25 февраля 2019
Лыддьысям комиöн (Читаем по-коми)
Пыдди пуктана коми войтыр!
Коми Республикаса Национальнöй библиотекалöн ас му туялан да войтырсикас литература юкöдö быд тöлысь воöны выль небöгъяс, кытысь позьö гумовтны уна пöлöс юöр. На пиын и коми кыв вылын художествоа гижöдъяс.
Выль петасъясöн позьö тöдмасьны "Лыддьысям комиöн" листбокын да кывзыны "Коми гор" радио пыр. Библиотекаысь книгаяс тi верманныд босьтлыны гортö лыддьöм вылö.
Лыддьысьöй миянкöд öтшöтш, лыддьысьöй комиöн!
2019-öд во. 42-öд петасъяс
Алексей Попов (сійӧ жӧ Висер Ӧль) Коми Республикаса нимйöза гижысь, комиӧдчысь. Матиас Кастрен обществолöн стипендиат (Финляндия). Коми Республикаса Государственнöй премияа лауреат, Коми Республика да Россия Федерация культураын заслуженнöй уджалысь. Пасйöма Виктор Розовлöн "За вклад в Отечественную культуру" медальöн. Пырö Россияса гижысь котырö.
Чужис 1950-öд вося юль 25-öд лунö Кöрткерöс районса Ыджыдвидз сиктын. Уджавлiс газетъясын: "Звезда" (Кöртерöс район), "Вперёд" (Усть-Вым район), "Югыд туй"; "Чушканзi" да "Войвыв кодзув" журнал редакцияясын, драмтеатрын. Öнi – "Би кинь" журналын шöр редактор.
Алексей Поповлöн петавлiсны торъя небöгъяс: "Олӧм олысьяс" (1990), "Мыйсяма йӧз" (1994), "Чудь мыльк" (2001), "Туналӧм ордым" (2002), "Мывкыд парма" (2011), "Олöм войтъяс" (2018) да мукöд.
| Ермолин : пьеса на коми и русском языках / Алексей Попов. – Сыктывкар, 2018 (Коми республиканская типография). – 78, [1] лист бок : фот. |
И со нöшта выль петас – комиöн да рочöн «Ермолин» нима пьеса. Танi висьтавсьö заслуженнöй артист, коми драматург да нималана общественнöй деятель Степан Иванович Ермолинлöн олан туй йылысь. Пьесасö гижигöн автор вöдитчöма сылöн дневникъясöн, рöдвуж, уджъёрт да видзöдысьяслöн казьтылöмъясöн. А небöгсö лэдзны сьöмсö сетöма Степан Ермолинлöн Владимир пиыс. Книгаас эм водзкыв, кодöс гижис Алексей Попов, фотояс.
Сiдзжö видзöд С. Ермолинлöн гижöдъяс:
Öтувтöм краеведческöй каталогысь
| Эзысь ёльяс : кывбуръяс, висьтъяс / лöсьöдiс Н. А. Обрезкова. – Сыктывкар, 2018 (Коми республиканская типография). – 126, [1] лист бок : фот. – Пер. загл.: Серебряный ручей. |
Нина Александровна Обрезкова – Россияса гижысь котырö пырысь, Коми Республикаса Правительстволöн премияа лауреат. Эстонияса рöдвуж войтыр программа премияа лауреат.
Чужис Удора районса Кослан сиктын. Помалiс Сыктывкарса канму университет. Уджалiс Коми наука шöринын, Россияса финн-йöгра шöринын да республикаса фольклор театрын, велöдiс коми да финн-йöгра литература Сыктывкарса канму университетын, вöлi корреспондентöн "Коми му" газетын да "Коми гор" радиоын, "Арт" журналын литература редакторöн.
Нина Обрезковалöн петавлiсны торъя небöгъяс: "Коркӧ ставыс лоӧ бур", "Ойдӧмин", "Дзирыд дой", "Вуджӧд менӧ, пыжанӧй", "Лэбачӧн вола", "Петук Васьӧ", "Нинпу", "Дивö козин", "Сизим пыжа".
Сылысь кывбуръяссö вуджöдöма эст, финн, венгр, удмурт, мордва, мари, англия, француз, немеч, роч, болгара кывъяс вылö. Нина Александровна ачыс вуджöдö финн-йöгра да роч кывбур тэчысьяслысь гижöдъяссö коми кыв вылö. Виттор Савина нима академическöй драмаа театр пуктiс сылысь «Асъя гӧсьтя» пьеса серти спектакль.
"Эзысь ёльяс" нима выль сборник вöзйис лэдзны Сыктывкарысь Удораса землячество да сылöн юрнуöдысь С.Ю. Говорухина. Öти кышöд улын сетöма и гижысьяслöн Союзö пырысьясöс, и найöс, кодъяс эзысь ёльяс моз юктöдöны Чужан мусö да ыджыд литературасö. Татчö пыртöма кывбуръяс да висьтъяс, Удораса 16 гижысьлысь. Тайö Евгения Абибулаева, Пётр Бушенев, Анастасия Бушенева, Татьяна Бушенева, Любовь Ванеева, Михаил Васютов, Алексей Вурдов, Светлана Говорухина, Антонина Гордеева, Галина Ивкучева, Надежда Логинова, Нина Обрезкова, Альбина Селиванова, Надежда Христова, Юрий Яковлев.
Ми лоам зэв радöсь, кутанныд кö и водзö тöдмасьны миян "Лыддьысям комиöн" петасъясöн да пыравлыны Национальнöй библиотекаö! Виччысям!
