04 апреля 2019
Лыддьысям комиöн (Читаем по-коми)
2019-öд во. 43-öд петасъяс
"Лыддьысям комиöн" 43-öд петасын вӧзъям тöдмасьны "Еджыд эрдъяса му вылын" кывбура öктöдöн да Нина Обрезковалöн творчествоöн.
| Еджыд эрдъяса му вылын = На земле белых снегов / [лöсьöдiс Бутырева Г. В.] - Сыктывкар : [Кола], 2018. - 95 лист бок : фотосерпасъяс. |
"Коми небöг" – республикаса праздник. Ciйö мунö быд во Удора чужанiнын. Тайö гажсö лöсьöдiсны кывбура гижысьяс Альберт Ванеев да Юрий Васютов, кодъяс чужлiсны да быдмисны Удора районын.
Быд праздник йитчöма тöдчана паскöд. Тайö вермас лоны республикалöн, районлöн, сиктлöн либö гижысьяслöн юбилей.
Паныдасьлöмъяс овлöны коми гижысьяскöд, йöзкöд, кодъяс ыджыд пай пуктöны Коми муö. Гажöдöны йöзсö сьылысьяс да йöктысьяс. Выставка вылын позьö аддзыны мастер йöзлысь киподтуя вöчöмтор, коми сёян-юан, а сiдз жö ньöбны коми гижысьяслысь кырымпаса небöг.
"Коми небöг" праздник дырйи сетöны Альберт Ванеев нима премия. Татшöм козьналöмсö эскöдiсны 2014 воын.
Коми Республикаса Национальнöй библиотекалöн ас му туялан да войтырсикас литература юкöдö воис выль небöг. Шусьö "Еджыд эрдъяса му вылын". Тайö Альберт Ванеев нима премияа лауреатъяслöн медводдза кывбурöн гижöм öктöд.
Сборникö пырöны гижысьяс : Галина Бутырева, Андрей Расторгуев, Евгений Козлов, Андрей Попов, Татьяна Канова, Елена Афанасьева, Александр Суворов, Елена Ельцова, Надежда Мирошниченко.
Поэзияыд – сiйö ловъя пу :
И кодкö дзоридз пыдди – туган йылас,
А кодкö варов корйöн шпоргö-кылö,
И сöмын пулысь вужсö личкö му.
Ме некымынысь тöдчöдны ог мудз,
Мый вояс вомöн локтicны ми дорöдз
Шань коми кывбуръяслöн кор и дзоридз,
Мый чöв олiгас найöс вердiс вуж.
Альберт Ванеев
"Поэзияыд - сiйö ловъя пу", кыдзи шуис Альберт Ванеев. А ловъя пуыд быдмö-сöвмö. Ми кутам водзö виччысьны кувбура гижысьяслысь уджъяс.
| "Кывбуръясын öзйö сись" : кывбуръяс / Нина Обрезкова // Войвыв кодзув. 2019. 2 №. 16-19 лист бокъяс. |
Обрезкова Нина Александровна чужис Удора районса Кослан сиктын. Эштöдic Сыктывкарса канму университет, филология коми юкöн.
Гижö кывбуръяс, висьтъяс да пьесаяс. Медводдза кывбурсö йöзöдöма "Войвыв кодзув" журналын 1985 воын. Петавлiсны небöгъяс "Ойдöмин", "Дзирыд дой", "Нинпу", "Сизим пыжа" да мукöд.
2007 воын Виктор Савин нима академическöй драма театр пуктiс "Асъя гöсьтя" пьеса серти спектакль. Кывбуръяссö вуджöдöма роч, белорус, финн, карел, эст, венгр , мокша да уна мукöд кывъяс вылö.
Нина Александровна – Эстонияса рöдвуж войтыр программа премияа лауреат, Коми Республикаса Правительстволöн премияа лауреат, Россияса гижысь котырö пырысь.
"Войвыв кодзув" журнал 2019 вося 2-öд номерын йöзöдöма Нина Обрезковалысь кывбуръяссö.
Нина Александровна аслас кывбуръясын петкöдлö ас чужан му, челядьдырся кад, морт олöмын вежсьöмъяс.
Тайö ыбъяссö тальлiсны вöвъяс да челядь.
Тайö челядьнас кодыркö вöлi и ме.
Но а вöвъяснас сэки нин вöлiны вöвъяс –
Кöнöсь вöвъясыс? Кöнi ме?
Тöдмасим талун коми поэзиякöд, кодлöн доныс талун кежлö оз чин. Кывбуръяс уна рöмаöсь, гижысь вермö ворсны кывъясöн, чуймöдны, а лыддьысьыс нимкодясьö, эскö коми кывлы да коми поэзиялы.
Ми лоам зэв радöсь, кутанныд кö и водзö тöдмасьны миян "Лыддьысям комиöн" петасъясöн да пыравлыны Национальнöй библиотекаö! Виччысям!
