Коми кывлöн гусяторъяс

• Главная
• Краеведение
• Выльторъяс (новости на коми языке)

Май 13 лунö Коми Республикаса Национальнöй библиотека нуöдiс коми гижöд лунлы сиöм гаж. Ёртасян керкаын лои нимöдöма выль петас – «Секреты коми языка в рассказах» небöг. Республикалы сё во тыригкежлö сiйöс дасьтiсны Коми наука шöринса туялысьяс: Ольга Ивановна Некрасова, Галина Васильевна Пунегова да Евгений Александрович Цыпанов. Лэдзöма коми кыв йылысь тайö роч петассö Коми Республикаса национальнöй политика министерство сьöм тшöт весьтö.

Чолöмалiсны авторъясöс да гöсьтъясöс Коми Республикаса национальнöй политика министр Роман Вениаминович Носков, Ёртасян керкаса веськöдлысь Григорий Федорович Хатанзейский, Коми Республикаса Национальнöй библиотекаöн веськöдлысь Алексей Анатольевич Просужих.

Коми сьыланкывъясöн гажöдiсны коми кыв курсъяс помалысьяс Александр да Антонина Федоренко. Роч гозъя неважöн на заводитiсны велöдны коми кыв, но залын пукалысьяс тайöс весиг эз казявны: сёрнитанногыс артистъяслöн дзик комияслöн кодь нин. Антонина ачыс татчöс, а Удмуртияысь Александр верöсыскöд тöдмасьöма Курскса музыкальнöй колледжын велöдчигöн.

Савин нима драма театрысь Татьяна Михайлова петкöдлiс В.Савинлысь «Шондi петiгöн дзоридз косьмис» пьеса юкöн – лыддис Иванлысь, крестьянин пилысь, вокыслы письмö. Гöсьтъяс зэв сюся кывзiсны артистöс да тöдмалiсны, мый коми кывйын абу род категория.

Коми кывлöн мукöд гусятор йылысь Коми республикаса сюсь вежöра сиктса челядьлы лицей-интернатысь, Сыктывкарса канму университетысь, Канму службаö да веськöдлыны велöдан Коми республикаса академияысь да Сыктывкарса педколледжысь велöдчысьяс тöдмалiсны ворсiгмоз.

Ворсöмöн жö презентуйтация заводитчигöн гöсьтъяс тöдмасисины öта-мöдныскöд – телепонъяс пыр пасйисны ассьыныс национальность. Кызвыныс, дерт, коми да роч лои, но вöлiны и мукöд национальностя йöз. Кодсюрö пасйисны асьнысö татшöм ногöн: «Я – Россиянин!» да «кыдъя роч».

Небöг дасьтöм, тэчас да содержание йылысь сёрнитiсны авторъяс. А Андрей Гельевич Попов – литературнöй редактор – пасйис, мый учёнöйяскöд сiйö уджалö медводдзаысь. Шмонитiгмоз юксис: том гижысьясыдлысь пö унатор позьö вежны, а туялысьясыдкöд тадз оз артмы.

Презентация бöрын и заводитчытöдзыс гöсьтъяс тöдмасисны «Сёрнитам комиöн» небöга выставкавывса коми кывйысь самоучительясöн да ворсiсны библиотекаын дасьтöм быд сикас карточкаöн.