20 февраля 2019
Чибльӧг
Дона лыддьысьысьяс!
Талунъя петас сиам поэзия радейтысьяслы и вӧзъям лыддьӧм вылӧ Василий Лодыгинлысь кывбура небӧг.
"Чибльӧг" - тадзи шусьӧ аслыспӧлӧс небӧгыс, кытчӧ пырисны вӧр-ва йылысь кывбуръяс да серпасъяс. Наысь тыдалӧ гижысьлӧн аслас чужан му дінӧ пыдӧстӧм да помтӧм муслун.
Небӧгыс - абу серпасалӧм, а ыджыд да пӧсь сьӧлӧмӧн висьтасьӧм, кыдзи тай пӧся аттьӧалӧмӧн висьтасьлан му вылын меддона мортлы - муса мамлы. Кыдзи шуліс ӧти кывбурын асланым жӧ ыджыд поэт Тима Вень, тайӧ кӧрышас «абу прӧстӧ сідз найӧс лӧдӧма, сэтчӧ пуктӧма мый меддонаыс». Гижысь шуӧ, «вӧр-ва – мортлӧн медбур ёрт. Вермас лоны сiдз, мый коркӧ да медматыс мортыд кисӧ оз мыччы, а вӧр-ваыд дзик век отсалалас, дзик век шогтӧ юкас. Бипур дорын пукыштан, сьӧлӧм дорад пӧсь чайсӧ юыштан, и то лов вылад лоӧ кокниджык. А лун-мӧд кӧ кӧть нин чомйын олан да кытсюрӧ кытшлалыштан, дзикӧдз бурдан…»
«…Вӧр-ва кыпӧдӧ борд вылӧ оз сӧмын пӧткаӧс, но и мортӧс. Буретш да сылӧн сямысь да этшысь, гажысь да мичысь петӧны поэтъяс да композиторъяс, серпасасьысьяс да киподтуя вӧчасьысьяс. Быдӧн шуас, мый сiйӧ - чужан мулӧн быдтас…»
Мӧвпъяс асьныс воӧны,
Кытыськӧ тай лоӧны.
Тшыг кӧть, пӧт кӧть, чужӧны,
Юрӧ пырны кужӧны.
Лолаӧсь и ловтӧмӧсь,
Полысьӧсь и повтӧмӧсь,
Дудӧмӧсь и педзысьӧсь,
Лэптысьӧсь и лэдзысьӧсь…
(«Мӧвпъяс»)
Небӧгсӧ сиӧма став арлыдалы. Сійӧс окотапырысь лыддясны и верстьӧ морт, и ыджыд олӧмӧ пырысь. Торйӧн нин лӧсялас сійӧ школаын велӧдчысьяслы, кодъяс мед эськӧ гӧгӧрвоисны, мый вӧр-ва - абу сӧмын тшак да вотӧс, звер да пӧтка, чери да ва, но и медся ыджыдасӧ олӧмлӧн подув, татчӧс войтырлӧн оласног, миян ставыс.
Ёртъяс, юӧй поэтлӧн чибльӧгысь сӧстӧм ёль кодь поэзиясӧ, горшныд веськалас, сьӧлӧмныд бурмас.
Лодыгин Василий Григорьевич. Чибльöг : кывбуръяс, серпасъяс / Василий Лодыгин ; ред. В. И. Трошев ; фот. В. Г. Лодыгин [и др.]. - Сыктывкар : Анбур, 2012. - 191, [1] л. б.
Инвентарнӧй номеръяс: 11503к – кр, 11504к – дх, 11505к – дх, 11711к – дх, 11506к – а, 11507к - а
