17 января 2019
Михаил Лебедевлӧн кык кывъя «Кӧрт айка»
Тӧвшӧр 15 лунӧ Коми Республикаса войтырсикас небӧгаинын нимӧдісны Михаил Лебедевлысь «Кӧрт айка» кывбура мойд. Небӧгыс петіс колян во помын, лэдзис Коми Юралысьлӧн администрацияӧн сетӧм сьӧм вылӧ «Анбур» йӧзӧдчанін.
Небӧгыс – кык кывъя. Медводдзаысь комиӧн кывбура мойдыс петавліс 1929 воӧ, а рочнас талунӧдз сӧмын ӧтычыдысь - 1939 воӧ.
Дасьтіс небӧгсӧ коми литература туялысь Валентина Лимерова. Валентина Александровна пасйис, мый коми да роч гижӧдъясыс ӧти кышӧд улын паныдасьӧны дзик на первойысь. Туялысь висьтыштіс М.Лебедевлӧн гижӧда удж йылысь да тӧдчӧдіс, мый мойдыс абу коми вылысь роч вылӧ вуджӧдӧм, а кык асшӧр гижӧд, кодъяс зэв топыда йитчӧмаӧсь.
Небӧгыс сиӧма шӧр арлыда челядьлы лыддьӧм вылӧ, тайӧ мойдсӧ велӧдӧны школаын. Бур, мый ӧні сыӧн вермасны тӧдмасьны оз сӧмын коми челядь, но и роч кывъя зонпосни.
Михаил Лебедевлӧн тайӧ да мукӧд небӧгӧн позьӧ тӧдмасьны миян лыддьысянінын, а сідзжӧ ӧткымын гижӧд пыртӧма ӧтуввезйӧ.
