14 апреля 2021
Ворсан куд
Дона лыддьысьысьяс!
Талунъя петас сиам коми детсадъясын уджалысьяслы и вöзъям тöдмасьны «Ворсан куд» небöгöн.
Ичöт челядьлöн олöмыс мунö ворсiгтырйи. Ворсiгöн найö тöдмасьöны ас гöгöрса олöмöн, велöдчöны ёртасьны öта-мöдыскöд, а сiдзжö сöвмöдöны вежöрсö да сёрнитанногсö. Овлывлö сiдз, мый челядь тшöкыда оз кöсйыны пырöдчыны öтувъя уджö, оз вочавидзны воспитатель юалöмъяс вылö, олöны чöв-лöня. Но воспитатель кö корö ворсыштны – окотапырысь шыöдчöны сы дорö: «Вай ворсыштам!»
«Ворсан куд» небöгсö дасьтöма коми детсадъясын уджалысь воспитательяслы отсöг вылö. Небöгас чукöртöма уна пöлöс ворсöм «Дзолюк» уджтас серти. Уджтасыс артмöма сизим юкöнысь, кытчö пырисны быдсяма пöлöс ворсöмъяс. Ворсöмъяссö юклöма челядь арлыд серти (кык арöссянь сизим арöсöдз), а сiдзжö сёрни сöвмöдан могъяс серти: шыяс стöча шуалöм, кыв запас озырмöдöм, сёрнилысь грамматическöй тэчасног сöвмöдöм, йитöда сёрни сöвмöдöм.
Кутам лача, мый тайö небöгыс отсалас кагульничаяслы котыртны челядькöд быдлунъя уджсö. Небöгыс сетас отсöг и бать-мамлы ас котырын шойччигöн.
Тöдмасьöй небöгнас!
Ворсан куд : ворсöм чукöр / «Велöдчöм сöвмöдан Коми республиканскöй институт», Школаöдз велöдöмын национальнöй проблемаяс туялан лаборатория ; лöсьöдiсны: З. В. Остапова [и др.]. - Сыктывкар : КРИРОиПК : Кола, 2012. - 96 л. б.
Инвентарнöй номеръяс: 11394к-кр, 11395к-дх, 11396к-дх, 11397к-дх, 11398к-а.
