06 марта 2019
Повтӧм зон
Дона лыддьысьысьяс!
Талун лыддьӧм вылӧ вӧзъям Михаил Лебедевлысь "Повтӧм зон" небӧг, кодӧс арталӧма гижысьлӧн медрадейтана лыддьысьысьлы – челядьлы. Сылысь медводдза да медыджыд юкӧнсӧ артмӧдӧны мойд нога гижӧдъяс да преданиеяс. Кывбура мойдкывъяссӧ сиӧма гырысьлы и поснилы. Гижысь индылiс, мый мойдкывйыд кыпӧдӧ мортлысь ловсӧ, садьмӧдӧ-джудждӧдӧ сылысь кылӧмъяссӧ, отсалӧ тӧдмавны ассьыным вужъяс. Сылӧн мойдъясыс абу ӧткодьӧсь: ӧтиясын тыдовтчӧ шмонь да серам, мӧдъяс вӧрзьӧдӧны шог лоӧмторъяс, и кыкнан пӧлӧсын сёрниыс мунӧ кольӧм кад йылысь. Но мойдыд мойд и эм, серпасалӧ быттьӧ важсӧ да вӧвлытӧмсӧ, а восьтӧ збыльсӧ. Босьтам «Кор небесаыс воссьывлӧ…» мойд. Танi гижысьыс петкӧдлӧ войдӧр олысьлысь гуся кӧсйӧмсӧ – лышкыда овны уджавтӧг, а инмӧ ӧнiя йӧзӧ. Кокни олӧм корсьысьыд и талун тырмӧ.
Тайӧ жӧ юкӧнын гижысь петкӧдлӧ, мый коми йӧзлӧн эм аслыспӧлӧс история – тайӧ преданиеяс, коркӧ овлӧм йӧз йылысь висьтасьӧмъяс, кытысь тыдовтчӧ комияслӧн оласногыс… Ас муын рама олӧм, вӧр-ва видзӧм да олӧм путкыльтысьяслы водзсасьӧм – татшӧмӧн аддзӧ М. Лебедев коми йӧзлысь историясӧ важ преданиеясысь да найӧ подув вылын лӧсьӧдӧ зэв интереснӧй, бура лыддяна гижӧдъяс «Повтӧм зон», «Кӧрт Айка», «Яг морт», «Юрка».
«Серпасторъяс да кывбуръяс» юкӧнын ыджыдалӧны долыд шыяс, коми олӧм ошкӧм. Шӧр геройыс танi – ставнас Коми му, миян войвыв вӧръяс, юяс-ваяс да ывла сывйын олысь коми морт. Вӧзйӧм серпасъясын эм и ачыс, ас муӧд нимкодя восьласьысь поэт.
Небӧглӧн коймӧд юкӧн – басняяс. Лӧсялысь персонажъясыс басня гижысьлы сюрисны ловъя олӧмысь: мӧмӧт Петыр Вань, нянь мусӧ кодлысь «видзӧ» чань; Гриша дядь, кодi больгӧмӧн кӧсйӧ сувтӧдны вирӧн-яйӧн пӧткӧдчысь Кӧинӧс; ас мичӧн ышнясьысь Самӧвар да мукӧд. Басняясыс йитчӧмаӧсь гижан кадыскӧд, но важмӧмӧн найӧс некыдзи он шу.
Лыддьӧй гижӧдъяссӧ да тӧдмалӧй выльсӧ олӧмысь!
Лебедев М. Н. Повтöм зон : мойдъяс, преданиеяс, серпасторъяс, кывбуръяс, басняяс / Михаил Лебедев; [лöсьöдiс и водзкыв: Валентина Лимерова; серпасалiс Анна Гордеева]. - Сыктывкар : Анбур, 2017. - 158, [2] лист бок. Инвентарнӧй номеръяс: 12446к – кр, 12447к – дх, 12448к – дх, 12449к – дх, 12450к - кибо.
Небӧгсӧ сiдзжӧ верманныд лыддьыны НЭБ-ысь
