17 июня 2022
Национальнöй библиотека ёртасьö челядькöд!
Гожöмын Национальнöй библиотека восьтö «Небöга йöр» (Книжный дворик) уджтас. Тайö быдсикаса площадкаяс, кöнi ныла-зонма вермöны лыддьыны небöгъяс, ворсны, серпасасьны, вöчны ки пом уджъяс.
Велöдчысьяс окотапырысь пырöдчöны ас му туялан да войтырсикас ворсöмъясö. Тöдмасьöны коми йöзлöн историяöн, культураöн да фольклорöн. Кыдзи артмис Усть-Сысольк кар? Кодi медводдзаöн восьтiс коми школаяс? Кутшöм пемöсъяс пырöны Гöрд небöгö? Тайö юалöмъяс вылö челядьлы вочакыв позьö аддзыны «Ворсыштам да тöдмалам!» (Поиграем и узнаем!) уджтасысь.
Уджтасыс вӧзйӧ уна сикас ворсӧмъяс, позьö чукöртны Коми Республикалысь мусерпас, аддзыны сэтысь каръяс, тöдчана инъяс да вöр-валысь озырлунсӧ. Анбур шыпасъясöн ворсöм отсалö пырöдчыны ХIV-öд нэмö, мый йитчöма коми гижöдлöн историякöд.
Челядькöд коми паськöмъяс йылысь сёрни мунö мöд ворсöмын – «Тöдмалам паськöм серти…» (Встречаем по одёжке…). Мыйын аслыспöлöслуныс?
Велöдчысьяс пырöдчöны коми войтырлöн историяö да культураö, аддзöны аслыспöлöслунсö коми паськöмлысь – ставыс тайö ворсiгмоз. Тöдмалöны нöдкывъяс, торйöдöны сыктывса, Эжва йывса, луздорса, удораса, изьваса национальнöй костюмъяс, а удж помын серпасалöны сьöлöм вылö воöм кöлуй.
Челядьлöн олöмыс мунö ворсiгтырйи. Ворсiгöн найö тöдмасьöны ас гöгöрса олöмöн, велöдчöны ёртасьны öта-мöдыскöд, а сiдзжö сöвмöдöны вежöрсö да сёрнитанногсö. Ворсана аддзысьлöмъяс матыстöны быдмысь войтырöс небöглань, налöн содö муслун лыддьысьöм дорö!
