15 апреля 2020

«Лыддьысям комиöн»/Обзор краеведческих новинок «Читаем на коми языке»

«Лыддьысям комиöн» 49-ӧд петас тöдмöдö Василий Лодыгинлöн «Неджӧг» нима выль небöгöн да Владимир Тиминлöн «Куим небöгö öтувтöм гижöд чукöрысь» мöд томöн.

Лодыгин В. Г. Неджӧг : висьтъяс, казьтылӧмъяс / Василий Лодыгин ; [серпасалiс Г. Шарипков]. – Сыктывкар : Анбур, 2019. – 290, [2] лист бок : фот., портр. - Текст (визуальный) : непосредственный.

Василий Григорьевич Лодыгин, Коми Республикаса нимйöза кывбуралысьлöн поэзияыс бура тöдса коми войтырлы. Чужис Кулöмдiн районса ичöтик Габов грездын. Уджавлiс велöдысьöн, радио вылын, «Парма гор» газетын.

Василий Лодыгин пырö Россияса гижысьяс да журналистъяслöн котыръясӧ. Коми комсомоллöн да Коми Республикаса правительстволöн Иван Куратов нима премияа лауреат, Коми Республика да Россия Федерация культураын пыдди пуктана уджалысь, Кулöмдiнса «Василей» гаж котыртысь. А таво сыöн дасьтöм гижöд серти коми кыв радейтысьяс гижисны Öтувъя коми диктант.

Йöзöдчö «Би кинь», «Войвыв кодзув», «Север» журналъясын; «Коми му», «Парма гор», «Молодёжь Севера» газетъясын. Сылöн кывбуръясысь кылан сьöлöм шонтана рöмъяс, чужан му, мам да нывбаба дiнö помтöм муслун йылысь, йöз сёрниысь босьтöм шань коми кывъяс. Нöшта гижö поэмаяс, висьтъяс, казьтылöмъяс, очеркъяс да вуджöдöмъяс.

Василий Лодыгинлöн петавлiсны торъя небöгъяс: «Менам улича», «Гыбад», «Йöрын да вöрын», «Мусукасян рöм», «Чалльöг» ; «Вуграсигöн» да «Козин» нима челядьлы сиöм кывбура небöгъяс да с.в. Сылöн кывбуръяс вылö эмöсь сьыланкывъяс: «Сикöтш», «Чöскыд эськö коляозйыс», «Зонлöн сьыланкыв» да мукöд.

А талун корам тöдмасьны Василий Лодыгинлöн «Неджӧг» нима выль небöгöн. Дас квайтöд петасö пыртöма 24 висьт: «Будимер», «Киль», «Вот тэ шу», «Гоблян», «Перым гöра», «Сöнiк», «Роч», «Еврей», «Шыбель» да мукöд. «Ас йылысь» юкöнö пырисны гижысьлöн казьтылöмъяс. Эм танi фотояс: Василий Лодыгин мамыскöд, ёртъясыскöд, коми гижысьяскöд, газетын уджалысьяскöд.

Тимин В. В. Куим небöгö öтувтöм гижöд чукöр. Т. 2 / Владимир Тимин; [лöсьöдiс Л. В. Чиркова ; водзкыв: Татьяна Кузнецова, Анастасия Малева ; серпасалiс Лисовский Ю. Н. ; редактор Е. В. Ветошкина]. - Сыктывкар : Коми Республикаса гижысь котыр, 2019. - 589, [2] лист бок, [1] л. портр. - Текст (визуальный) : непосредственный.

Владимир Васильевич Тимин, Коми Республикаса нимйöза кывбуртэчысь, чужлiс 1937-öд вося июль 2-öд лунö Сыктывдiн районса Пажга сиктын. Уджавлic Коми наука шöринын, республикаса радиоын, Зеленечса школаын директорöн; шöр редакторöн Сыктывкарса телевидениеын, Коми небöг лэдзанiнын да «Войвыв кодзув» журналын; республикаса печать Управлениеын вöлi юралысьöн да Коми Республикаса гижысь котырын председательöс вежысьöн. В. В. Тимин кулic 2015-öд воын ноябр 25-öд лунö.

Медводдза петас – «Туйын да гортын» (1971), а сэсся вöлiны: «И öтнам и йöзкöд» (1979); «Йöзлань чужöмöн» (1987), «Мича ёма» (1996), «Тэöн ола» (2004), «Кевмысь коми ног» (2011) кывбура небöгъяс.

«Венгр литератураысь 50 медся мича кывбур» (2015) öтувъя небöг Владимир Тимин комиöдiс Нина Обрезкова да Евгений Козловкöд öтшöтш. Петавлiсны Владимир Васильевичлöн и повесьтъяс: «Ракета видзöдö енэжö» (1990), «Пармаын вошöм БТР (2007).

Сыктывдiн районлöн кып юргö Яков Перепелицалöн шылад улын В. Тимин кывъяс вылö.

Коми Республикаса гижысь котыр заводитiс лэдзны Владимир Тиминлысь «Куим небöгö öтувтöм гижöд чукöр». Сьöмнас отсалiс Коми Республикаса юралысьлöн администрация. Петic нин мöд том, кодöс лöсьöдiс Л. В. Чиркова, редактор Е. В. Ветошкина, серпасалiс Ю. Лисовский, тэчис-чукöртic П. Симпелев, небöглöн корректор – Е. Афанасьева. Водзкывсö гижисны Т. Кузнецова да А. Малева. Мöд томö пырисны «Эжва Перымса зонка», «Вежай», «Еджыд ру» повесьтъяс да «Биармиаса Викинг» роман.

Историческöй повесьт «Эжва Перымса зонка» (2000) петавлic торъя небöгöн Финляндияса Кастрен нима котыр отсöгöн. Таысь В. Тиминлы сетлiсны Коми Республикаса Иван Куратов нима Государственнöй премия. «Биармиаса Викинг» романöн лыддьысьысьяс тöдмасьлicны 2012-öд воын.

Куим небöгö öтувтöм гижöд чукöрö пыртöма сiдзжö «Вежай» нима документа повесьт. Автор казьтылö вежайсö, кодi овлöма Кунибын, сылысь олан туйсö, война пыр мунöмсö.

Дона лыддьысьысьяс, чужан кывлы донсö аслыным колö кыпöдны – унджык коми кыв вылын небöг лыддьыны, олöмын пырджык вöдитчыны, ас ныв-пиянкöд сёрнитны, пыртны тайöс налы вираныс, висьтавны, кутшöм мича да колана ас кывным. Таысь ставным озырджыкöсь лоам – пытшкöсным и мöвпъясным.