Лыддьысям комиöн (Читаем по-коми)

• Главная
• Краеведение
• Выльторъяс (новости на коми языке)

«Лыддысям комиöн» 46 петас тöдмöдö Кулöмдiн районын чужлöм Ксения Карманова да Иван Ногиев гижан сямӧн.

Ксения Ивановна Карманова – том кывбура гижысь. Чужис 1987 воын Кулӧмдін районса Помӧсдін сиктын. Уджалӧ и олӧ ас чужан муын. Медводдза кывбуръяссӧ йӧзӧдліс «Йӧлӧга» газетын, сёрӧнджык гижӧдъясыс петавлісны «Войвыв кодзув» да «Арт» журналъясын.

Пырöдчö зiля конкурсъясö, шедöдö вылыс тшупöда инъяс. На пиысь «Эзысь борд», «Выль нимъяс», «Кöсъя лоны журналистöн».

Ксения Карманова кывбуръяс гижны босьтчöма школаын на велöдчигöн. Том гижысь пасйö ас йывсьыс: «Гижны радейта философскöй темаяс вылö. Сöмын кывбуръясын верма петкöдлыны сьöлöм кылöмъясöс. Гижöдын корся ассьым визь…Радейта кывзыны РОК-музыка, овлö весиг, тайö ышöдö выль кывбуръяс вылö».

2019-öд вося «Войвыв кодзув» журналлöн 7-öд номерын йöзöдöма Ксения Кармановалысь кывбуръяс.

«Но и олöм! Коми кывйысь яналам!

Мыйсяма ми коми войтыр, сiдзкö?!

Мый вöсна нö асьнымöс ми талялам?

Кутшöм омöль гудыр-няйтас личкö?

Но и олöм! Коми кывсö кедзовтам! –

Дугöдчам пö велöдöмысь! – Со öд!

Татшöм шуöмторйыс лёкног шензьöдö…»

Иван Иванович Ногиев чужис 1952-ӧд вося кӧч тӧлысь 18-ӧд лунӧ Кулӧмдін районса Парма грездын.

Лыддьысьысьяс тöдöны Иван Ногиевӧс кыдзи «Парма Вань», тайö сылöн литературнӧй гусяним. Гижны босьтчӧма ыджыдӧн нин. Гижö серамбана висьтъяс, а сідзжӧ повесьтъяс. Медводдза гижӧдсӧ йӧзӧдӧма 1993-ӧд воын «Парма гор» газетын. Повесьтъяс да висьтъясыс 2001-ӧд восянь йӧзӧдлӧмаӧсь «Войвыв кодзув» да «Чушканзі» журналъясын.

Медводдза «Винегрет» небӧгас пыртӧма 22 висьт да 2 повесьт. Роч вылӧ вуджӧдӧмӧн татшӧм жӧ нима небӧгыс петавлӧма 2017-ӧд воын. «Некытчö шогмытöм висьтъяс» небӧг петӧма 2015-ӧд воын.

Иван Ногиев некымынысь лоис вермысьӧн «Эзысь борд» республикаса литературнӧй конкурсын. Россияса гижысь котырын 2014-ӧд восянь.

Сiйöс тöдöны серамбана гижӧдъяс серти, но эм уджъяс, кӧні автор пекткӧдлӧ курыд олӧмсӧ, лыддигӧн весиг-тӧ сьӧлӧмыд нормӧ. Татшöмöн лоö «Менам пиукыс, менам…» повесьт, кодöс йöзöдöмаöсь кöч тöлысся Войвыв кодзув журналын.

Сиктса гозъя Гриша Микöл да Петыр Наста олicны тыр-бура. Совхоз киссигöн гозъя мукöд войтырыскöд тшöтш кык во на уджалiсны, кöть удждон эз нин аддзывлыны, век надейтчисны олöм ладмöм вылö. Но лачаыс налöн эз збыльмы, ыджыд да ён совхоз вочасöн руз-пазмунi. Николай да Наста петicны пенсия вылö.

Гозъя чужтiсны-быдтicны анделъяс кодь кык мича нылöс да öти пиöс. Денис пи  вöлi дыр виччысяна да та вöсна медся радейтана кагаöн. Зон ичöтдырсяньыс пöтмöныс радейтлiс Светланаöс. Но ныв мыйлакö веськодя видзöдлiс сы вылö, школа помалöм бöрын недыр колльöдчис Володькöд да сысянь вайис чурка нылöс. Та вылö видзöдтöг армияысь воöм Денис дась вöлi öтлаасьны Светакöд, но ныв ыштiс Пасаёльысь зарни погона опичер вылö да шуньгис сыкöд ылö-ылö. Но сэнi мыйкö налöн абу гöрдзасьöма и ныв локтiс бöр мам дорас.

Денис гöгöрвоис, нинöм вöтлысьны мичаяс бöрся. Öтчыд колльöдic Маша Турьеваöс горт дорöдзыс да и вöзйис öтлаасьны. Кыдзи и быд семьяын, том йöзлöн олöм мытшöдъястöг эз мун. Света быд ногыс сюйсьыс Маша да Денис семья пытшкö. Медыджыд лёкторнас лои, мый Света суклялiс нылöс верöсыслы пöрйöдчöмын. Мыйтшöдъяс пыр мунöмöн, том гозъялöн ставыс лои бур.

Ёртъяс, лыддьысьöй миянкöд öтшöтш, радейтöй чужан кыв. Коми гижысьяслöн небöгъяс вылас быдмис и быдмас на вель уна морт. Став бурсö ставныслы!

Выль петасъясöн позьö тöдмасьны Национальнöй библиотекаын, небöгъяс сiдзжö верманныд босьтлыны гортö лыддьöм вылö.

• #Лыддьысям комиöн
• #Читаем по-коми