05 октября 2022
Кор алöй биöн öйдас лежнöг
Дона лыддьысьысьяс!
Талун ми бара тiянкöд. И вöзъям лыддьыны Надежда Павловалысь "Кор алöй биöн ойдас лежнöг" нима кывбура небöг.
Надежда Павлова чужлiс Емдiн районса Семуков сиктын. Велöдчис Перымса культура институтын. Медводдза произведение йöзöдлiс "Войвыв кодзув" журналын школаын велöдчигöн на. Гижны босьтчис коми кыв вылын институт помалöм борын.
Гижысьлöн тайö небöгас поэзиялöн аслыспöлöс сюрöс, и тэчасногыс аслыспöлöс - эм заводитчöм небöгыслöн, и эм мичаа сигöртöм. Век быттьö водзö и водзö нуöдö кывбуралысьыс, век мыйкö выльöс аддзан. Со татшöм мича кывбурöн сiйö восьтö ассьыс сьöлöм кылöмсö:
Кывбурöй менам, мед матысса ёртöй,
Сьöлöм, лов шонтысьöй йöзын и гортын.
Ворслi ме тэöн, кор шогси, кор вошли,
Серавлi, бöрдлi и еджыд туй корсьлi.
Тэнад нор сьыланöн тöлысьöн пукси,
Тэнад бур кылöн ме шондiöн югзи.
Восьса лов, кад нин, лок йöз дорас петам,
Пуксьылам туй водзын, сэсся и мöдам...
Ставыс, мый вöрзьöдлöма гижысьлысь ловсö, сöдз лысва мольясöн югзьöма кывбур визьясас.
Лыддьöй мича кывбуръяссö гижысьлысь.
Виччысям тiянöс библиотекаын.
 |
Павлова Н. М. Кор алöй биöн ойдас лежнöг
|
