г. Сыктывкар

ул. Советская, 13

8 (8212) 255-422

leninka@nbrkomi.ru

Пн. - пт. с 10.00 до 20.00

Суббота - выходной

Воскресенье с 10.00 до 17.00

Национальная библиотека Республики Коми
Умная библиотека для общества знаний

Меню
28 октября 2021

«Лыддьысям комиöн» / Обзор краеведческих новинок «Читаем на коми языке»

Пыдди пуктана лыддьысьысьяс! «Выльторъяс» лист бок тöдмöдö лыддьысьысьясöс Геннадий Осиповлöн, Анжелика Елфимовалöн, Вячеслав Бабинлöн, Елена Афанасьевалöн гижан сямöн да налöн выль гижöдъясöн, восьтö Удораса коми войтырлысь «Шондiа му» сборник.

Осипов Г. В. Мыйла асьнымöс ог видзöй: [кывбуръяс] / Геннадий Осипов. – Сыктывкар: Коми республиканская типография, 2021. – 94, [1] лист бок.
Осипов Г. В. Мыйла асьнымöс ог видзöй: [кывбуръяс] / Геннадий Осипов. – Сыктывкар: Коми республиканская типография, 2021. – 94, [1] лист бок.

Коми Республикаса заслуженнöй уджалысь, общественнӧй удж вӧчысь Осипов Геннадий Васильевич чужис 1940-öд воын март тöлысся медводдза лунö Луздор районса Слудка сиктын. 1967-öд воын эштöдiс шöр школа, сэсся – Коми пединститутын историко-филологическöй факультет. Нелямын воысь дырджык уджалiс велöдысьöн, директоралic Гурьёвчи шöр школаын.

Геннадий Васильевич кывбуръяссö заводитic гижны неважöн. Гижö коми сиктын талунъя олöм-вылöм йылысь, мöвпалö коми кывлöн аскиа лун йылысь, казьтылö ветеранъясöс. Лыддьысьысьяслы тöдсаöсь нин Геннадий Осиповлöн кывбуръясыс. Кывбуръяс гижö комиöн да рочöн. Асшöр небöгъясöн лоöны: «Вомгорув мöвпъяс»; «Живу на родной земле»; «Чужанiныд медся дона».

2021-öд воын чужис гижысьлöн «Мыйла асьнымöс ог видзöй» небöг, сиöма Слудка сиктлöн 400 вося юбилейлы. Öктöдö пыртöма чужан му, грезд да сикт, радейтана рöдвуж йылысь кывбуръяс. Гижöдъясын тыдовтчö авторлöн майшасьöм аслас чужан му понда, чуктöдö быдöнöс кыпöдны, дорйыны да лёкö не пöртны ассьыным шуда пельöснымöс.

Шондiа му: висьтъяс, кывбуръяс, казьтылӧмъяс / лӧсьӧдысьяс С. Ю. Говорухина, Н. А. Обрезкова. – Сыктывкар: Коми республиканская типография, 2021. – 126, [1] лист бок.
Шондiа му: висьтъяс, кывбуръяс, казьтылӧмъяс / лӧсьӧдысьяс С. Ю. Говорухина, Н. А. Обрезкова. – Сыктывкар: Коми республиканская типография, 2021. – 126, [1] лист бок.

Чужан му дорö муслуныс коми йöзлöн оз кус. Быд морт ассьыс сьöлöмкылöмъяссö петкöдлö аслыспöлöса. Тайö серпасыс тыдовтчö 2021-öд вося  «Шондiа му» выль петасын.

Небöгас чукöртöма Удораын коркö овлöм да öнi олысь-вылысь коми войтырлысь кывбуръяс, казьтылöмъяс, тешъяс да неыджыд висьтъяс. Гижöдъясын петкöдлöма Удора йылысь: сылöн юяс да ёльяс, ыбъяс да видзьяс, челядьдыр кад, сиктса мытшöдъяс, олöмлысь гажа да коркö дояджык кадъяс.

Чужан му кывбуръясöн петкöдчöны Пётр Бушенев, Николай Жилин, Надежда Логинова, Людмила Муравьёва, Альбина Селиванова, Борис Палкин. Олöмсьыс тешкодьтор аддзöны да кужöны сы йылысь висьтавны асланыс гижöдъясын Антонина Гордеева, Мария Матева.

Челядь олöмысь вöвлöмторъяс казьтылöны Надежда Логинова, Светлана Говорухина, Альбина Бушенева. Удораса пионеръяслысь лов шы казьтылö Сыктывкарса канму университетса велöдысь Елена Остапова. Кипом небöгъяс, журналъясысь гижöдъяс да серпасъяс пыртöны быдöнöс пионер кадö. Вашкаса да Мозынса олöмысь пасйöдъяс, казьтылöмъяс оз вунöдны и Василий Пигулин, Елизавета Селиванова да мукöд олысь да овлöм Удора войтыр.

Елфимова, А. Г. Кык кыв = Два слова: стихи / Анжелика Елфимова ; Коми йöзöдчан керка.  – Сыктывкар: Издательский дом Коми, 2021. – 111 лист бок.
Елфимова, А. Г. Кык кыв = Два слова: стихи / Анжелика Елфимова ; Коми йöзöдчан керка. – Сыктывкар: Издательский дом Коми, 2021. – 111 лист бок.

Коми кывбуралысь, журналист Анжелика Геннадьевна Елфимова чужӧма 1970-ӧд вося ода-кора тӧлысь 27-ӧд лунӧ Кӧрткерӧс районса Маджа сиктын. Эштöдӧма Сыктывкарын искусствояс училишеысь хорӧн дирижирование класс, Москваын А. М. Горький нима Литературнӧй институт. Велӧдчӧма Сыктывкарса канму университетлӧн филология да финн-йӧгра факультетъяс вылын.

Уджалан туй паськыд: культура керкаын художествоа веськӧдлысь, челядь видзанінын да Маджаса школаын шыладӧ велӧдысь, корреспондент республикаса да районса газет-журналын, коми гижысь котырын литературнӧй консультант, Сыктывкарса коми культура шӧринын художествоа веськӧдлысь, öнi зільӧ «Чушканзі» журналын.

Медводз кывбуръяссӧ гижӧма рочӧн, йӧзӧдӧма 1989-ӧд вося «Красное знамя» газетын. Ёртъясыс коркӧ юалӧмаӧсь: «мыйла кывбуръястӧ он гиж комиӧн»? Та бӧрын босьтчӧма гижны сӧмын комиӧн. Коми кывбур чукӧрсӧ медводдзаысь вӧлі йӧзӧдӧма 1999-ӧд воын «Коми му» газетын.

Кывбуръяссӧ йӧзӧдлӧма «Войвыв кодзув», «Арт», «Невский альманах» журналъясын, «Мелiлуныс пыдӧстӧм и помтӧм», «Уна рӧма сикӧтш», «Пӧлӧзнича пӧвстын» да мукöд ӧтувъя чукӧръясын. Коми кывбуралысьлöн асшöр уджöн лоöны: «Аддзысьлытӧдз», «Еджыд вӧтъяс», «Вемӧсӧн ли вӧтӧн» кывбура чукӧръяс.

2021 воын Анжелика Елфимовалöн чужис «Кык кыв» небöг. Öти кышöд улö чукöртöма мукöд сборникын петавлöм да öнöдз на йöзöдлытöм вуджöдöмъяс. Чужан му, вöр-ва, муслун, олöм мöвпъяс да мукöд серпасъяс öтувтчöмаöсь поэтлöн гижан туйын. Выль петасыс сетö позянлун тöдмасьны авторлöн кывбуръясöн öтшöтш и коми, и роч лыддьысьысьлы.

Бабин В. Л. Вына зэр: кывбуръяс / Вячеслав Бабин. – Сыктывкар: Эксмо, 2021. – 62, [1] лист бок.
Бабин В. Л. Вына зэр: кывбуръяс / Вячеслав Бабин. – Сыктывкар: Эксмо, 2021. – 62, [1] лист бок.
Бабин В. Л. Öшиньын бобув = Бабочка в окошке / Вячеслав Бабин ; составитель: Л. Липина. – Сыктывкар: Коми республиканская типография, 2021. – 83 лист бок.
Бабин В. Л. Öшиньын бобув = Бабочка в окошке / Вячеслав Бабин ; составитель: Л. Липина. – Сыктывкар: Коми республиканская типография, 2021. – 83 лист бок.
Бабин, В. Л. Мыджöд = Опора / Вячеслав Бабин ; составитель: Л. Липина. – Сыктывкар: Коми республиканская типография, 2021. – 95 лист бок.
Бабин, В. Л. Мыджöд = Опора / Вячеслав Бабин ; составитель: Л. Липина. – Сыктывкар: Коми республиканская типография, 2021. – 95 лист бок.

Гижысьяс, сьылысьяс да йöктысьяс, шылад тэчысьяс, искусствоын киподтуя йöз – ставнас озыр Вылыс Эжва. На лыдö пыртöма и Вячеслав Леонидович Бабинöс, кодi ассьыс пай пуктic Коми литература cöвмöдöмö.

Коми гижысь Вячеслав Бабин чужӧма 1960-ӧд вося моз тӧлысь 21-ӧд лунӧ Кулӧмдiн районса Немдін сиктын. 1978-ӧд воын помалӧма Немдінса шӧр школа, уджалöма сиктса механизаторӧн. Сэсся кочегаритӧма да ӧттшӧтш директоралӧма Культура керкаын. Уджалӧма «Ленин туйӧд» газетын, чери видзан службаын, дасьтӧма радиопередачаяс. 1988–1993-ӧд воясын велӧдчӧма А. М. Горький нима литературнӧй институтын, дорйӧма «Вуджӧр» кипомысь гижӧм небӧг серти диплом. 1994-ӧд восянь «Парма гор» газетын кывкутысь секретар, веськӧдлöма «Эжва» литклубӧн.  Гижö кывбуръяс да проза. Сылöн петавлiсны «Сьöлöмшöр», «Öктö Коля коляоз», «Вуджöр», «Вöрса качай» небöгъяс. Гижан туй позьö аддзыны «Ковтöм петасъяс», «Во гöгöр», «Коми челядьлы антология», «Сьылыштам, дзолюк», «Песни северной земли» öтувъя небöгъясын.

2021 воын Вячеслав Бабин козьналiс Коми Республикалöн 100 во тыригкежлö «Помся шуд аслам Войвывлы вöзъя» öти кышöд улын небöг чукöр. Мый ышöдö Вячеслав Бабинöс гижны сьöлöм вöрзьöдана кывбуръяс да висьтъяс, кодъяс некодöс оз кольны веськодьöн? Мый сылöн олöмын мыджöдыс? Татшöм юалöмъяс вöзйöма лыддьысьысьяслы выль петасъясöн тöдмасьтöдз.

«Мыджöд = Опора» небöгын вöзйöма Вячеслав Бабинлысь гижöдъяс коми и роч кыв вылын. Вуджöдöмын уджалiсны Андрей Попов, Андрей Расторгуев, Екатерина Цуммер, Денис Попов, Александр Суворов да мукöд. «Öшиньын бобув = Бабочка в окошке» небöг шымыртö челядь кывбуръяс. Автор бура гöгöрвоö посни нывка да зонкаясöс, сы вöсна шöр герой – тайö ичöт морт, рам да вильыш, зiль да наян, пелькöс да дышиник, но зэв муса да радейтана ставлы. Челядьлöн серпасъяс гажöдöны небöглысь лист бокъяс.

Вячеслав Бабин тайö вонас нимкодялö миянöн. Лыддьысян кудйö коми гижысьлöн воис нöшта челядьлы выль петас – «Вына зэр». Небöгын петкöдлöма сикт-грездын олысь нывкаяслöн да детинкаяслöн быдлунъя олöм. Гижысь зэв бура сяммö петкöдлыны вöр-валысь мичлунсö, кужöмöн донъялö ставсö, мый кытшалö быдмысь войтырöс, велöдö лоны писькöс вежöраöн, отсöг вылö локны дась йöзöн. Мичмöдöны небöглысь лист бокъяс Александра Поповалöн серпасъяс.

Афанасьева Е. Е. Дуда чуксалö = Дуда манит: рассказы для детей и юношества / Елена Афанасьева. – Сыктывкар: "Арт" журнал редакция, 2021. – 87, 86, [3] лист бок.
Афанасьева Е. Е. Дуда чуксалö = Дуда манит: рассказы для детей и юношества / Елена Афанасьева. – Сыктывкар: "Арт" журнал редакция, 2021. – 87, 86, [3] лист бок.

Коми гижысь Елена Евгеньевна Афанасьева чужöма вöльгым 14-öд лунö Удора районса Важгорт сиктын. Помалiс Сыктывкарса каналан университет. Пырö Россияса гижысь котырö. Олö Сыктывкарын. Уджалö Республикаса гижысь котырын литературнöй консультантöн.

Заводитлiс гижны роч кыв вылын, сэсся босьтчис гижны комиöн. Елена Афанасьевалысь гижöдъяссö позьö лыддьыны «Йöлöга» газетысь, «Арт», «Би кинь», «Войвыв кодзув», «Чужан кыв», «Наш современник», «Дон», «Юность» журналъясысь, «Белый бор» альманахысь, «Удора, Удора кык мича ю дорын», «Сьöлöмшöрöй менам, Удора» да «Пöлöзнича пöвстын» нима сборникъясысь.

Асшöр небöгъяс: «Лэбачöс ки помысь вердi», «Енкöлаö ыбöс», «Каленик-лэбач», «Ву», «Дуда Платтьöа», «Дуда кимöститчö», «Эжöр-вежöр», «Мöвпалан визьяс».

2021-öд воын Сыктывкарын чужис Елена Афанасьевалöн «Дуда чуксалö» небöг. Выль петас водзö нуöдö «Дуда платтьöа» да «Дуда кимöститчö» небöгъясын панöм сёрнисö.  «Кузьбöж», «Куим юркытш», «Ёмалöн ордым», «Дуда Платтьöа да Ош» висьтъясын шöр геройясыс – сиктса кык ныв: Ёля да Шора. Гожöмнас найö тшöкыда ветлывлöны вöрö, видз вылö, нюрö. Небöг мичмöдöны Валерия Осташовалöн серпасъяс.

Лыддьысьöй комиöн, вынсьöдöй чужан кыв! Выль петасъясöн позьö тöдмасьны Национальнöй библиотекаын, небöгъяс сiдзжö верманныд босьтлыны гортö лыддьöм вылö. Окотапырысь виччысям быдöнöс!

  • Скандинавская кухня. Простая и уютная еда на любой случай
    Скандинавская кухня. Простая и уютная еда на любой случай
    Аурель Бронте
  • Антистресс по-скандинавски
    Антистресс по-скандинавски
    Фриис Андерсен Малене
  • Скандинавские узоры
    Скандинавские узоры
    Ватанен Санна
  • Почти идеальные люди
    Почти идеальные люди
    Бут Майкл
  • Север. Счастливая жизнь по-скандинавски
    Север. Счастливая жизнь по-скандинавски
    Аурель Бронте
  • Свадебный сюжет
    Свадебный сюжет
    Евгенидис Джеффри
    Роман
  • Гравити Фолз : Tourist Trapped
    Гравити Фолз : Tourist Trapped
    Современная проза
  • Annette, ein Heldinnenepos
    Annette, ein Heldinnenepos
    Weber, Anne
    Биография
< >
Яндекс.Метрика