12+.png
Главная О библиотеке Поиск в электронных каталогах Региональный центр Президентской библиотеки Краеведение в Коми Национальная электронная библиотека КИБО Доступная среда
Рейтинг@Mail.ru
 »  »

Архив обзоров "Читаем по-коми" (Лыддьысям комиöн), 2016


Арт. 2015. № 1.jpgШебырев А. «Из улын…» : кывбуръяс / Александр Шебырев // Арт. 2015. 1 №. Лист бок. 101-104 : портр. Пер. загл.: Под камнем…: стихи. Из содерж.: «Бырöма» ; «Олöм» ; «Аслас» ; «Висьталöй» ; «Из улын» ; «Чужан му» ; «Аслад ордым» ; «Кад» ; «Мамöлы» : кывбуръяс. Пер. загл.: Не хватило ; Жизнь ; Своё ; Скажите ; Под камнем ; Родина ; Своя тропа ; Время ; Матери : стихи.

Александр Шебырев чужис 1960-öд воын Кулöмдін районса Пожöг сиктын. Сыктывкарса каналан университетысь экономика факультет помалöм бöрын уджаліс экономистöн «Пожегса» совхозын. Сэсся вöлі ВЛКСМ-лöн Кулöмдін райкомса первой секретарöн. 1988-öд восянь корреспонденталіс Кулöмдінса «Ленин туйöд» (öні - «Парма гор») газетын, быдмис редакторöс вежысьöдз. Пырö Россияса гижысь котырö.

Александр Васильевич олö аслас районса Помöсдін сиктын. Веськöдлö школаса краеведческöй да Тима Веньлы сиöм музейясöн, а сідзжö челядьлöн «Петас» литература котырöн.

Уджалö поэзияын, прозаын да пулицистикаын. Сылöн гижöдъясыс петавлісны газет-журналын ; öтувъя небöгъясын : «Сьöлöмöй бöрдö и сьылö», «Мелілуныс пыдöстöм и помтöм», «Сикöтш», «Лöсас» да мукöд. Петаліс «Олöм туйті» (2001) кывбуръяса асшöр небöг. Александр Шебыревлöн уна кывбур вылö лöсьöдöма сьыланкыв.

2015-öд вося «Арт» журналлöн медводдза номерын йöзöдöма Александр Шебыревлысь «Из улын» нима кывбура цикл. Татчö пырисны кывбуръяс: «Бырöма», «Олöм», «Аслас», «Висьталöй», «Из улын», «Чужан му», «Аслад ордым», «Кад», «Мамöлы».


Арт. 2015. № 3.jpgЕльцова А. «Му выв кад» / Алена Ельцова // Арт. 2015. 3 №. Лист бок. 100-111 : портр. Пер. загл.: Жизнь на земле : цикл стихов. Из содерж.: «Енэж шöрын кельыд тöлысь сералö…», «Кор лымйыс муас надзöникöн усьö…», «Кад», «Сöдзöн сьöлöмöй кольö…», «Кор арланьö нин катовмунö кад…», «Вöсньыдик тетрадьлöн еджыд листысь…», «Асывсяньыс рытöдз талун лымъя…», «Сьылысь пу», «Öшиньö шарöдчысь зэрлöн кад…». Пер. загл.: На небе луна смеётся…; Когда тихо падает снег…; Время ; С чистым сердцем…; Дело к осени…; Из тоненькой тетради…; Снег идёт…; Поющее дерево ; Дождливое время... ; Вуджöдöм кывбуръяс: Татьяна Канова. «Бадь пу. Рытъя кыа. Ты» ; Галина Бачева. «Менам сьыланкывйöй…»; Николай Абрамов. «Рöма кывбур»; Ашальчи Оки. «Дзоридзалö вишня пу», «Вöръясті ветлігöн», «Лолöй кö менам…» ; Сайма Хармая. «Вадорын» ; Сюй Бэнь. «Вöтын бöр локтöм». Пер. загл.: Перевела с русского на коми язык Алёна Ельцова: Канова, Т. Ива. Вечерняя заря. Озеро ; Бачева, Г. Моя песня…; Абрамов, Н. Стихи в цвете ; Оки, А. Цветёт вишня ; Бродя по лесам, Если душа моя…; Хармая, С. «У реки ; Бэнь, С. Возвращение во сне. Переводы Нелли Бибяевой (Морозовой) из сборника Алёны Ельцовой «Кассяна во» : «Жизнь» ; «Разбитое стекло ; «Будь счастлива, родная сторона» ; «Где теперь отыщешь» ; «Когда-то» ; «Рассыпанные бусы» ; «Давний сон» ; «Не забывай, любимый, эту зиму» : стихи.

Алёна Ельцова чужис Кулöмдін сиктын. Помаліс Сыктывкарса искусство гимназия, Сыктывкарса каналан университетысь финн-йöгра факультет, сэсся велöдчис Москваса Горький нима литературнöй институтын да Коми наука шöринса аспирантураын. 2009-öд воын дорйис Тима Вень творчество йылысь диссертация. 2005-öд восянь уджалö Коми наука шöринса Кыв, литература да история институтын, туялö коми литература. Олö Сыктывкарын. 1998-öд восянь пырö Россияса гижысь котырö.

Алёна Ельцовалöн нёль асшöр кывбуркуд: «Кассяна во», «Аскиа лун водзын», «Кадлöн воськовъяс», «Асъя зэр».

Ассьыс кывбуръяссö йöзöдö «Войвыв кодзув», «Арт», «Север», «Юность» журналъясын ; «Коми му», «Парма гор», «Йöлöга» газетъясын ; öтувъя небöгъясын. Сылысь кывбуръяссö вуджöдöма роч, фин, эст, англия, венгер, мари, мордва, узбек кывъяс вылö.

Кывбуралысь пыдісянь кылö олöмсö, гижö Коми му да чужан сикт йывсьыс, сёрнитö вöр-вакöд, висьталö радейтчöм йылысь. Кывбуръясас эмöсь мича орччöдöмъяс: «керка весьтö копыртчöма рыт» ; «быттьö синваяс усьöны кодзувъяс» ; «лымйыс муас дыр оз узь» ; «водас сьöлöм вылö еджыд лым чир» ; «тöлыс лёк кöин моз омлялö» ; «нöйтчысь лов оз узь» да с.в.

«Арт» журналлöн 2015 вося коймöд петасын йöзöдöма Алена Ельцовалысь «Му выв кад» нима кывбура цикл. Татчö пырисны кывбуръяс: «Енэж шöрын кельыд тöлысь сералö», «Кор лымйыс муас надзöникöн усьö», «Кад», «Сöдзöн сьöлöмöй кольö…», «Кор арланьö нин катовмунö кад..», «Сьылысь пу» да мукöд.

Журналас эмöсь сідзжö кывбуръяс, кодъясöс Алена Ельцова вуджöдöма роч да финн-йöгра кывъя гижысьяслысь. Тайö Комиысь Татьяна Канова, Коми Пермяцкöй Автономнöй Округысь Галина Бачева, Карелияысь Николай Абрамов, Удмуртияысь Ашальчи Оки, Финляндияысь Сайма Хармая, Китайысь Сюй Бэнь.

А нöшта позяс лыддьыны Алёна Ельцовалысь кывбуръяссö роч кыв вылын. Вуджöдöма найöс Нелли Бибяева (Морозова) «Кассяна во» нима сборникысь.


Арт. 2015. № 4.jpgЕлькин М. «Кытчöдз олан» / Михаил Елькин // Арт. 2015. 4 №. Лист бок. 105-111 : портр. Пер. загл.: Пока живёшь : цикл стихов. Из содерж.: «Шондіыслöн пöртмассис да ёрсис…» ; «Дöзмöма вотчысьысь расыс...» ; «Лэбöны турияс, лэбöны…» ; «Ланьтöма муза, и ланьтöма сьöлöм…» ; «Буракö, сёрнисьыс гажыс жö бырö…» ; «Тöрыт на зэрис да ва лымйöн шöтіс…» ; «Кодыр тувсовъя шондіыс пöльыштас бисö…» ; «Оланногöй сьöлöм бердам…» ; «Юньыс юльö вуджö…» ; «Льöмъюö, Льöмъюö, Льöмъюö чöдла!» ; «Кытчöдз тай олан…». Пер. загл.: Солнце уже не греет…; Лес устал от грибников…; Летят журавли, летят…; Молчит муза, молчит и сердце…; Всё-таки хочется поговорить…; Вчера только был дождь со снегом…; Когда весеннее солнце добавит тепла…; Образ жизни рядом с сердцем…; Июнь переходит в июль…; В Лемъю, в Лемъю за черникой! ; Пока живёшь…

Михаил Андреевич чужис 1958-öд воын Сыктывдін районса Сёська сиктын. 8 класс бöрын кылöдіс вöр, уджаліс Ухтаса экспедицияын гидрологöн. Сэсся помаліс рытъя школа да Москваса Горький нима Литература институт. Уна во вöлі «Войвыв кодзув» журналын шöр редакторöн.

Михаил Елькин - Иван Куратов нима Коми Республикаса Государственнöй премияа лауреат. Иван Куратов нима Коми Республикаса Правительстволöн премияа лауреат. Коми Республикаса заслуженнöй уджалысь. Пырö Россияса гижысь котырö.

Михаил Елькинлöн петавлісны «Öзын», «Восьса сьöлöмöн», «Лысва», «Бурас эскöмöн», «Арся дзоридзьяс», «Кодзула эжа» асшöр кывбуркудъяс. Комиöдіс Каллистрат Жаковлысь «Биармия» поэма, вуджöдіс Виктор Кушмановлысь, Дмитрий Фроловлысь, Александр Суворовлысь, Андрей Каневлысь кывбуръяссö.

«Арт» журналлöн 2015 вося нёльöд номерын йöзöдöма Михаил Елькинлысь «Кытчöдз олан» нима кывбура цикл. Татчö пырисны «Шондіыслöн пöртмассис да ёрсис…», «Дöзмöма вотчысьысь расыс..», «Лэбöны турияс, лэбöны…», «Ланьтöма муза, и ланьтöма сьöлöм…», «Буракö, сёрнисьыс гажыс жö бырö…», «Тöрыт на зэрис да ва лымйöн шöтіс…», «Кодыр тувсовъя шондіыс пöльыштас бисö да мукöд кывбуръяс.

Михаил Елькин гижö чужан му дорö муслун йылысь, нимкодясьö вöр-ва мичöн, петкöдлö вöр-ва вежласьöм пыр сьöлöм дойяс, коми йöз вöсна ловнас майшасьöм, казьтылö челядьдырся кадсö, мöвпалö быд лоöмтор вöсна мортлöн кывкутöм йылысь. Михаил Елькинлöн поэзияын уна кывбур сиöма мамыслы.

pdf.jpgЛыддьыны


1острова.jpgОстрова. Дiяс / сост. и предисловие П. Ф. Лимерова. – Сыктывкар: АУ РК «Редакция журнала «Арт», 2015. – 192 с.

«Арт» журналлöн небöглэдзанiнын 2015-öд воын петiс «Острова. Дiяс» нима выль небöг. Дасьтiс сiйöс Павел Фёдорович Лимеров, Республикаса литература, публицистика, история, культурология да художественнöй «АРТ» журналын шöр редактор. Сьöмсö лэдзöм вылас сетiс Печать да массöвöй коммуникацияяс агентство.

Небöгас пыртöма 60 сайö коми да роч паськыда да неуна на тöдса авторъяслысь кывбуръяс, поэмаяс да гижысьяслöн олантуй йылысь юöр. Налысь гижöдъяссö водзынджык «АРТ» журнал йöзöдлiс нин. «Острова. Дiяс» небöгысь коми кыв вылын позьö лыддьыны кывбуръяс, кодъясöс гижисны: Любовь Ануфриева, Елена Афанасьева, Галина Бутырева, Альберт Ванеев, Людмила Втюрина, Алёна Ельцова, Анжелика Елфимова, Виктория Карманова, Татьяна Кирпиченко да мукöд.

Шуам, Евгений Козловлöн тайö небöгас пырис «Нöшта öтчыд Трипан Вась йылысь» кывбура цикл, кодöс авторыс сиис Александр Лужиковлы.

Василий Лодыгинлысь, Коми республикаса культураын заслуженнöй уджалысь, журналист да переводчиклысь, кодлысь поэзиясö бура тöдö коми войтыр, тайö сборниксьыс позяс лыддьыны кывбуръяс: «Ог тусьöн кöдз, а эскöмöн…», «Меным нинöм вузавны…», «Менам потшöс», «Помнитöны сiйöс…», «Тэкöд сёрнитлiм Рöдина йылысь…». Бöръя кывбурыс сиöма Эдуард Тимушевлы.  

Эдуард Тимушев уджавлiс журналистöн, тэчис кывбуръяс. Кувсьылiс 2006-öд воын. Гижысьлöн петавлісны «Ёрта сёрни», «Крест», «Видзöдлас» нима асшöр небöгъяс. «Острова. Дiяс» нима небöгын йöзöдöма поэтлысь 6 кывбур: «Виччысьöм», «Пуктысигöн», «Ворсö гудöк», «Шуд», «Вöт», «Поэт».

И сiдз, корам тöдмасьны «Дiяс» нима выль небöгöн.


1ПРОШЕВА.jpgПрошева З. А. «Олöм-сьылöм…» : поэма, кывбуръяс / Зинаида Прошева. – Сыктывкар: Коми Республикаса гижысь котыр, 2015. – 27 с. - Пер. загл.: Жизнь – песня.

Зинаида Александровна Прошева Сыктывкарса педучилище да Коми пединститут помалöм бöрын уджавлiс республикаса школаясын, велöдысьяслысь тöдöмлун сöвмöдан институтын. Öнi пенсия вылын.

Челядьлы лыддьöм вылö сылöн петавлiсны «Лысва дзирд», «Вемöса пемöсъяс» нима асшöр небöгъяс. Кывбуръяссö да висътъяссö йöзöдлывлö «АРТ», «Би кинь», «Войвыв кодзув» журналъясын; «Коми му» да «Йöлöга» газетъясын.

2015-öд воын Зинаида Прошевалöн петiс «Олöм-сьылöм…» нима выль неыджыд небöг, кытчö пырисны поэма да кывбуръяс.

Поэмаыслöн нимыс, кыдзи и небöгыслöн, «Олöм-сьылöм…». Танi висьтавсьö 1930-1940-öд воясся шуштöм кад йылысь, кор йöзсö нинöм абусьыс пуксьöдлывлiсны дзескыдiнö. Гижöдлöн подулö авторыс пуктöма аслас бать-мам олöм-вылöм йылысь казьтылöмъяс.

Поэмаын висьтавсьö, мый тайö семьяын быдмисны 7 челядь. Медыджыдыс, Ардалион, велöдчис рабфакын. Öтчыд локтiс гортас да шемöсмис, мый страдна кадö мамыс гортын, керкаас чöв-лöнь, батьыс абу. Ардалион висьталiс, мый бать вöснаыс озö босьтöй комсомолö, корö мамсö не шогсьыны та вöсна. А сэсся заводитчис Ыджыд война, кытысь муса пиыс бöрсö эз нин во.

И сiдз, корам лыддьыны Зинаида Прошевалысь «Олöм-сьылöм» нима выль небöг.


1Г.В. Пунегова.jpgПунегова Г. В. Сёрнитам комиöн : велöдчан небöг / Галина Васильевна Пунегова ; ФГБОУ ВО «Сыктывкарский государственный университет им. Питирима Сорокина». – Сыктывкар : Кола, 2015. – 352 с. – Пер. загл.: Говорим по-коми : учебник коми языка для начинающих.

Корам тöдмасьны «Сёрнитам комиöн» выль велöдчан небöгöн, кодöс дасьтiс Галина Васильевна Пунегова, Коми туялан шӧринса Кыв, литература да история институтын кыв юкӧдса туялысь, филология кандидат, доцент. Сiйö туялö коми да роч кывъясын фонетика тэчас, уджалö республикаса кыккывъялун мытшöдъяс вылын. Йöзöдiс нин сё сайö научно-исследовательскöй да учебно-методическöй удж, велӧдан пособиеяс, методика индöдъяс, монография.

«Сёрнитам комиöн» велöдчан небöг петiс 2015-öд воын «Кола» небöглэдзанiнын. Отсалiсны сiйöс лэдзны Финляндияса велöдчан да культура министерство да Хельсинки карса Кастрен нима котыр. Тайö небöгыс лоö бур отсöгöн налы, кодъяс сöмын на заводитöны велöдны коми кывсö.

Литературнöй коми кывлöн историяыс заводитчö Перым Степан кадсянь на. Миян республикаын коми кыв - каналан кывъясысь öти. Найö, кодъяс олöны Комиын да кöсйöны тöдны коми кыв, сiдзкö найö пыдди пуктöны татчöс вужвойтырсö. Коми кыв öнi велöдöны кык программа серти: «Коми кыв – кыдзи каналан кыв» да «Коми кыв – кыдзи абу ас кыв».

Ставсö небöгас сетöма 16 тема : «Коми кыв финн-йöгра кывъяс пöвстын» ; «Коми кывйын сёрни шыяс» ; «Коми кывйын морта нимвежтасъяс» ; «Кадакывлöн тшöктана наклонение» да с. в. Эм сiдзжö уджъяс дорö вочакывъяс ; тöдöмлунъяс асшöра донъялöм могысь «Коми кыв» курсысь тест, комиа-роча да роча-комиа кывчукöръяс. Материалыс сетсьö рочöн да комиöн, эм асшöрлун лыддьöм вылö гижöдъяс.


2Цыпанов.jpgЦыпанов Е. А. Видза олан, коми кыв! : учебник коми языка для взрослых / Е. А. Цыпанов ; КНЦ УрО РАН, ИЯЛИ. – Сыктывкар : Кола, 2015. – 351 с. – Пер. загл.: Здравствуй, коми язык!

«Видза олан, коми кыв!» - велöдчан небöг, кодöс дасьтiс верстьö йöзлы Евгений Цыпанов, Коми туялан шӧринса Кыв, литература да история институтын - кыв, литература да фольклор юкӧнса веськӧдлысь, филология доктор, Коми туялан шӧринса директорöс вежысь.

Наука боксянь туялö морфология, семантика, глаголлысь синтаксис, литература кыв, дасьтö велöдчан небöгъяс налы, кодъяс велöдöны кывсö, кыдзи абу ас кыв. Евгений Александрович гижис сiдзжö некымын велöдчан небöг, на серти позьö велöдны коми кыв, культура да история, на серти велöдчöны школаясын да вузъясын.

Евгений Цыпанов йöзöдiс кыксё сайö удж, на пиысь 15 торъя небöг (монографияяс, коми кыв кузя ас кежысь велöдчан небöгъяс, кывчукöръяс да с.в.). Учёнöй унатор вöчö коми кыв сöвмöдöм могысь, тшöкыда йöзöдчö республикаса газет-журналъясын.

«Видза олан, коми кыв!» велöдчан небöг петiс 2015-öд воын «Кола» небöглэдзанiнын. Татчö пыртöма учебно-методическöй уджъяс, кодъяс отсаласны гижны да сёрнитны коми кывйöн налы, кодъяс сöмын на заводитöмаöсь велöдны абу чужан кыв. Медшöр юкöныс артмöма 17 урокысь, эмöсь серпаса мыччöдъяс. Торйöн сетöма сьыланкывъяслысь лыддянкуд, комиа-роча да роча-комиа кывъясысь индöдъяс, лыддянторъяс да упражнениеяс, сетöма юалöмъяс да гöгöрвоöдöмъяс.

Верстьö йöзлы ас кежысь велöдчан небöг сетас позянлун велöдны коми кывсö кыдзи ас кежысь, сiдз и шöр да вылыс тшупöда школаясöн котыртöм курсъяс да факультетъяс вылын.


1Войвыв кодзув 2016 1.jpgМишарин А. Шудсö быдöн ас ногыс кылö : повесьт / Алексей Мишарин // Войвыв кодзув. 2016. 1 №. Л. б. 23-33 ; 2 №. Л. б. 9-29.

Алексей Васильевич Мишарин - уджвывса ветеран, Коми Республикаса заслуженнöй уджалысь. Чужис 1949-öд воын Кöрткерöс районса Шойнаты сиктын, ыджыд семьяын. Бура велöдчиса школаын, помалiс Сыктывкарса сельхозтехникум, лои техник-механикöн. Служитiс Армияын. Уджавлiс Кöрткерöс районса Висер сиктса, «Нившерскöй» да СССР-лы 50 во нима совхозъясын, Зеленечын.

Кывбуръяс гижны босьтчöма школаас на, 6-öд классын велöдчигöн, ыстывлöма газет-журнал редакцияясö. 1967-öд воын йöзöдöма «Дыш кысö» нима челядьлы медводдза кывбур. «Войвыв кодзув» журналлöн 2016-öд вося медводдза номерысь позяс лыддьыны «Кодi тэ, Мишарин ёртыс?» ёрта сёрни, кöнi Александр Ульяновлöн юалöмъяс вылö вочавидзö Алексей Мишарин.

«Войвыв кодзув» журналлöн 2016-öд вося медводдза да мöд номеръясын (да нöшта водзö на лоö) петiс тайö авторыслöн «Шудсö быдöн ас ногыс кылö» повесьт. Танi висьтавсьö школаын велöдчысьяс йылысь. Лыддьысьысь тöдмасяс Данила Марковкöд, Васьö Моторинкöд, Ваня Майскийкöд, Толя Карповкöд, Таня Ивашкинакöд да мукöд геройяскöд. Гижысь сувтöдöма зэв ыджыд мог - наркоманиякöд тыш, кодi вайö ыджыд шог. Наркоманиялöн изки улö зэв кокни веськавны томуловлы, школаын велöдчысьяслы. Со босьтны Ваня Майскийöс, кодi усис коймöд судтасянь да доймалiс, куйлiс реанимацияын. Толя Карпов дзик пыр шуис та кузя, мый неминучаыс лои дурмöдчанторйысь. Таня Ивашкина заводитiс дорйыны Ваняöс, абу пö сiйö татшöм. Öтлаын велöдчысь ёртъясыс, дерт, думыштны эз кужны, мый Таня зэв збоя отсасьö паськöдны тайö лёкторсö. А тадзи артмис со мый понда: Таня Ивашкинаöс дзöляöн на гусявлiсны чиганъяс, на дорын сiйö и быдмис. Юрнуöдысьнас вöлi Баро нима барон, кодi нажöвитчис йöз шог вылын. Лунысь лун дурмöдчанторйöн вузасьöмыс вайис сылы бур сьöм, сылöн зэв öдйö кыптiс кирпичысь вöчöм коттедж.

А мый водзö виччысьö геройясöс, тi тöдмаланныд, кор лыддянныд повесьтсö асьныд.


Листбоксö дасьтic Вера Николаевна Казаринова


English version
фото В. Иванова