«Шондіалам» öта-мöдлы?!/ Приглашаем на тёплую встречу с поэтом Ниной Обрезковой!

Корам ставнытö март 10-öд лунö шонтысьыштны, гожъялыштны тувсовъя шонді водзын.

«Ме уджала шондіöн талун» - тадз шусьö Нина Обрезковалöн «Войвыв кодзув» журналын «Ме вежлася» гижöд чукöрын йöзöдöм öти кывбур. Тадз жö ми нимтім гижыськöд ассьыным паныдасьлöмнымöс. Чайтам, юбилей водзын Нина Александровнакöд аддзысьлöмыс збыль лоö миянлы тувсовъя шондіöн моз нимкодясьöм кодьöн, тувсовъя ыджыд гажöн. Виччысям гижыссянь восьса веськыд ёрта сёрни. Чайтам, юбиляр юксяс олöмсьыс öткымын гусяторйöн да висьталас водзö вылö гижöм серти ассьыс мöвпъяссö.

Нина Александровна, дерт, шонтас миянöс аслас шонді югöръясöн. Вайö и ми, лыддьысьны радейтысьяс, гижысьöс пыдди пуктысь-радейтысьяс, сылысь творчество тöдысьяс да сöмын на тöдмавны окотитысьяс, том и верстьö, тшöтш козьналам Нина Александровналы ассьыным мелі видзöдласнымöс, сёрнисö сюся кывзöмнымöс, вочакывъяс, чолöм да аттьö. Виччысям ставнытö Россия Федерацияса фин-йöгра культура шöрин (Ленина, 73) Нина Обрезковалöн юбилей паныд март 10-öд лунö 16 чассянь.