Нина Куратовалы – 90!

• Главная
• Краеведение
• Выльторъяс (новости на коми языке)

Талун Нина Никитичналы тыри 90 арöс. «#нинакуратовалы90» акцияö пырöдчысьяссянь Коми республикаса быд пельöсысь, а нöшта на и Москва да Питер каръясысь воисны сылы пöсь чолöмъяс. Гижысь дорö шыöдчöмъяс да аттьöалана кывъяс Коми Республикаса Национальнöй библиотека йöзöдiс торъя гижöд чукöрöн. Талун сiйöс сетiм Нина Никитичналы.

Вайöдам дженьыдик кывкöртöд нуöдöм акциялы. Вконтакте лист бокын аттьöлан-чолöмалан пост йöзöдiс сё сайö морт.

Зiлисны торъя йöз и дзонь котыръяс. Медъёна, дерт, сикт-карса небöгаинъяс. Аттьö библиотекаръяслы – миян уджъёртъяслы! Наысь кындзи зiлисны тшöтш и школаяс, торъя классын велöдчысьяс, «Медся лыддьысьысь класс» конкурсö пырöдчысьяс, культура керка, театр, волонтёръяс, библиотека бердын уджалысь клуб, ветеранъяслöн сöвет да мукöд котыр. Ставлы ыджыд аттьö миян библиотекалысь вöзйöм-корöмсö кылöмысь да нималана гижысьлы ошкана-аттьöалана кывъяс гижöм-йöзöдöмысь!

Акцияын вöзйöмтор кындзи (а ми корим йöзöдны Нина Куратовалысь гижöд юкöнъяс да чолöмалöмъяс) тi, миян дона лыддьысьысьяс, йöзöдiнныд водзвыв дасьтылöм презентацияысь лист бокъяс, видеороликъяс, инсценировкаяс, коринныд пырöдчыны акцияö мукöдöс. Торъя нимкодь вöлi аддзыны республикаса библиотекаясын лöсьöдöм небöга выставкаяс, Н.Куратова творчество серти литература рыт йылысь юöръяс, афишаяс да лыддьысьысьяслысь фотояс. И, дерт, жö ассьыс, Нина Куратовалысь, фотояссö.Ӧтуввезйын да небöгъясын пырджык öти и сiйö жö серпасъясыс петöны, а кутшöм мича фотояс вöлöмаöсь сиктса библиотекаясын!..

Пасъям тшöтш найöс, кодъяс юксисны миянкöд ставнымкöд асланыс олöмын вöвлöмторъясöн, Нина Никитичнакöд волысьöмъяс йылысь висьтъясöн. Найö, дерт, зэв ёна мичмöдiсны миянлысь небöг-козиннымöс! Чайтам, зэв любö лоö Нина Никитичналы лыддьыны тайö казьтылöмъяссö.

Княжпогост районса Туръя сиктса библиотека ыстiс татшöм мича чолöмалан кывъяс. Вайöдам найöс нöшта öтчыдысь:

Нина Никитична!

Чолӧмалам тiянӧс чужан лунӧн!

Сиам шудсӧ уна -уна,

Дзоньвидзаӧн медым вӧлiн,

Долыда мед тiпкис сьӧлӧм,

Радейтiсны медым пӧся,

Тӧдсаяскӧд бура лӧсяв.

Дзоридз кодь Тэ ачыд мича,

Мед жӧ Енмыс тэнӧ видзас!

Кузь нэм да бур шуд!