12+.png
Главная О библиотеке Поиск в электронных каталогах Региональный центр Президентской библиотеки Краеведение в Коми Национальная электронная библиотека КИБО Доступная среда
Рейтинг@Mail.ru
Яндекс.Метрика
 »  »

Лыддьысям комиöн. 2017-öд во. 33-36-öд петасъяс

 

33-öд петас

34-öд петас

35-öд петас

36-öд петас

36-öд петас

Огнев Леонид Степанович. Моя жизнь – моя радость. Сыктывкар, 2017.JPGОгнев Леонид Степанович. Менам олöм – менам гаж = Моя жизнь – моя радость / Огнев Леонид Степанович ; [лöсьöдic Огнев В. С.]. - Сыктывкар, 2017. – 526, [2] лист бок : фот., портр. - На коми, рус. яз.

Леонид Степанович Огнев – велöдысь, журналист, гижысь. Чужлiс 1932 вося апрель 17-öд лунö Емдiн районса Айкатыла сиктын. Таво сылы тырис эськö 85 арöс. Кувсис гижысь 1991 воын.

Коми пединститут помалöм бöрын дас вит во велöдiс Изьва районса Кельчиюр школаын математика да физика. Сэсся локтiс овны Айкатылаö. Уджалiс «Вперёд» нима район газетын корреспондентöн, веськöдлiс видз-му овмöс юкöнöн, вöлi кывкутысь секретарöн.

Леонид Степанович тшöкыда йöзöдчылiс газетъясын, «Войвыв кодзув» да «Чушканзi» журналъясын. Леонид Огнёвлöн петавлiсны торъя петасъяс: «Татчö быдмасны дзоридзъяс» повесьтъяса небöг ; «Нюм» да «Пöсь кöлöбъяс» нима небöгъясын – теш да гажа висьтъяс.

Леонид Огнёвлысь сатира да серамбана висьтъяссö йöзöдлiсны сiдзжö «Гажа сёрни» да «Ковтöм петасъяс» нима сборникъяс.

И со нöшта выль книга, кодöс дасьтiс Вячеслав Степанович Огнёв «Леонид Огнёв. Менам олöм – менам гаж» = «Моя жизнь – моя радость». Вячеслав Огнёв тайö книгасö сиис вокыслы 85 арöс тырöмкöд йитöдын. Небöгыс öтувтö Леонид Огнёвлысь нелямын воöн гижöм медбур гижöдъяссö: повесьтъяс, пьесаяс, висьтъяс, фельетонъяс, статьяяс, мойдъяс, кывбуръяс, казьтылöмъяс, фельетонъяс, уджвывса водзмöстчысьяс да ай му дорйысьяс йылысь гижöдъяс, вöр-ва йылысь висьтъяс. Гижöдъясысыс абу сöмын комиöн, эмöсь и роч кыв вылын.

Водзкывсö гижöма «Вперёд» нима район газетын вöвлöм редактор Тамара Костромина. Книга вылас сетöма кык рецензия, кодъясöс гижисны Алексей Одинцов да Алексей Попов, Россияса гижысь котырö пырысьяс. Эм танi Геннадий Беляевлöн Леонид Огнёв йылысь казьтылöмъяса кык статья. Öтиыс на пиысь – «Никон бурдöдiс» – висьталö Леонид Огнёв да нималана краевед Никон Хатанзейский йылысь.

Лыддьысьысь аддзас сiдзжö «Менам олöм – менам гаж» книгаысь Выль волы сиöм фельетонъяс, мойдъяс да весиг Леонид Огневöн вöчöм карикатураяс, сылöн дневникысь кутшöмсюрö пасйöдъяс, семейнöй архивысь фотояс да весиг кывбуръяс.

Леонид Огневлöн висьтъясыс зэв гажаöсь. Сералан сьöлöмсяньыд, кор лыддян «Турипув вылö ковёр», «Жаритöм порсьпи», «Медводдза окыштчöм», «Ладмисны», «Шоныд гараж», «Пöсь кöлöбъяс» да с.в. Шуам,

И сiдз, тöдмасьöй выль небöгöн – «Леонид Огнев. Менам олöм – менам гаж».

1орнамент.jpg1орнамент.jpg1орнамент.jpg

Баженова О. Н. Ме велöдча радейтны выльысь : кывбуръяс / Ольга Баженова. – Сыктывкар, 2016. – 64 лист бок. – Перевод заглавия : Я заново учусь любить.Баженова Ольга Николаевна. Ме велöдча радейтны выльысь : кывбуръяс / Ольга Баженова. – Сыктывкар, 2016. – 64 лист бок. – Перевод заглавия : Я заново учусь любить.

Ольга Баженова чужис 1992-öд воын Емдiн районса Кӧжмудор сиктын. Сизимöд классöдз велöдчис Туискерöсса школаын, сэсся помалiс Сыктывкарын Юрий Спиридонов нима Коми Республикаса Юралысь бердын искусствояс гимназия да Сыктывкарса канму университет.

Ольга Баженова – Коми Республикаса «Эзысь борд» литературнӧй конкурсын вермысь. Пырö Россияса гижысь котырö.

Уджаліс Коми шылада драма театрын, велӧдіс Коми искусство гимназияын, зiлис Кыв технология сӧвмӧдан шӧринын.

Унджыксӧ гижӧ кывбуръяс. Ассьыс гижӧдъяссӧ йӧзӧдліс «Войвыв кодзув» да «Арт» журналъясын, «Медводдза муслун» сборникын. 2012-öд воын сылöн петiс «Шондіа ю» медводдза кывбура небöг.

Неважöн енбиа автор пыралiс миянö да козьналiс Национальнöй библиотекалы «Ме велöдча радейтны выльысь» (2016) ассьыс 10 небöг. Таысь ми, Национальнöй библиотекаса уджалысьяс, висьталам Ольга Николаевналы ыджыд аттьö. «Ме велöдча радейтны выльысь» небöг лэдзöм вылö сьöмсö вичмöдöма Эстонияса Национальнöй Культура Фонд. Водзкывсö гижöма Анжелика Елфимова. Со кыдзи сiйö гижö уджъёрт йывсьыыс: «Олялöн абу серпаса кывбуръяс. Быд стрöка, быд кыв – тайö том нывлöн философия. А философия – тайö асьтö корсьöм, гöгöрвоöм. Поэтöс гöгöрвоиг, лыддьысьысь и асьсö сэтысь гöгöрвоö…».

Кывбуръяссö сборникас юкöма кык цикл вылö: «Сöмын колö – сувтлынытö кужны…» да «Ме велöдча радейтны выльысь…». «Сöмын колö – сувтлынытö кужны…» циклö пырисны «Ме тэрмаси…», «Котыр», «Зэр», «Каин», «Эжва ю» да мукöд кывбур. «Ме велöдча радейтны выльысь…» юкöнö сетöма татшöм кывбуръяс, кыдзи: «Öти луныд – абу кызь нёль час», «Куим лун, а быттьö куим нэм», «Позьö, тэнад вичкоö ме пыра?», «Тöдан, быдторлы – аслас кад…», «Тэкöд лолавны – зэв ыджыд шуд» да с.в. 

И сiдз, корам тöдмасьны Ольга Баженовалöн «Ме велöдча радейтны выльысь…» нима выль небöгöн.

1орнамент.jpg1орнамент.jpg1орнамент.jpg

Афанасьева Е. Е. «Став кывйыс йитчас - мöвпсö нуигсор» : кывбуръяс / Елена Афанасьева // Войвыв кодзув. 2017. 7 №. 3-4 лист бокъяс. Перевод заглавия : Слова сольются, мысли донося : стихи.Афанасьева Елена Евгеньевна. «Став кывйыс йитчас - мöвпсö нуигсор» : кывбуръяс / Елена Афанасьева // Войвыв кодзув. 2017. 7 №. 3-4 лист бокъяс. Перевод заглавия : Слова сольются, мысли донося : стихи.

Елена Афанасьева чужис 1967 вося ноябр 14-öд лунö Удора районса Важгорт сиктын. Помалiс Сыктывкарса государственнöй университетын филология факультет. Пырö Россияса гижысь котырö. Öнi уджалö сэнi литературнöй консультантöн.

Гижö кывбуръяс да проза. Йöзöдчö «Искра» да «Йöлöга» газетъясын, «Арт», «Би кинь», «Войвыв кодзув», «Чужан кыв», «Наш современник», «Дон», «Юность» журналъясын ; «Белый бор» альманахын да татшöм öтувъя сборникъясын, кыдзи: «Удора, Удора кык мича ю дорын», «Сьöлöмшöрöй менам, Удора», «Пöлöзнича пöвстын».

Эм Елена Афанасьевалöн «Лэбачöс ки помысь вердi», «Енкöлаö ыбöс», «Каленик-лэбач», «Ву», «Эжöр-вежöр», «Мöвпалан визьяс», «Дуда Платтьöа» нима асшöр небöгъяс.

2017-öд вося «Войвыв кодзув» журналлöн 7-öд номерын йöзöдöма Елена Афанасьевалысь «Став кывйыс йитчас - мöвпсö нуигсор» кывбура цикл, кытчö пырисны «Струба», «Сус пуяс» да «Кык муслун» куим кывбур.

Поэтлöн гижöдъясысь позьö аддзыны татшöм образъяс, кыдзи «нитшкассьöм струба», «чöдъя рас», «еджыд лэбач», «яг шöрö киссьöм синва», «синва кокалысь пöтка», «висьысь сус пуяс», «сьöлöм пыдöсöдз лэдзöм кöв», «ловтыра кывйын олысь мöвп» да с. в. Тэчöм образъяс пыр автор петкöдлö дой, радлун да позянлун, кывнас вермö эрдöдны сайöдöмасö да восьтны локтан кадсö.

И сiдз, корам тöдмасьны 2017-öд вося «Войвыв кодзув» журналлöн 7-öд номерöн, кöнi йöзöдöма Елена Афанасьевалысь «Став кывйыс йитчас – мöвпсö нуигсор» кывбура цикл.

35-öд петас

Войвыв кодзув. № 1 2017.jpgШебырев Александр Васильевич. «Соня» ; «Страшнöй четверг» : висьтъяс / Александр Шебырев // Войвыв кодзув. 2017. 1 №. 38-48 лист бокъяс. Пер. загл.: «Соня» ; «Страшнöй четверг» : рассказы.

Александр Васильевич Шебырев чужис 1960-öд воын Кулöмдін районса Пожöг сиктын. Помалiс Сыктывкарса каналан университет. Уджавліс «Пожег» совхозын экономистöн, Кулöмдін райкомын первой секретарöн, «Парма гор» газетын корреспондентöн да редакторöс вежысьöн. Пырö Россияса гижысь котырö. 

Олö Кулöмдін районса Помöсдін сиктын, веськöдлö школаса ас му туялан да Тима Веньлы сиöм музейясöн, «Петас» литература котырöн. 

Александр Шебыревлöн эм «Олöм туйті» кывбуръяса асшöр небöг. Сылöн кывбуръяс серти лöсьöдöма уна сьыланкыв. 

Гижöдъяссö йöзöдö газет-журналъясын да öтувъя небöгъясын. 2017-öд вося «Войвыв кодзув» журналлöн медводдза номерö сетöма А. Шебыревлысь «Соня» да «Страшнöй четверг» висьтъяс.

«Соня» висьтын шöр герой - Семён, квайтымын арöса мужик, олö Важдiн грездын. Сылöн висьмис вöркйыс, да локтiс карса диагностика шöринö. Эз на удит восьтны öдзöссö, кыдзи кырнышъяс моз уськöдчисны чиганъяс, куим баба да арава челядь. Кутiсны корны гадайтны, а кор друг вошисны, Семён казялiс восьса сумкасö, документ да сьöм вошöмсö. Пуксис да шогö уси. Сы дорö матыстчис арлыда нин чиганка, комиöн кутiс висьтавны сы йылысь ставсö. А кытысь чиганкалы татшöм стöч юöрыс, шензьö Семён? Воссяс ставыс, лыддянныд кö помöдз «Соня» нима висьтсö. 

Нöшта танi йöзöдöма Александр Шебыревлысь «Страшнöй четверг» нима мöд висьт. Тайö гижöдас нин шöр геройнас лоö 32 арöса том морт, кодöс шуöны Даниллöн. Сiйö тошсялöма, гырд синъяса, бара на ёнакодь юöм бöрын юрыс дувгö. Коркö сылöн вöлi семья, гöтыр да кык челядь, но сетчис тай юöм улö, да гöгыльтчис олöмыс Даниллöн гöра горув. А кыдзи артмисны олöмъясныс геройяслöн, тöдмаланныд «Страшнöй четверг» нима висьтысь. 

Сiдзжö видзöд А. В. Шебыревлысь гижöдъяс:

- Сводный краеведческий каталог

1орнамент.jpg1орнамент.jpg1орнамент.jpg

Плоскова Мария Алексеевна. Вит вок да гыма вояс / Мария Алексеевна Плоскова. – [Сыктывкар], 2017. - [10] лист бок : фот. Пер. загл.: Пятеро братьев и грозовые годы.Плоскова Мария Алексеевна. Вит вок да гыма вояс / Мария Алексеевна Плоскова. – [Сыктывкар], 2017. - [10] лист бок : фот. Пер. загл.: Пятеро братьев и грозовые годы. 

Мария Алексеевна Плоскова – коми кыв велöдысь, Россияса журналист котырö пырысь, Россияса Федерациялöн тöдöмлунъяс сетöм кузя отличник, пырö велöдчысьяслы учебникъяс дасьтан котырö. 

Чужис Кулöмдін районса Улыс Воч сиктын. Помалiс Сыктывкарса каналан университет, велöдіс школаясын. 12-öд номера школаын уджалігöн сылöн класс подув вылын вöлі котыртöма Коми национальнöй гимназия.

Мария Алексеевна тшöкыда йöзöдчö газет-журналъясын. Дасьтіс диск вылын «Ордым» нима мультимедийнöй велöдчан пособие. Вуджöдiс коми-перым гижысь Василий Климовлысь «Гавкалöн палич» нима небöг коми кыв вылö.

И со Мария Плосковалöн петiс «Вит вок да гыма вояс» нима выль небöг, муртса на книгалэдзанiнысь. Мария Алексеевна козьналiс ассьыс петассö Национальнöй библиотекалы, кодöс сиис Октябр революциясянь 100 во тырöмкöд йитöдын. Небöгас висьтавсьö Кочанов семья йылысь. Вит вок мунiсны куим война пыр: Империалистическöй, Гражданскöй да Великöй Отечественнöй. Авторыс сувтыштлö быд вок йылысь торйöн, ставныслöн эм фото. Тайö Андрей, Алексей, Василий, Сергей да Тимофей Кочановъяс.

34-öд петас

Войвыв кодзув 2017 №4.jpgБабин Вячеслав Леонидович. «Тадзи öтнамöн и койта…» : кывбуръяс / Вячеслав Бабин // Войвыв кодзув. 2017. 4 №. 3-7 лист бокъяс. Пер. загл.: Так и брожу один… : стихи.

Вячеслав Бабин чужис Кулöмдін районса Немдін сиктын. Помаліс шöр школа да Москваса Горький нима литературнöй институт. Уджалiс совхозын механизаторöн, вöлі культура керкаса директорöн, сэсся зiлис Кулöмдін районса «Парма гор» газетын да районса радио вылын. Россияса гижысь котырö пырысь.

Вячеслав Леонидович гижö школасяньыс. Сылöн бура артмöны кывбуръяс да проза. Гижöдъясыс петалiсны «Сьöлöмшöр» (1989), «Öктö Коля коляоз» (1993), «Вуджöр» (1995), «Вöрса качай» (2003) нима кывбура небöгъясын. Вячеслав Бабинлысь кывбуръяссö позьö лыддьыны «Парма гор», «Ковтöм петасъяс», «Пöлöзнича пöвстын» нима гижöд чукöръясысь, «Коми челядьлы антологияысь», республикаса газет-журналъясысь. Эмöсь сьыланкыв чукöръяс, кодъясöс позьö кывзыны «Во гöгöр», «Сьылыштам, дзолюк!», «Кывзыштам öтвыв» электрона дискъяс вылысь.

2017-öд вося «Войвыв кодзув» журналлöн нёльöд номер йöзöдiс Вячеслав Бабинлысь «Тадзи öтнамöн и койта…» выль кывбура цикл. Татчö пырис 11 кывбур: «Чужанiн», «Кöнi тэ?», «Мич», «Водзлань», «Аснырöн», «Рöк», «Вöт», «Эскöм», «Шоныд му», «Мыж» да «Аддзысьöм». Аслас кывбуръясын автор висьталö Коми му йылысь, сиктса олöм да сэтчöс йöз йылысь, вöр-ва мич йылысь, казьтылö бать-мамсö да с.в. 

Чужанiн

Бать-мам керка эновтi

Збойöн-томöн.

Чужанiнöс гежмалi

Помсянь помöдз:

Изьва вож и Удора,

Сыктыв, Висер,

Уквавом и Лузаберд —

Туйвыв висьöм.

Воркута, Печора да,

Емдiн вöлöк...

Коми мутö гöгöртны

Сьöкыд вöлöм.

Ок и ыджыд-паськыд жö

Чужанiнöй.

Но век туйсö аддзывлi

Кулöмдiнö.

Сiдзжö видзöд В. Л. Бабинлысь небöгъяс:

- Сводный краеведческий каталог

1орнамент.jpg1орнамент.jpg1орнамент.jpg

Войвыв кодзув 2016 № 9.jpgГабова Елена Васильевна. «Шуда-шуда морт» / Елена Габова ; комиöдiс Иван Кичигин // Войвыв кодзув. 2016. 9 №. 69-80 лист бокъяс. Пер. загл.: Счастливый человек.

Елена Габова (Столповская) – Коми йöзкостса нималана гижысь. Россияса гижысь котырö пырысь. Коми Республикаса Правительстволöн Иван Куратов нима премияа лауреат. Коми Республика да Россия Федерация культураын пыдди пуктана уджалысь. В. Крапивин да А. Толстой нима войтыркост литература премияа лауреат, «Заветная мечта» челядьлы урчитöм национальнöй премия босьтöмын финалö петысь. «Добрая лира» литература конкурсын дипломант.

Елена Васильевна помалiс Ставсо­юзса кинематография институт (ВГИК). Уджалiс уна сикас газетын, Петрозаводскса пединститутын, Джезказганса телевидениеын. Вöлi Коми Республикаса гижысь котырын литератураысь консультантöн. Öнi гижö гортас.

Гижö челядьлы да зонпоснилы рочöн. Сылöн «Гришуня на планете лохматиков» повесьт-мойд да «Двойка по поведению» висьт пырисны 5-öд класса школаса хрестоматияö. Елена Габова рочöдiс коми гижысьяслысь некымын небöг: Елена Козловалысь, Геннадий Юшковлысь, Андрей Поповлысь, Владимир Тиминлысь.

Сылысь уджъяссö вуджöдöма англия, немеч, венгр, япон, норвегия, финн, Россияын олысь йöзлöн кывъяс вылö. Елена Васильевналысь гижöдъяссö позьö лыддьыны сiдзжö комиöн.

2016-öд вося «Войвыв кодзув» журналлöн 9-öд номерын йöзöдöма «Шуда-шуда морт» нима висьт, кодöс комиöдiс Иван Кичигин. Рочнас тайö висьтыс шусьö «Сенокос для городских» (пырис Елена Габовалöн «Любовь на семи ветрах» книгаö). И сiдз, «Шуда-шуда морт» нима висьт. Турун пуктысьяс дорö локтöны отсасьны карса вурсян фабрикаса уджалысьяс. Ставыс сё гöгöр морт. Водзвыв сёрнитчöмöн ставöн локтiсны квайт час асылын пристаньö, кысянь найöс катер вуджöдiс мöдар берегас турун пуктысь бригадаяс дорö. Женя, шöр герой, локтiс ю дорас сёрмöмöн нин, кор катерыс лэччис нин Эжва горув. Öтлаын уджалысьяс, Венька кындзи, ёна скöралiсны Женя вылö. Ставныс букыша видзöдлывлiсны сы вылö. А Женя куйлiс прицепын турун вылын да видзöдiс лöз-лöз енэжö. Венькалы ёна воис сьöлöм вылас тайö нылыс.

Сiдзжö видзöд Е. В. Габовалысь небöгъяс:

- Сводный краеведческий каталог 

- Национальная электронная библиотека Республики Коми

Сiдзжö кывзы Е. В. Габовалысь мойдъяс (рочöн):

- Авторский микрофон "Сказка на ночь в каждом доме" 

1орнамент.jpg1орнамент.jpg1орнамент.jpg

Втюрина Людмила Зарниевна. Дзоляньлöн дзольгöм : повести и стихотворения : [на коми и русском языках] / Зарни Люся. - Сыктывкар, 2016 (Коми респ. тип.). - 189 с., [1] л. портр. : ил.Втюрина Людмила Зарниевна. Дзоляньлöн дзольгöм : повести и стихотворения : [на коми и русском языках] / Зарни Люся. - Сыктывкар, 2016 (Коми респ. тип.). - 189 с., [1] л. портр. : ил.

Людмила Втюрина (Зарни Люся) чужис Изьва районса Кельчиюр сиктын. Уджалö челядьлöн Маршак нима Коми Республикаса Национальнöй библиотекаын. Кывбуръяссö йöзöдö республикаса газет-журналъясын, кывбур öктöдъясын да гижöд чукöръясын. Эмöсь торъя небöгъяс: «Шуд войт», «Шоныд дiяс», «Тöвся öшкамöшка», «Майбыр кад», «Олöмлы ода». 2016-öд воын петіс нöшта öти - «Дзоляньлöн дзольгöм» нима выль небöг. Татчö пырисны шöр да ыджыдджык арлыда челядьлы сиöм кывбуръяс да повесьтъяс. Гижöдъясыс луздор-летка да изьва сёрнисикасъяс вылын, коми да роч кывъясöн.

Книгаö пыртöма «Дзоляньлöн дзольгöм» повесьт, кодöс Людмила Втюрина сиöма мамыслы - Хозяинова (Лихачева) Елизавета Иосифовналы. Небöгыслы нимсö авторыс сетöма повесьтлöн «Дзоляньлöн дзольгöм» ним серти. Повесьтсö сетöма коми да роч кывйöн, рочöдöма ачыс Людмила Зарниевна. Тані висьтавсьö 1940-1970-öд воясö коми челядьлöн олöм йылысь. Автор тöдмöдö Лихачев рöдысь петöм Степан Ёгор Öсипкöд, Остаповскöй колхозысь бригадиркöд да сылöн Лиза нылыскöд, висьталö Лихачёв да Шулепов рöдъяс йылысь да Кулига грезд йылысь. Во мысти заводитчис война, фронт вылö нуисны Луздор районысь квайт сюрсысь на унджык мортöс. Джынйыс на пöвстысь, Лизалöн батьыс моз, эз бергöдчы гортас.

«Дзоляньлöн дзольгöм» небöгын эм «Менам шоныд дiяс» нима нöшта öти повесьт, кодöс автор сиöма батьыслы, Хозяинов Зарни Евдоксеевичлы. Танi Людмила Зарниевна казьтылö Изьва му вылын челядьдырся олöмсö, чужан сиктсö, Изьва юсö, Марфа бабсö. А медся лöсьыд кад – челядьдыр, кор нывъёртъяскöд ворслісны ывлаын да пöжавлісны лятиысь тяпышъяс, а тöвнас исласьлісны даддьöн да лыжöн.

«Дзоляньлöн дзольгöм» нима небöгö пырисны сiдзжö Людмила Втюриналӧн кывбуръяс: «Мада ывла выв», «Ыллаысь он ум», «Ловзьö чужанiн», «Шондiлöн козинъяс» да мукöд.

Сiдзжö видзöд Л. З. Втюриналысь небöгъяс:

- Сводный краеведческий каталог

33-öд петас

Ельцова Алена. Кодзула зэр.jpgЕльцова Е. В. Кодзула зэр : кывбуръяс, проза гижöдъяс, вуджöдöмъяс / Алёна Ельцова. - Сыктывкар : Коми республикаса гижысь котыр, 2016 (Коми респ. тип.). - 142, [1] лист бок : серпас. – Пер. загл. : Звездопад.

Алёна Ельцова чужис Кулöмдін сиктын. Помаліс Сыктывкарса искусство гимназия да канму университетса финн-йöгра факультет. Сэсся велöдчис Мöскваса Горький нима литература институтын да Коми наука шöринса аспирантураын. Сiйö дыр кад чöж туялiс Тима Веньлысь ритма проза, дорйис сылы сиöм диссертация. Уджалö Коми наука шöринса Кыв, литература да история институтын, туялö коми литература. Олö Сыктывкарын. Пырö Россияса гижысь котырö.

Алёна Ельцовалысь кывбуръяссö вуджöдӧма роч, финн, эст, англия, венгр, мари, мордва, узбек кывъяс вылö. Нӧшта Алена Ельцова вуджӧдӧ роч да финн-йöгра гижöдъяс.

А. Ельцовалöн петавлiсны нин «Кассяна во» (1997), «Аскиа лун водзын» (2001), «Асъя зэр» (2007), «Кадлöн воськовъяс» (2010) асшöр кывбурчукöръяс.

«Кодзула зэр» (2016) нима выль небöгö пырисны кывбуръяс, проза гижöд, вуджöдöмъяс. Наталья Горинова, коми литература туялысь да книгаö водзкыв гижысь, тöдчöдö, мый ань ёна радейтö зэрлысь образ. Буситысь зэр петкöдлö нывбабалысь майшасьöм да сьöлöм дойсö. Алёна Ельцова тшöкыда вöдитчö ловтöмсö ловзьöдысь приёмöн. Шуам, «ар ветлöдлö туй кузя кöмтöг», «вугралö вöр», «ылi туйö петö тöв», «варов пу сьылö», «мыссьöны шоныд зэр ваöн ю да вöр» да с.в.

Небöгын нёль юкöн: «Му выв кад», «Эзысьöн дзирдалысь войтъяс», «Сöмын вои ме тайö муас…». «Ожидание дождя» нима нёльöд юкöнö пырисны Алёна Ельцовалöн рочöдöм кывбуръяс. Найöс вуджöдiсны роч кыв вылö Нелли Бибяева, Игорь Вавилов, Нина Веселова, Сергей Журавлёв, Татьяна Канова, Андрей Попов да Владимир Цивунин.

1орнамент.jpg1орнамент.jpg1орнамент.jpg

Лодыгин Василий. Габовсаяс.jpgЛодыгин В. Г. Габовсаяс: туялöмъяс, казьтылöмъяс, очеркъяс, поэма, кывбуръяс, сьыланкывъяс / Василий Лодыгин. - Сыктывкар, 2015 (Коми респ. тип.). - 206, [1] лист бок : серпас, фотосерпас. – Пер. загл. : Габовские.

Василий Григорьевич Лодыгин - Коми йöзкостса кывбуртэчысь, Россияса гижысьяс да журналистъяслöн котыръясӧ пырысь, Коми комсомоллöн да Коми республикаса правительстволöн Иван Куратов нима премияа лауреат, Коми Республика да Россия Федерацияысь культураын пыдди пуктана уджалысь.

Чужис Кулöмдiн районса Габов грездын. Сыктывкарса пединститут помалöм бöрын велöдiс аслас районын роч кыв да литература, уджалiс радиоын, «Парма гор» газетын.

Йöзöдчö «Би кинь», «Войвыв кодзув», «Север» журналъясын; «Коми му», «Парма гор», «Выль туйöд», «Звезда», «Молодёжь Севера», «Маяк Сысолы» да мукöд газетъясын.

Кывбуртэчысьлöн кывбуръяс вылö композиторъяс гижöны сьыланкывъяс. Паськыда тöдсаöсь «Сикöтш», «Чöскыд эськö коляозйыс», «Зонлöн сьыланкыв» да мукöд сьылан.

Сылöн поэзияыс лолалö Чужан му, мам да нывбаба дiнö помтöм муслунöн, на вöсна быдлунъя тöждöн. Кывбуръясас - сьöлöм шонтан рöмъяс, шань коми кывъяс.

Василий Лодыгинлöн петавлiсны «Менам улича», «Ставыс на водзын», «Мича лун», «Вуджанiн», «Мусукасян рöм», «Чалльöг», «Гыбад» да мукöд торъя небöг.

«Габовсаяс» (2015) нима сборникö пырисны туялöм, казьтылöм, поэма, очеркъяс, кывбуръяс да сьыланкывъяс. Сиöма петассö Габов грездлы, коркö да öнi олысь йöзлы, Ай му вöсна тышын усьысь да ловйöн воысь фронтöвикъяслы. Эм танi водзкыв да нёль юкöна юриндалысь. Небöгö сiдзжö пырисны Александр Панюков, Марина Дадашова, Николай Лютоев да мукöд журналистъяслöн гижöдъяс.

«Гортыд на-й медмусаин» юкöнö кывбуръяс кындзи пырисны сьыланкывъяс, кодъяслы кывъяссö да шыладсö гижис Василий Лодыгин.



English version
фото В. Иванова