Öтувъя коми диктант бöр локтic Национальнöй библиотекаö
Урасьӧм тӧлысь 21 лунӧ став мир пасьтала пасйӧны Чужан кыв лун. Тайö гаж вылӧ быдӧнӧс корам Национальнöй библиотекаö.
Медшöр гöсьтъясӧн лоӧны кывчукöръяс. Найö сетасны стöч вочакыв юалӧмъяс вылӧ. А лыддьысянiнлöн ыджыд залын öкмысöдысь лоö нуöдöма коми диктант. Ӧнія 2023-ӧд вося акция кежлӧ текстсӧ дасьтіс коми поэт Нина Обрезкова. Текстсӧ сиӧма тӧдчана коми поэт, литературовед Альберт Ванеевлӧн олӧм да творчестволы, сылӧн чужӧмсянь 90 во тырӧмлы.
Быд карын да районын лоӧ котыртӧма акция нуӧданiн, кӧнi позяс гижны диктантсӧ. Сiджӧ эм позянлун гижны видеодиктант да аудиодиктант. Коді оз вермы волыны акция нуӧданiнӧ, вермасны гижны диктантсӧ асшӧра. Видео- да аудиофайлъясыс воссясны урасьӧм тӧлысь 21 лунӧ 12 чассянь «Коми войтыр» ӧтмунӧмлӧн (https://komіvoіtyr.ru/), Коми Республикаса национальнӧй библиотекалӧн (http://www.nbrkomі.ru/), Коми Республикаса войтырлӧн ёртасян керкалӧн (https://ddnrk.rkomі.ru/), Россия Федерацияса финн-угор культура шӧринлӧн (http://www.fіnnougorіa.ru/) сайтъясын.
Видеодиктантсӧ асшӧра гижысьяслы колӧ сканируйтны либӧ фотографируйтны гижӧм текстныссӧ да ыстыны Оргкомитетӧ прӧверитӧм вылӧ рака тӧлысь 1 лунӧдз komі.dіktant@maіl.ru пошта вылӧ.
Коми диктант котыртысьяслы сетасны Аттьӧалана гижӧдъяс, удж донъялысьяслы да диктант гижысьяслы – электроннӧй сертификатъяс. Кывкӧртӧдъяс йылысь юӧртасны газет-журналын да мукӧд электроннӧй СМИ пыр.
Акциясӧ котыртӧны «Коми войтыр» ӧтмунӧм, «МИ» коми том йӧзлӧн ӧтув, Коми Республикаса национальнӧй библиотека, Коми Республикаса войтырлӧн ёртасян керка, Россия Федерацияса финн-угор культура шӧрин.
Ставнытӧ корам пырӧдчыны коми кывлы сиӧм акцияӧ!
