23 декабря 2020

Югыд томлун

Ыджыд милӧсьт Енмыс тэныд сетлӧма

Томысянь нин кыпыд гижан ру.

Жаль, мый ӧнӧдз небӧгыд эз петавлы

Кӧнi сьывлiн Парма, Эжва ю.

Дона лыддьысьысьяс, тайӧ Анатолий Степанович Изъюров йылысь кывъяс.

Том гижысь чужлiс Сыктывдін районса Час сиктын.

«Югыд томлун» — татшӧм нима небӧг талун вӧзъям лыддьӧм вылӧ. Гижысьлӧн тайӧ медводдза да медбӧръя кывбуръяса небӧг. Медбӧръя сы вӧсна, мый олiс му вылас сӧмын комын нёль во. Кувсис сiйӧ трагическӧя лёк мортлӧн ки помысь. Мыйта бур кӧсйӧм да мӧвп вӧлi сылӧн, но эз удит найӧс пӧртны олӧмӧ.

Сiйӧ кывбуръясыс, кодъяс пырисны тайӧ ичӧтик небӧгас, висьталӧны, кутшӧм ыджыд таланта вӧлi тайӧ поэтыс. А кутшӧма сiйӧ радейтлiс ассьыс чужан мусӧ, мича вӧр-васӧ, бур йӧзсӧ! Татшӧм пӧсь да мича кывъяса кывбурсӧ вермӧ гижны сӧмын олӧмсӧ радейтысь поэт:

Лӧз енэж сигӧртӧма мусӧ,

Ой, войвыв парма, чужан му!

Кыдз тэныд сьӧлӧмсянь ог шу,

Мый мен тэ олӧмӧй кодь муса?

И муслунӧй мӧй коркӧ кусӧ,

Кор пӧся тiпкӧ морӧс дiн!

Оз, сiйӧ некодыр оз чин, -

Ог весьшӧрӧ ме пиӧн шусьы!