республикаса фольклор театрын литература юкöнöн, велöдiс роч кыв да литература Сыктывкарса 38-öд номера школаын, вöлi Сыктывкарса канму университетын коми да финн-йöгра литература велöдысьöн, «Коми му» газетын да «Коми гор» радиоын – корреспондентöн, «Арт» журналын – литература редакторöн. Олö Сыктывкарын.
Нина Обрезкова – Россияса гижысь котырö пырысь. Коми Республикаса Правительстволöн премияа лауреат. Эстонияса рöдвуж войтыр программа премияа лауреат.
Гижö кывбуръяс да проза. Йöзöдчö «Войвыв кодзув» да «Арт» журналъясын. 2007-öд воын Виттор Савина нима академическöй драмаа театр пуктiс Нины Обрезковалысь «Асъя гӧсьтя» нима пьеса серти спектакль.
Нина Обрезковалöн петалiсны торъя небöгъяс: «Коркӧ ставыс лоӧ бур», «Ойдӧмин», «Дзирыд дой», «Вуджӧд менӧ, пыжанӧй», «Лэбачӧн вола», «Петук Васьӧ», «Нинпу», «Дивö козин».
Сылысь кывбуръяссö вуджöдöма эст, финн, венгр, удмурт, мордва, мари, а сiдзжö англия, француз, немеч, роч, болгара кывъяс вылö. Нина Обрезкова ачыс вуджöдö финн-йöгра да роч кывбуралысьяслысь гижöдъяссö коми кыв вылö.
Кольöм во Нина Обрезковалöн петiс «Сизим пыжа» небöг, кытчö пыртöма коми кыв вылын сизим висьт: «Сизим пыжа», «Сикт вежсьö бурланьö», «Степан», «Настасся-сан», «Мендельсон», «Доз пыдöсын муслун» да «Янтарнöй сикöтш». Нöшта тайö висьтъяссö сетöма роч кыв вылын.
| Ракин Анатолий Николаевич. Вöр-васа олысьяс : научно-познавательнöй очеркъяс. – Сыктывкар : Анбур, 2017. – 236, [3] лист бок : серпас. Пер. загл. : Обитатели природы : научно-познавательные очерки. |
Книгалöн автор – филология наукаса доктор Анатолий Ракин. Сiйö кутö лача, мый небöгыс сетас позянлун оз сöмын уськöдны тöд вылö войдöр аддзылöмсö да кывлöмсö, но и тöдмавны тшöтш уна выльтор. Тайö небöгас сетöма сёысь унджык висьт, кодъясöс тэчöма öта-мöд бöрсяыс шыпаскуд серти, медводдза шыпассяньыс бöръяöдзыс. Сиöма найöс вöр-васа олысьяслы, кодъясолöны му пытшкын и му вылын, пу вылын и турун пытшкын, гырысьяслы и посньыдъяслы. Висьтавсьö сiдзжö, кутшöм буртор найö вайöны йöзлы. Быд гижöд дорö сетöма уна рöма серпас. Очеркъяссö гижöма литературнöй коми кыв вылын да урчитöма кызвын лыддьысьысьлы.
Анатолий Ракинлöн «Вӧр-васа олысьяс» небöг лои вермысьöн республикаса «2017-öд вося медбур небöг» литература конкурсын «Коми кывъя медбур небöг» нима номинацияын.
Ми лоам зэв радöсь, кутанныд кö и водзö тöдмасьны миян «Лыддьысям комиöн» петасъясöн да пыравлыны Национальнöй библиотекаö! Виччысям!
