12 мая 2023
Юрсигуся небöг
Тöрыт Сыктывкарса коми культура шöринын нимöдісны выль небöг. Елена Козловалысь «Рытъя кыаöй менам...» небöг лöсьöдіс Елена Афанасьева.
Татшöм нима повесьт йылысь Елена Евгеньевна коркö шулöма Елена Васильевналы: «Тіян геройясыд пасьтöмöсь». Мöдыс сöмын чöла нюмъёвтöма. Збыльысь, лыддян небöгсö да кылан Иллялысь да Ольгалысь став сьöлöм пессьöмсö.
Небöг лöсьöдысь висьтасис Елена Козловалысь гижöдъяс чукöртöм йылысь, лыддис öткымын гижöд юкöн.
Йирмöг босьтö, кор лыддян «Озъякерöсанöй» повесьтысь «пöчöлысь» кызь нёль арöс пасйöм йылысь. Том нывбаба, кодöс нывъяс нимтісны ас костаныс бабуляöн, пöрысьмöма война кадö шогысь да пöгребын олöмысь.
«Лыатыса вичко йылысь» висьт медводзысь йöзöдöма тайö небöгын. Сійöс Елена Васильевна гижлöма öтувъя коми диктант кежлö, пасйис Елена Евгеньевна.
 Фото из альбома Центра коми культуры на странице ВКонтакте |
Мича югыд небöг серпасалöма Юрий Лисовский. Ас водзас сійö пуктöма сэтшöм мог, мед небöгсö мичмöдігас йитны письмö, мортöс да сылысь пытшкöсса олöмсö. Кöсйöма петкöдлыны и От гöра, кöні чужліс Елена Козлова. Небöг кышö Юрий Лисовский серпасалöма юрсигусьöс: «Тайö гагыс овлö кыклаын: улыс мирын (ваын) и вылыс мирын (кор бордъясьö). Морт аслас олöмын тшöтш вуджö тайö тшупöдъяссö. Сідз жö быдмö, верстяммö, содтö тöдöмлунъяс, сöвмöдö мöвпалан сям».
Елена Васильевналысь гижысь котырын тöдчанлунсö Надежда Мирошниченко пасйис татшöм кывъясöн: «Она всех нас объединила, примирила, вытерпела. Её любви хватало на всех. Для нас она ушла рано. Но для себя вовремя. По закону театра - лучше уйти со сцены на пять минут раньше, чем на пять минут позже».
Елена Козловалысь воддза небöгъяссö да журналъясын йöзöдлöм верстьöлы гижöдъяссö аслас фондъясысь петкöдліс Коми Республикаса национальнöй библиотека.
