07 июня 2022
Челядь лыддьысьöны - читаем детскую литературу на коми языке
| Полякова, Э. И. Челядьдырöй, сё майбырöй! : висьтъяс / Эльвира Полякова. – Сыктывкар : ООО «Анбур», 2022. – 80 л.б. |
Эльвира Ивановна Поляковалöн «Челядьдырöй, сё майбырöй!» петас пыртö коми кыв вылын висьтъяс. Петкöдлöма Кыдзрас грездса челядьлысь бурнога олöмсö да налысь майшасьöмсö. Сиктса челядь ворсöны-гажöдчöны, отсасьöны бать-мамныслы да пöль-пöчныслы.
Шöр герой – Канев Ваня, верстьö йöз отсöгöн тöдмалö матiгöгöрса олöм йылысь, сылöн сöвмö сямлуныс да вежöрыс. Бать-мам да пöль-пöчыс отсалöны зонкалы шедöдны тöдöмлун да мывкыдлун. Школаын велöдысь индö детинкалы колана туйвизь.
| Ануфриенко, Т. (Габова Т. И.). Аська, Тришка, Петрушка да мукöд : висьтъяс / Татьяна Ануфриенко; вуджöдiс коми кыв вылö А. В. Попов. – Сыктывкар: ООО «Анбур», 2022. – 56 л.б. |
Татьяна Ивановна Ануфриевалöн «Аська, Тришка, Петрушка да мукöд» небöг дзоля ёртъяс йылысь. Шöр геройяс – каньяс, понъяс, лэбачьяс, ваын да видз вылын олысьяс. Морт да пемöсъяс костын серпасалöма ёртасьöм, тöждлун да радейтчöм.
Висьтъясысь позьö бöрйыны дзоля ёртлы лöсялана ним. Аська, Метиска, Симка, Ласка, Кузьма, Тришка, Граф… – быд геройлöн аслас этш да олан туй. Выль петас вермасны лыддьыны кык кывъя йöз. Комиöдiс – Алексей Вячеславович Попов.
| Куратов, И. А. Выль сьыланкыв : кывбуръяс / Иван Куратов. – Сыктывкар : «Эскöм» издательство, 2022. – 32 л.б. |
«Выль сьыланкыв» небöг сетö позянлун тöдмасьны Иван Алексеевич Куратовлöн кывбуръясöн. Коми литературалы подув пуктысьлöн гижöдъяс лöсялöны и öнiя кадлы. Найö велöдöны томуловöс радейтны чужан кывнымöс да мунымöс, чуйдöдöны сюсьджыка видзны да вылö донъявны йöзöс, казявны быдлунъя олöмысь мич.
Небöгö пыртöма Иван Куратовлысь кывбуръяс, кодъяс лоины йöзкостса сьыланкывъясöн. На пиысь : «Сьылан менам, сьылан…»; «Выль сьыланкыв». «Коми кыв», «Коми бал», «Менам муза», «Ой, олöм, олöм! Тэнсьыд донтö…» – велöдчысьяслöн медрадейтана да тöдвылö босьтана кывбуръяс.
Дона ёртъяс, выль петасъясöн позьö тöдмасьны Коми Республикаса Национальнöй библиотекаын, небöгъяс сiдзжö верманныд босьтлыны гортö лыддьöм вылö.
