17 ноября 2022
«Лыддьысям комиöн» / Обзор краеведческих новинок «Читаем на коми языке»
Пыдди пуктана лыддьысьысьяс! Вöзъям тöдмасьны Михаил Лебедевлöн творчествоöн. Коми гижысьлöн кывбуръяс да басняяс йöзöдöма «Войвыв кодзув» журналын 2022 вося 10-öд номерын.
Лебедев Михаил Николаевич чужлiс 1877 вося октябр 22 лунö Сыктыв районса Межадор сиктын. Велöдчис Усть-Сысольскса уезднöй училищеын, уджалiс Кöрткерöсын да Покчаын писарлы отсасьысьöн. Сöвет власьт пуксьöм бöрын вöлi секретарöн Кöрткерöсса гöльяслöн комитетын да судын.
Михаил Лебедев – коми литератураын подув пуктысьяс пиысь öти. Гижны босьтчис куим арöсöн. Тöдса кыдзи поэт, прозаик да драматург. Медводдза повестьяссö – «За богом молитва, за царём служба не пропадут» (1898), «Последние дни Перми Великой» (1907), «Таня Осинина» (1909), «Среди медведей» (1914), «В волостном омуте» (1915) – гижлiс роч кыв вылын. Поэтлöн медводдза коми кывбуръяс пырисны Андрей Цемерлöн 1914 вося «Коми мойдан да сьылан кывъяс» öктöдö.
Коми гижысь уна удж аслас творчествоын сиис челядьлы. Пырöдчис «Коми комиссия» уджалан юкöнö да лöсьöдалic лыддьысян-велöдчан небöгъяс. Вуджöдiс Иван Крыловлысь 60 гöгöр басня, а ciдзжö Александр Пушкинлысь, Владимир Маяковскийлысь да Самуил Маршаклысь гижöдъяс. Тшöкыда йöзöдчылiс Юсь псевдоним улын. Но паныдасьлöны и мукöд сайнимъяс: Гöль морт, Дзöля Демьян, Бур морт, М. Войтыров, Коми морт, Северянин, Солдат-зырянин, Абориген, Абориген Вычегодский, Анти, Безземельный, Сидор, Берестов Матвей, Крокодил.
Михаил Лебедев уна во олiс Кöрткерöс сиктын. Бура тöдiс сэтöн олысь йöзлысь история да фольклор. Та подув вылын артмисны поэма-мойдъяс «Кöрт Айка» да «Яг морт». Гижысьлöн ыджыд уджöн лои – коми литератураын выль жанр лöсьöдöм – оперетка. «Мича ныв», «Тун» да «Настук» опереткаяссö сувтöдлiсны сцена вылын. 1939-öд воын литератураын ыджыд уджысь Михаил Лебедевлы вöлi сетöма «Знак Почёта» орден. Тайö вöлi медводдза коми писатель, кодöc пасйисны ыджыд государственнöй наградаöн. Кулic 1951 вося март 5 лунö Кöрткерöс сиктын.
2022 вося 10-öд номера «Войвыв кодзув» журнал пыртö Михаил Лебедевлысь «Во гöгöрся олöм», «Мыйла нö шондiöй, вöр сайö лэччöмыд…», «Зыбкадорся сьыланкыв», «Эзысь тöлыся вой», «Олiс вылiс вöрын…», «Коми збойлун…», «Миян муöй» кывбуръяс, «Самöвар» да «Сьöла да тар» басняяс.
Михаил Николаевич Лебедевлöн нимыс пыр йöз паметьын: тöдöны и прозаикöн, и поэтöн, и публицистöн, и драматургöн. Сылысь гижöдъяссö радейтöны, лыддьöны да сьылöны.
Лыддьысьöй чужан кыв вылын, паськöдöй-сöвмöдöй сiйöс. Выль петасъясöн позьö тöдмасьны Национальнöй библиотекаын, небöгъяс, газет-журналъяс сiдзжö верманныд босьтлыны гортö лыддьöм вылö.
