13 февраля 2019
Чужанiнлысь ловсö кыла
Дона лыддьысьысьяс!
Талунъя петас сиам челядьлы лыддьöм вылö и вöзъям тöдмасьны выль гижöд чукöрöн.
«Чужанiнлысь ловсö кыла» - тадзи шусьö кассетнöй сборник, кытчö пырис Кулöмдiн районса гижысьяслöн куим небöг. Тöдмöдам найöс торйöн.
Медводдза небöг - Вячеслав Бабинлöн «Коми попугайяс».
Гижысь чужис Кулöмдiн районын. Уджалiс журналистöн «Ленин туйöд» ("Парма гор") газет редакцияын. Лэдзис нёль небöг. Тайö гижысьлöн челядьлы сиöм коймöд кывбура небöг. Небöгас пырисны неыджыд кывбуръяс, кодъяс лыддьысьöны челядьлы зэв кокниа.
Мöд небöг - Иван Ногиевлöн (Парма Вань) «Евлог да сылöн ёртъяс». Гижысь уджалiс Кулöмдiнса школаын физика велöдысьöн, РОВД-ын сюртчис гижан уджö. Талун кежлö сылöн петiс куим небöг. Выль небöгö пырисны неыджыд серамбана висьтъяс-вöвлöмторъяс.
Нöшта коймöд небöг - Эдуард Тимушевлöн «Шондi дзирд». Заводитлöма гижны школаын велöдчигöн на, кывбуръясыс да висьтъясыс петавлiсны районса да республикаса газет-журналъясын, öтувъя сборникъясын. Йöзöдлiс нёль небöг. «Шондi дзирд» - челядьлы сиöм медводдза кывбура небöг, кöнi гижö чужанiн, вöр-ва да сэнi олысьяс йылысь.
Гижöдъясыс небöгъясас нуöдсьöны мича, яръюгыд, кöнсюрö весиг серамбана серпасъясöн, кодъясöс серпасалiсны кулöмдiнса челядь, сы вöсна небöгъяссö торъя нин кöсйыссьö кутыштлыны киын да, дерт жö, лыддьыны.
Ёртъяс, виччысям тiянöс библиотекаын!
Чужанiнлысь ловсö кыла. - Сыктывкар, 2018. (кассетный сборник)
Инвентарнöй номеръяс: 12589к - дх, 12592к -дх, 12595к - а;
12591к - дх, 12594к - дх, 12597к - а;
12590к - дх, 12593к - дх, 12596к - а.
