«Лыддьысям комиöн» / Обзор краеведческих новинок «Читаем на коми языке»

• Главная
• Краеведение
• Выльторъяс (новости на коми языке)

52–öд петас тöдмöдö Александр Шебыревлöн «Чусмöм рöмпöштан» пьеса-тешöн да Анастасия Сукгоевалöн  олан - гижан сямöн.

Дона лыддьысьысьяс!

Зэв нимкодь, мый тi тöдмасянныд выль петасъясöн асланым чужан кыв вылын. Водзö восьтам Александр Шебыревлысь да Анастасия Сукгоевалысь олантуй.

Александр Васильевич Шебырев – журналист, поэт, композитор. Чужис Кулӧмдін районса Пожӧг сиктын 1960-ӧд вося ода-кора тӧлысь 28-ӧд лунӧ. Эштöдic Пожӧгса школа. Армия бӧрын велӧдчис Ӧнія гуманитарнӧй академиялӧн Сыктывкарса юкӧнын экономика факультетын. Уджавлic юрисконсультӧн «Пожӧг» совхозын, юрнуӧдic Тима Вень да школаса краеведческӧй музейясöн.

Сёрöнджык пырис журналистика юкöнö : корреспонденталic, вежис шӧр редакторӧс «Ленин туйӧд» («Пара гор») газетын.

Александр Шебырев ёнджыкасӧ тӧдса кыдзи поэт. Ассьыс кывбуръяссӧ йӧзӧдлӧма газет-журналъясын : «Арт», «Войвыв кодзув», «Чушканзі», а сідзжӧ «Сикӧтш», «Мелілуныс пыдӧстӧм и помтӧм», «Вечерний звон» да мукӧд ӧтувъя сборникъясын.

Сылöн кывбуръяс вылӧ тэчӧма вель уна сьыланкыв. Ачыс гижӧ шылад мукӧд кывбуръяс вылö. Сёрӧнджык босьтчис прозаӧ, гижӧ висьтъяс, очеркъяс. Ас небöгъяс Александр Шебыревлöн: «Олöм туйтi» да «Фараон». «Фараон» – лыддьыссьö медбур 2019 вося небöгöн.

2010-ӧд восянь пырӧ Коми гижысь котырӧ. Кыкысь вермыліс «Эзысь борд» республикаса литературнӧй конкурсын : «Проза» нимпасын 2008-ӧд воын да «Поэзия» нимпасын 2014 воын.

2020 вося «Войвыв кодзув» журналлöн 9-öд номерын йöзöдöма Александр Васильевичлысь «Чусмöм рöмпöштан» пьеса-теш.

Медводдза петкöдчöмын ми аддзам сиктса семьялысь олöм. Миколай Ёгор да Марья быдтöны кык челядь. Кöзяин дышиник морт, некутшöм уджын оз инась, олö гöтыр сьылi вылас. Марья – уджач нывбаба, челядьсö лэптö, керка пытшкын бергалö и скöт картаын уджалö.

Пьеса воссьö : «Керкаын жыр. Пызан. Диван. Камод. Ыджыд, важ рöмпöштан. Ёгор кокъяссö кресталöмöн куйлö радейтана диван вылас. Мыйкö вомгорулас нузгö. Йиркö видзöдö, быттьö розьöдны сiйöс кöсйö. Мöвпалö, кутшöм сьöкыд öнiя олöмыс, кыдзи сiйöс некод оз гöгöрво, оз донъяв…Орччöн Марья гöтырыс мыськалö. Ветьöкöн. Мыйкö броткöдчö. Тоже буди олöм вылас…».

Водзö петкöдчöмъяс мунöны рöмпöштан гöгöр, кодi сулалö Миколай Ёгор керкаын. Важ рöмпöштан вöлöм кö аслыспöлöс. Сы пытшкö веськалöны Петыр – Ёгорлöн сусед, Игнат – Петырлöн сватыс и ачыс Ёгор.

Пьеса-теш помын петкöдчö Пöрысь Пöль. Сылöн кывъясыс йиджисны сьöлöмъясöдзныс гозъяяслы. Пöрысь Пöль нюмсорöн : «Чолöм ли мый ли... Видзöда да нюмöй петö. Чуймöдана олöмыд гозъя костад! Дыр олiгад тай öта-мöд дiнад велаланныд, рушманныд, кöдзаланныд, чусмöм рöмпöштан пыр олöмсö аддзанныд. Кöть эськö медся матысса йöз тi! Коркö пинясянныд, коркö бурасянныд, дзуртанныд, бротканныд… Вежавидзöмöн колö овны, öта-мöдтö пыдди пуктöмöн. Енмыс ке сетiс гозйöдчыны – олöй-вылöй…».

Со татшöм серамсора пьесаöн ми тöдмасим. Александр Шебыревлысь «Чусмöм рöмпöштан» пьеса-теш позьö аддзыны да лыддьыны 2020 вося «Войвыв кодзув» журналлöн 9-öд номерын.

«Повзян либö пыран?» –  татшöм нима статья петiс 2020 вося медводдза номера «Йöлöга» журналлöн лист бокъясын. Тайö юрним улын воссьö Анастасия Сукгоевалöн олан да гижан сям. А ciдз жö эм позянлун мöвпыштны да донъявны «Пöдса öдзöс» кывбур.

Анастасия Михайловна Сукгоева чужис 1982-öд воын Сыктывдiн районса Сёська сиктын. Профессия серти юрист. Олӧ Сыктывкарын, уджалӧ госслужбаын.

Гижӧ комиӧн да рочӧн. Медводдза воськовъяс гижöмын вöчлöма школаын велöдчигöн на. Творчествоын выль кыптöмъяс воöмаöсь Анастасия дорö челядь чужтöм бöрын. Гижӧдъяссӧ йӧзӧдӧма «Арт», «Би кинь», Войвыв кодзув» журналъясын. Роч кыв вылын кывбуръяс да мойдъяс петавлiсны «Радуга»; Север», «Юность», «Детское чтение» журналъясын.

Анастасия Сукгоевалöн куим асшöр небöг : «Цветущий ёжик», «Маленький единорог», «Вильыш урпи», кытчö пырöны челядьлы кывбуръяс коми да роч кыв вылын.

«Йöлöга» журнал лыддьысьысьяслы вöзйö Анастасия Сукгоевалысь «Пöдса öдзöс» кывбур.

Пӧдса ӧдзӧс

Ӧдзӧс восьтыны мен колӧ –

А ме пола.

Мый нӧ сэнi, ӧдзӧс саяс?

Ог тӧд тайӧс.

Гашкӧ, виччысьӧ сэн шоглун?

Сiдзкӧ ог мун.

Но а, гашкӧ, шедас козин?

Сiдзкӧ, позьӧ.

Öдзӧс костӧд письтic югӧр –

Шуда юӧр:

Олӧм юӧ югыд содтас...

Али сотас?!

Ог, ог восьты, вешъя бокӧ.

Лолӧс нокӧ...

Корся мӧд ӧдзӧс – и пыра –

Абу дыр ӧд!

Вермас, дерт, и лоны тадзи:

Нем ог аддзы...

Тайӧ майшасьӧмыс менӧ

Дзикӧдз венӧ...

Сӧмын сылы ме ог сетчы –

Пыра сэтчӧ!

Кодкӧ индӧма ӧд меным –

Сiдзкӧ, верма,

Тырмас сям, и вынсӧ аддза.

Пыра татчӧ!

Вӧчи воськов, нӧшта ӧти –

Ог пов ньӧти...

Кутi вугсӧ, восьтi смела –

Юсӧ кела.

Ачыс Анастасия пасйö: «Тайӧ кывбурас ӧдзӧсыс – поэзия мирӧ пыранiн. Ме аддзи сiйӧс и окота лои восьтыны ӧдзӧссӧ да воськовтны тайӧ тӧдтӧм, но югыд мирас. Окота лои видлыны вынӧс. Но ӧтпырйӧ повзи : верма-ӧ, кужа-ӧ? Гашкӧ, тайӧ абу менам ӧдзӧс? Гашкӧ, тайӧ туйыс вайӧдас менӧ шогӧ? Но ӧдзӧс костӧдыс письтысь югӧр кыскис ас дiнас, кӧсйысис петкӧдлыны мӧд мир – мичасьыс-мича. И ме венi полӧмӧс : ог кӧ видлы – некор ог тӧдмав ассьым вынӧс. И – воськовтi...».

Ёртъяс, тöдмасим Анастасия Сукгоевалöн гижан сямöн. Мöвпыштой быдöн, кутшöм тiянлы öдзöс олöмыс индас. И кутшöм кывкöртöдъяс вöчанныд – «Повзянныд либö пыранныд?».

Радейтöй чужан кыв, лыддьысьöй коми кыв вылын. Выль петасъяс лыддян да сьöлöмыд йиджтысьö шоныд муслунöн. Став бурсö!

• #Лыддьысям комиöн
• #Читаем по-коми