12 июня 2019
Ме велӧдча радейтны выльысь
Дона лыддьысьысьяс!
Талун тӧдмӧдам нӧшта ӧти том гижысьлӧн небӧгӧн. Тайӧ Ольга Баженовалӧн «Ме велӧдча радейтны выльысь» небӧг.
Гижысь чужӧма 1992-ӧд воын Емдiн районса Кӧжмудор сиктын. Сизимӧд классӧдз велӧдчӧма Туискерӧсса школаын. Сэсся помалӧма Коми Республикаса Юралысь бердын искусствояс гимназия, Сыктывкарса канму университет, гуманитарнӧй наукаяслӧн институтса коми юкӧнын. Йӧзӧдлӧма кывбуръяссӧ «Войвыв кодзув», «Арт» журналъясын, «Медводдза муслун» сборникын.
Быдӧн ми мыйӧкӧ велӧдчам: лыддьыны, гижны, эскыны... И радейтнытӧ колӧ... велӧдчыны. Аслас небӧгын том гижысь юксьӧ лыддьысьыськӧд сыӧн, мый воссис сылы тайӧ помасьлытӧм туй кузяыс мунігӧн...
Тайӧ абу серпаса кывбуръяс. Быд строка, быд кыв - тайӧ том нывлӧн философия. А философия - тайӧ асьтӧ корсьӧм, гӧгӧрвоӧм. Поэтӧс гӧгӧрвоиг, лыддьысьысь и асьсӧ сэтысь гӧгӧрвоӧ. Тайӧ кывбуръяссӧ колӧ лыддьыны оз син чашкӧдӧмӧн. Колӧ чашкӧдны ловтӧ да кывзыны, мый сэнi пондас керсьыны, кор лолыд шоналас кывбурысь.
Кыдзи тӧдчӧдис гижысь Анжелика Елфимова: «быд кывбур гижысьлӧн – аслас Вӧльнӧй свет, кӧнi сiйӧ олӧ-лолалӧ, кодӧн сiйӧ гӧгӧрвоӧ тыдалансӧ да тыдавтӧмсӧ. Позьӧ любуйтчыны кывбуръясас тыдалана веркӧснас. Позьӧ шензьыны сэтчӧс югъялана мичнас. Но мед гӧгӧрвоны найӧс тырвыйӧ - колӧ суныштны наӧ. Суныштны вежӧрнад, вир-яйнад, лов-сьӧлӧмнад. Сӧмын сэки, суныштӧмӧн и воссясны кывбуръясыс. Воссясны шоныднас, джуджыднас, кокньыднас да лӧсьыднас»…
Ёртъяс, лыддьӧй небӧгсӧ да донъялӧй!
Баженова Ольга Николаевна. Ме велöдча радейтны выльысь : кывбуръяс / О. Баженова. - Сыктывкар : [б. и.], 2016. - 63 лист бок.
Инвентарнöй номеръяс: 12395к – кр, 12396к – дх, 12397к – дх, 12398к – дх, 12399к – а, 12487к - дх
Виччысям тiянӧс библиотекаын!
