«Пöрысь и том тэнö лыддьö, и лыддьöмсьыс шоналö лов»

Февраль 14-öд лунö 15 чассянь Коми Республикаса национальнöй библиотекаын кутам казьтывны Елена Васильевна Козловаöс. 25 воысь унджык сійö веськöдліс коми гижысь котырöн, ачыс гижліс и кывбуръяс, и пьесаяс, и верстьöлы висьт-повесьтъяс, но медъёна – челядьлы гижöдъяс.

«Тэ быдöнöс ышöдны верман и быдöнлы вичмöдан нюм». Владимир Тиминлöн кывбурысь тайö кывъяснас нимтім Елена Васильевналы сиöм рытнымöс, öд быд статьяын, быд казьтывлöмын гижысьяс, лыддьысьысьяс, рöдвуж-ёртыс пасйöны Елена Васильевналысь мелі кыв-видзöдлассö, гажа серамсö да шань этшсö.

Дона лыддьысьысьяс, корам ставнытö öттшöтш казьтывны Елена Козловаöс. Волöй, сёрнитыштам гижысьлöн олан туй да гижöдъяс йылысь. Рыт кежлö ми дасьтам видеояс да небöга выставка. Лоöны сэн Елена Васильевнаöн гижöм, лöсьöдöм да вуджöдöм небöгъяс.