20 февраля 2023

«Лыддьысям комиöн» / Обзор краеведческих новинок «Читаем на коми языке»

Пыдди пуктана лыддьысьысьяс! Талунъя «Лыддьысям комиöн» лист бокын тöдмасям Семён Терентьевлöн «Тöвся войö» выль петасöн да Александр Некрасовлöн кывбуръясöн, йöзöдöма «Войвыв кодзув» журналын 2022 вося 11-öд номерын.

Терентьев, С. К. Тöвся войö: висьтъяс, кывбуръяс, повесьт / Сергей Терентьев. – Сыктывкар: Коми республиканская типография, 2022. – 191 лист бок.

Семён Терентьев чужис 1945 вося моз тӧлысь 16-ӧд лунӧ Большеземельскӧй тундраын Кӧсьтаты бокын. Челядьдыр кольӧма кӧр дорын да Инта районса Ярпиягын. Служитіс Ылі Асыввылын, Хабаровскын. Лесотехническӧй техникум помалӧм бӧрын уджаліс мастерӧн да механикӧн Сыктывкарса механическӧй заводын.

Гижны босьтчӧма 1988 воын. Висьтъяссö йöзöдлiсны «Войвыв кодзув», «Арт» да «Чушканзi» журналъясын, авторъяслöн öтувъя «Сикöтш» да «Ижемский характер» öктöдъясын.

Семён Терентьев велӧдӧма XIV нэмся степан анбур, кӧні эм сӧмын 24 шыпас; содтӧма сэтчӧ судзсьытӧм шыпасъяс (35-ӧдз) да вуджӧдӧма тайӧ анбур вылас коми гижысьяслысь кызь сайӧ ки помысь лӧсьӧдӧм небӧг. На лыдын, удораса гижысь Евгений Афанасьевлӧн «Епшо да Настук» повесьт, «Исус Христослӧн олӧм» и мукöд.

2010 воын петiс Семён Терентьевлöн «Заранъяс» коймöд асшöр небöг. Таöдз сылöн петавлiсны «Древняя Ярпияк – прошлое и будущее» роча-комиа книга и торъя ичöтик небöгöн «Лемванырд» поэма. «Зарань» небöгын висьтъяссö да поэмасö гижöма Ува ювывса Ярпияк грездын чужлöм кöр видзысьяс да кыйсьысь-вöралысьяслöн асланыс олöмысь казьтылöмъяс серти. Олöмысь босьтöм серпасъяс пыр автор петкöдлö ас чужан войтырлысь пытшкöсса озырлунсö, сьöлöм мичсö да дойсö, налысь мывкыдсö да оласногсö.

Семён Терентьев – нэбöг-лöсьöдысь. 2013 воын сылöн борд улын петiсны «Сьöлöм гаже – ызьва кыы», «Чупров Яков Иванович (Биа öгыр)» небöгъяс. 2014 воын отсалiс йöзöдны В. П. Кузнецовалысь «Ме тöда – сiес и висьтала» петас. Ижма сиктлы 450 арöс тыриг кежлö дасьтiс «Крестьянское родословие сведения о ижемских крестьянах рода Терентьевых с 1799 по 1919 год». А самоед-ненечъяслöн важся олöм йылысь позьö тöдмавны гижысьлöн 2019 вося «Рождённые под небом Нума» небöгысь.

2020 воын Семён Тереньев лöсьöдic» Сыктывкарский механический завод» да «Экскурс по запавшим в душу мгновеньям» небöгъяс.

Национальнöй библиотека кудйö воис Семён Терентьевлöн выль небöг. Шусьö «Тöвся войö». Йöзöдicны 2022 воын Сыктывкарын, Коми республикаса типографияын. Выль петасö пырисны висьтъяс, кывбуръяс, «Вомидз» повесьт коми, роч да изьва сёрнисикас вылын. Гижысьлöн выль петасöн да сылöн мукöд небöгъясöн позьö тöдмасьны Коми Национальнöй библиотекаын.

Некрасов, А. И ме ог юась, мый мен вöчны…: кывбуръяс / Александр Некрасов // Войвыв кодзув. 2022. 11 №. 72-[75] лист бокъяс.

Александр Васильевич Некрасов чужлic 1952 вося вӧльгым тӧлысь 4 лунӧ Сыктывдін районса Паль сиктын. Быдмис Позялӧм посёлокын.

1968 воын помалiс Сыктывкарса 12-öд номера школаын кöкъямыс класс. Сэсся пырис велöдчыны электромонтажникö 15-ӧд №-а техническöй училишеö. Велöдчöм помалӧм бӧрын уджалic Сыктывкарса опытнӧй судоремонтнӧй заводын. 1972 воын уджысь орöдчывтöг помалic уджалысь том йöзлысь рытъя школа да мунiс велöдчыны Сыктывкарса университетлӧн филология факультетӧ. 1975 воын сійӧс мӧдӧдӧмаӧсь велӧдчыны Ленинградса университетлӧн журналистика факультетӧ.

Александр Васильевич – «журналист» специальностьöн бöр воис Сыктывкарö. Корреспонденталic «Югыд туй» газетса культура юкӧнын, редакторалic Коми небӧг лэдзанінын, веськӧдлiс челядьлы да томуловлы небӧг йӧзӧдӧм серти «Пас» тӧварышъяслӧн котырӧн.

Медводдза кывбурсӧ йӧзӧдӧма 1969 воын рочӧн «Вперёд» газетын. Медводдза коми кывбур – «Видза олан, Сыктывкар!» – петавлic «Войвыв кодзув» журналын 1972 вося 8-öд номерын.

Ставнас йӧзӧдӧма 12 кывбура да прозаа небӧг. Сылӧн петавлісны «Гӧрд тугъяса пелысь» кывбура чукӧр (1983), «Шондібан» (1987), «Себе я – царь и господин» (1991), «Ловъя кодзулӧй менам» (1995) небӧгъяс да «Как стать великим» автобиографическӧй роман (1993).

Комиӧдӧма Сергей Есенинлысь кывбуръяссӧ да 2005 воын йӧзӧдӧма «Лымъялысь льӧм» небӧг. 2010 воын йӧзӧдӧма «Лӧз ӧзын» чукӧр, кытчӧ пыртчӧма XX-ӧд нэмся медбур коми да роч сьыланкывъяс. Тайӧ небӧгыс 2011 воын шедӧдӧма Сергей Михалков нима «Облака» литератураса премия. 1983 воын пырӧма СССР-са гижысь котырӧ. 2007 воын петӧма да котыртӧма Коми муын «Коми колипъяс» асшӧр гижысь котыр.

Александр Некрасов – Коми Республикаса нималана уджалысь, Сыктывдін районса Почёта гражданин, пасйöма С. А. Есенин нима «Золотая осень» литературно-общественнöй премияöн да С. А. Есенин нима «Орден «Золотая осень» пасöн.

Бöръя кадсö олiс Сыктывдiн чужан районас. Кулic 2016 вося тӧвшӧр тӧлысь 16 лунӧ. Дзебöма Придаш сиктса шойнаын.

«Войвыв кодзув» журналлöн 2022 вося 11-öд петас тöдмöдö Алексей Некрасовлöн «Оз юась шондi», «Пожöма дi», «Мам», «Пув», «Радейтана пöра», «Гожся лун», «Сад», «Кыдзи тшöктö сьöлöм» кывбуръясöн. Кывбура гижöдъясын автор серпасалö вöр-ва, восьтö сьöлöмкылöмъяс чужан му да сэнi олысь йöз дiнö, ышöдö быдмысь войтырöс видзны вöр-ва да отсасьны бать-мамлы.

Дона лыддьысьысьяс, зэв нимкодь, мый тi тöдмасянныд выль петасъясöн чужан кыв вылын. Коми Национальнöй библиотекаö воöны быд сикаса небöгъяс, газет-журналъяс, кöнi юргö сöстöм, мича коми кыв. Радейтöй чужан кыв, лыддьысьöй коми кыв вылын. Виччысям тiянöс Национальнöй библиотекаын!