06 декабря 2018
Лыддьысям комиöн (Читаем по-коми)
Пыдди пуктана коми войтыр!
Коми Республикаса Национальнöй библиотекалöн ас му туялан да войтырсикас литература юкöдö быд тöлысь воöны выль небöгъяс, кытысь позьö гумовтны уна пöлöс юöр. На пиын и коми кыв вылын художествоа гижöдъяс.
Выль петасъясöн позьö тöдмасьны "Лыддьысям комиöн" листбокын да кывзыны "Коми гор" радио пыр. Библиотекаысь книгаяс тi верманныд босьтлыны гортö лыддьöм вылö.
Лыддьысьöй миянкöд öтшöтш, лыддьысьöй комиöн!
2018-öд во. 40-öд петасъяс
| Йöг каллян / Виктор Напалков. – Сыктывкар : Анбур, 2018. – 414, [2] лист бок. |
80 арöс тыртiс Кулöмдiн районса почётнöй гражданин Виктор Егорович Напалков. Ассьыс олöмсö йитӧма коми журналистика да литературакӧд. Авторлöн зэв озыр творческöй туйыс. Повестьяс, романъяс, кывбуръяс, публицистика – ставыс тайö лöсялö авторлы.
Виктор Егоровичлöн 2018 воын петiс выль небöг "Йöг каллян". Сэтчö пырисны "Йöг каллян" роман, повестьяс "Кöин да Виктория", "Прöстит, Антусь" да кывбуръяс.
"Йöг каллян" романын медшöр геройыс – Викентий Григорьевич Кузнецов, пенсионер, гижысь, водзын журналиставлöма. Пенсия вылö петöм бöрся локтiс овны аслас чужан сиктö.
Романыс дзоньнас артмöма шöр геройлöн казьтылöмъясысь. Казьтывлö дзолядырся кад, батьтöг быдмöм, война бöрся Коми муын вежсьöмъяс, радейтана нылöс аддзöм, журналистикаын да литератураын медводдза воськовъяс.
Виктор Егорович Напалков шымыртö аслас гижöдъясын радейтчöм тема. Тайö ми аддзам и романын "Йöг калян" и сiдз же повестьясын "Кöин да Вероника", "Прöстит, Аньтусьöй". Повестьяс матынöсь ас костаныс. Кыкнан гижöдын ныла-зонма костын радейтчöм. Но, мыйтшöдъяс понда том йöз гудрасьöны-олöны. Повестьяс эштöны кыдзи бур мойдъяс, радейтчöм вермö, ставыс сувтö ас инас.
Выль небöгсö Виктор Егорович помалö чужан му, олöм, радейтчöм йылысь кывбуръясöн.
| Алисакöд Шемöсмуын Лоöмторъяс : Alice's Adventures in Wonderland in Komi-Zyrian / Льюис Кэрролл ; [вуджöдöма англия кыв вылысь: Н. М. Демурова] ; серпасалысьыс: Джон Тенниел ; комиöдысьыс: Евгений Цыпанов ; кывбуръяс комиöдысьыс: Елена Ельцова. - [Великобритания] : Evertype, 2018. - 128 лист бок. |
Ставöн ми радейтам мойдъяс, торъя нин челядь. Быдöнлы тöдса "Алиса в стране чудес" небöг. Англияса гижысь Льюис Кэрролл нималö мир пасьтала. Алиса ныв йылысь позьö лыддьыны да весиг телевизор пыр видзöдны. Мойдсö вуджöдöма кык сё кыв вылö.
И со миян водзын тайö нималана небöгыс медводдзаысь коми кыв вылын. Текст комиöдiс Евгений Цыпанов, кывбуръяс комиöдiс Елена Ельцова. Выль небöг шусьö "Алисакöд Шемöсмуын лоöмторъяс". Вуджöдысь гижö "Сэтчö серпасалöм бур сьöлöма Алиса нывка лоас выльторйöн став коми челядьлы, öд быдöн радейтö висьтавны вöтасьöмторъяс йылысь, найö тшöкыда овлöны гажаöсь, тшöкыдджыка шуштöмöсь, весиг повзьöдчанаöсь, но век ас дорас кысканаöсь. Коми челядь литератураысь тайö небöгыс ёна торъялö аслас фантастиканас, сёрниясас паныдасьлан джöмдöмъясöн, тешкодьторъясöн, пытшкöса иронияöн….".
Мойд лыддьöм бöрся и збыль син водзын воссьö Шемöсму да сэтöн олысьясыс. Тайö еджыд Гортсакöч, Чешырса кань, Шляпабала, Герцогань, Король, Королева да уна мукöд. Ачыд Алисакöд быттьö лоöмторъясас веськалан. Артмö, мый нывкöд пытшкöсса сьöлöм- кылöмъясным öтлаасьö. Кöнкö öтшöтш повзылан, кöнкö и нюмыд петас.
Чайта, Алиса йылысь лоöмторъяс лыддясны челядь и верстьö йöз, кодi тöдö и косйö тöдны коми кыв.
Ми лоам зэв радöсь, кутанныд кö и водзö тöдмасьны миян "Лыддьысям комиöн" петасъясöн да пыравлыны Национальнöй библиотекаö! Виччысям!
