02 июня 2023

«Ме – парма пи. Ме – войвыв мулöн петас...»

Талунъя «Лыддьысям комиöн» петасын сёрниыс мунас нимйöза поэт, паськыда нималысь учёнöй, общественнöй водзмöстчысь Альберт Егорович Ванеев йылысь, а нöшта лыддьысьысьясöс тöдмöдам сылöн выль петасöн, шусьö «Кумач морöса жонь», петавлic Сыктывкарын 2023 воын.

Чужлiс Альберт Ванеев 1933 вося июль 18 лунö Удора районса Буткан сиктын. Помалic Косланса шöр школа да пырис велöдчыны Коми пединститутö, эштöдic гöрд дипломöн история да филология факультет.

Армиян служитöм бöрын недыр кад уджалic «Войвыв кодзув» журналын, Коми наука шöринын. 1963 воын дорйис кандидатскöй диссертация коми поэтъяслöн гижан сям йылысь.

Кывбур гижны Альберт Ванеевöс ышöдic Кослан сиктса школаысь коми кыв да литература велöдысь, «Удораса пионеръяс» литературно-творческöй кружок котыртысь Владилен Крюков, кодi и ачыс гижис кывбуръяс. «Комсомолец» медводдза кывбур йӧзӧдісны 1949 вося «Войвыв кодзув» журналлöн 5 номерын.

Ванеев, А. Комсомолец : кывбур / Альберт Ванеев // Войвыв кодзув. 1949. 5 №. 39-40 л.б.

Альберт Ванеевлöн петавліс 26 кывбур чукӧр. На пиысь: «Ме чужи Войвылын», «Бара кылалӧ йи», «Лун шӧр», «Вежӧдӧны кыдзьяс», «Ловъя би».

«Зонкаяс йылысь балладаысь», «Сосны под солнцем» да «Лун шӧр» кывбур чукӧръясысь Альберт Ванеевлы 1968 воын сетӧма Коми комсомоллысь премиа. «Талун асылыс сӧдз» кывбур чукӧрысь 1980 воын поэт лои И.А. Куратов нима Коми АССР-са канму премиа босьтысьӧн. 1965 восянь – СССР-са гижысь котырӧ пырысь.

Ванеев Альберт Егорович (1933-2001). Лун шöр : кывбуръяс / Альберт Ванеев ; ред. В. А. Попов ; серпасалiс С. А. Добряков. - Сыктывкар : Коми книжнöй издательство, 1968. - 119, [1] л. б. : серпас. - На коми яз.

Ванеев Альберт Егорович (1933-2001). Вежöдöны кыдзьяс : кывбуръяс, поэма / А. Е. Ванеев ; ред. В. А. Попов ; серпасалiс В. В. Поляков. - Сыктывкар : Коми книжнöй изд-во, 1972. - 94, [1] л. б. : серпас. - На коми яз.

Ванеев Альберт Егорович (1933-2001). Ме чужи войвылын : кывбуръяс / Альберт Ванеев ; ред. С. Морозов ; серпасалiс М. П. Безносов. - Сыктывкар : Коми книжнöй издательство, 1960. - 47, [1] л. б. - На коми яз.

Альберт Ванеев гижис 300 сайӧ туялан удж. Уна во видлаліс коми литературалы подув пуктысь Иван Куратовлысь олӧм да гижан удж. Пуктіс ыджыд пай Куратов йылысь Казахстанса да Узбекистанса архивъясысь материал корсьӧмӧ.

Бӧръя воясас шыӧдчис Георгий Лыткин, Каллистрат Жаков да Питирим Сорокинлӧн олӧм дорӧ. Найӧ вӧліны и туялысьясӧн, и йӧзӧс нималана югдӧдысьясӧн.

Альберт Ванеев гижис «Сӧвмысь поэзия» (1963), «Время и коми поэзия» (1974) да «Коми-зырянское просветительство» (2001) монографияяс.

Ванеев Альберт Егорович (1933-2001). Сöвмысь поэзия : коми поэтъяслöн мастерство йылысь пасйöдъяс / А. Е. Ванеев ; ред. С. Морозов ; серпасалiс С. Холопов. - Сыктывкар : Коми книжнöй издательство, 1963. - 110, [2] л. б. - На коми яз.

Ванеев Альберт Егорович (1933-2001). Время и коми поэзия / А. Е. Ванеев. - Сыктывкар : Коми книжное изд-во, 1974. - 134, [2] с.

Ванеев Альберт Егорович (1933-2001). Коми-зырянское просветительство : сущность и своеобразие / А. Е. Ванеев. - Сыктывкар : Эском, 2001. - 221, [2] с.

Кувсис Альберт Егорович 2001 вося декабр 12 лунö Сыктывкарын.

«Кумач морöса жонь» – татшöм нима выль книга чужис народнöй поэт Альберт Ванеевлöн гижöдъясысь. Дасьтöма петассö сылöн 90 во тыригкежлö. Поэтлöн пöсь сьöлöмыс быттьö выльысь воис миян дорö, гажöдö ставöс сöдза да ловъя кывйöн, ворсысь рифмаяснас, пыдiа подулалöм мöвпнас.

Небöгö пырисны тöдчана кывбуръяс, сонетъяс, поэмаяс да вуджöдöмъяс. А нöшта лыддьысьысь вермас тöдмасьны поэтлöн автобиографияöн да гижысь, журналист Валентин Гринерлöн статьяöн, кöнi сiйö казьтылö Ванеевöс кыдзи ёртöс да öти кодзув улын олöм томдырся кадсö.

Ванеев Альберт Егорович (1933-2001). Кумач морӧса жонь : бӧрйӧм гижӧдъяс / Альберт Ванеев ; [лöсьöдic: Е. Е. Афанасьева ; водзкыв: Алёна Ельцова]. - Сыктывкар : Коми Республикаса гижысь котыр, 2023. - 302, [1] лист бок : портр. - (Звезды севера : ЗС). - 978-5-6046415-4-5. - На коми языке.

«Мед олöмсьыс аддзимöй кодзув», – шыасьлiс миян дiнö Альберт Ванеев аслас öти кывбурын. Татшöм сяма кодзувнас сiйö ачыс и вöлi. Öд сiйö збыльысь вöлi коми кывлöн зарни мастерöн да öнi нэмъяс кежлö коляс, коми йöзлöн зарни пиöн. Та йылысь висьталöны сылöн гижны удитöм небöгъясыс, кодъясöс гижöма поэзия, критика, наука жанръясын, роч кыв вылö вуджöдöмъясыс, йöзöдöм балладаясыс, сонетъясыс.

Альберт Ванеевлöн небöгъясöн позьö тöдмасьны Коми Республикаса Национальнöй библиотекаын. Лыддьысьöй коми кыв вылын!