12+.png
Главная О библиотеке Поиск в электронных каталогах Региональный центр Президентской библиотеки Краеведение в Коми Национальная электронная библиотека КИБО Доступная среда
Рейтинг@Mail.ru
 »  »

Обзоръяслöн архив "Лыддьысям комиöн", 2015


2Белых И. Модлапов 001.jpgБелых И. И. Мöдлапöв : висьтъяс. Олöм серпасъяс / Иван Ильич Белых. – Сыктывкар : Эскöм, 2015. – 288 л. б. – Пер. загл.: Заречье : рассказы. Картинки жизни.

Иван Белых, коми гижысь да журналист, чужлiс Сыктывдін районса Паль сиктын. Коми пединститут бöрын олöмсö йитіс коми печатькöд. Уна во уджаліс «Коми му» газетын. Заводитлiс корреспондентсянь, сэсся юрнуöдiс отделöн, бöрынджык вöлі редакторöс вежысьöн, кутшöмкö кадö – Коми небöг лэдзанінын да «Йöлöга» газетын.

Верстьöлы да челядьлы Иван Ильичлöн петавлiсны небöгъяс: «Öзйы, бипурöй менам», «Челядьдырся пароходъяс», «Важыс уськöдчывлö вöтöн», «Кöмтöм кока челядьдырöй», «Гуся керка». Сылысь висьтъяссö йöзöдлiсны газетъясын, журналъясын да литературнöй альманахъясын. Найö воисны сьöлöм выланыс лыддьысьысьяслы.

«Мöдлапöв» нима небöгö пырисны висьтъяс да олöмысь серпасъяс, кöнi сёрниыс мунö том да арлыда войтырлöн олöм-вылöм да налöн тöжд-майшасьöм йылысь. Чукöрмöма небöгас нелямын гöгöр гижöд: «Вöлi март тöлысся субöта рыт», «Пöрысь льöм пу», «Кыдзи гöтрасис Естö Öне», «Самö да Симö», «Радейтана Паль гöраöй», «Ворс, гудöк, ворс», «Вадор пес», «Ёсь син», «Кор усьö кодзув», «Асыв туй» да сiдз водзö.

Небöг помас сетöма Александр Ульяновлысь «Олöмыд миян помтöм» нима статья, кöнi «Мöдлапöв» нима небöгсö орччöдöма сöмын на пачысь перйöм пöсь кöвдумкöд. Казьтылö, кыдзи уджъёртыс челядьмоз нимкодясьлiс аслас петасъяслы, Иван Белыхлöн бур киподтуй да олöм бура тöдöм йылысь, вöр-ваöн нимкодясьны кужöмсö да с.в.

Видлöг вылö босьтам «Мöдлапöв» небöгысь «Детдомса Капа» нима висьт. Шöр герой Öська Пашö быттьö тöрыт на ас коддьöмыскöд ворсiс мачöн, вуграсис, котралiс школаö, а со быдса олöм нин кольöма бöрö. Гöтрасис, быдтiс челядьöс, со и пöльöн шуысьяс нин эмöсь.

Пыр тшöкыдджыка Пашö казьтылö орчча сиктса шöр школаö ветлöдлöмсö. Со сiйö витöд классын пукалö ас грездса Шурö ёртыскöд бöръя парта сайын. Велöдчысьыс уна, нелямын гöгöр, унджыкыс нывъяс, но мыйлакö пыр син улас усьö детдомса еджгов юрсиа, лöзоват синъяса Капа нима нывка. Сiйö пукалö медводдза парта сайын, статя мыгöра, урокъяс вылын век стöча вочавидзö. Пашöлöн сьöлöмыс заводитлiс гораа тiпкыны, кор урок вылын кывлiс тайö нывкаыслысь гöлöссö. Тшöкыда мöвпавлiс, мыйла тайö нывкаыс да сылöн ёртъясыс веськалiсны детдомö?

Уна во мысти, öнi нин Павел Осипович, кыдзкö жальпырысь кутiс казьтывны Детдомса Капаöс, мыйысь сылöн нюкыртчылiс сьöлöмыс.

И сiдз, корам тöдмасьны Иван Белыхлöн «Мöдлапöв» нима выль небöгöн.

Листбоксö дасьтic Вера Николаевна Казаринова


2Фольклор иж.коми 001.jpgФольклор ижемских коми в Ненецком автономном округе : сборник фольклорных текстов / Этнокультурный центр Ненецкого автономного округа ; ИЯЛИ КНЦ УрО РАН ; сост.: А. Н. Рассыхаев, В. М. Кудряшова. – Сыктывкар-Нарьян-Мар, 2014. – 504 с.

«Фольклор ижемских коми в Ненецком автономном округе» нима выль öтувъя небöгын став чукöртöм материалсö сетöма роч да изьва диалекта коми кывъясöн. Сiйöс дасьтiсны Вера Кудряшова да Алексей Рассыхаев, филология наука кандидатъяс, Коми наука шöринысь кыв, литература да история институтын уджалысьяс. Небöгыс петiс Яран асшöрлуна кытшлöн канму программа серти. Сылöн мог - тöдмöдны танi олысь йöзöс изьватас фольклорöн.

Небöгысь аддзанныд водзкыв, дивö керан да пемöсъяс йылысь мойдъяс, эскöмъяс, казялöмторъяс, обычайяс, челядьлы фольклор, вужвойтырлысь ворсöмъяс.

Видзöдлам эскöмъяс, казялöмторъяс да обычайяс юкöн. Босьтам татшöм пасйöд: кор кöк кöкö, морт сылысь юалö, уна-ö во коли сылы овны? А сэсся кывзö, кымынысь лэбач кöкыштас. Уна-ӧ во лыддьöдлас, сы мында во и лоö мортлы овны.

А со нöшта татшöм видзöдлас: Иван лунö вöчöны выль корöсьяс да пывсьöны, а сэсся нывъяс шыблалöны найöс юö. Корöсьыс кö вöйö – петны нывлы верöс сайö, оз кö вöй – оз пет. А пöрысь йöз шыблалöны корöсьяссö, медым корöсьыс ваыскöд öтшöтш нуас став висьöмъяссö.

А вот мый шуöны олöма йöз номъяс кузя: чужöны пö найö Иван лунö, а номъяслöн вынныс заводитö чинны Прокопей лунсянь, да дзикöдз кутасны бырны Илля лунсянь.

Татысь позьö аддзыны нöшта татшöм казялöмторъяс:

«Шондiыс талун вывтi еджыд, гашкö, сэсся лым усьö»;

«Лым вылö кö гымалö – бур во лоö»;

«Оз позь пукавны порог да пызан вылын»;

«Оз пö позь вожмавны узьысь мортöс – оз кут быдмыны»;

«Бур мортöс колльöдöны, мед нöшта на волас, а лёк мортöс колльöдöны, мед нинöм аскöдыс оз ну».

Челядьлы фольклор юкöнын сетöма öввö сьыланкывъяс, тешъяс, прибауткаяс, сьылана мойдъяс, лыддьысянкывъяс да уна пöлöс ворсöм: кöр сюръясöн, шегйöн, гезйöн, пыжöн ворсöм, пошта локтö ворсöм, чурпалич да сiдз водзö.

Листбоксö дасьтic Вера Николаевна Казаринова


Попов А. В. Коркö аддзысям : пьеса / Алексей Вячеславович Попов // Мывкыд парма. – Сыктывкар, 2011. – Л. б. 392-407.

Алексей Вячеславович Поповкоми гижысь, прозаик, драматург, Россияса журналист да гижысь котыръясö пырысь, Россияса культураын да Коми Республикаын нимöдана уджалысь, Коми Республикаса нимйöза гижысь. Чужис 1950 вося 25 лунö Кöрткерöс районса Ыджыдвидз сиктын. Шойнатыса шöр школа помалöм бöрын уджалiс «Вишерскöй» совхозын. Служитiс Сöветскöй армияын.

1980 воын помалiс Сыктывкарса канму университетын история факультет. Сэсся пырис уджавны журналистикаö. Уна во веськöдлö челядьлы лöсьöдöм «Би кинь» журналын.

Медводдза висьтсö йöзöдöма 1971 воын, «Войвыв кодзув» журналса нёльöд номерын. Гижöдъяссö йöзöдöма республикаса уна журналын да öтувъя чукöръясын. 1991 воын сылöн петiс медводдза «Олöм олысьяс» небöг, кытчö пыртöма висьтъяс да повесьтъяс.

1990-öд воясö гижысь пырис драматургияö. Сылöн «Мыйсяма йöз», «Ойя да Ойя», «Сур лагун», «Йиркап», «Гöтрась, пиö, гöтрась», «Чудь мыльк» да мукöд пьесаяс серти спектакльяс мунöны Коми республикаса да Россияса театръясын. Став драмаа гижöдъяссö йöзöдöма «Мывкыд парма» небöгын, кытчö пыртöма и «Коркö öд аддзысям» пьеса.

Действиеыс мунö Наталь баб керкаын. Ачыс куйлö гöбöч вылын. Орччöн пукталöма ассьыс кулан паськöмсö, лöсьöдчö мöдар югыдас. Пызан вылö лöсьöдöма сёян-юан. Пырöны Ирина да Клавди.

Пукалöны Ирина да Клавди баб, сёйöны, юöны да сералöны, мый Наталь кувны лöсьöдчöма. А Наталь баб сы костi ойбыртлiс пачöр вылын, вöталiс Степан ёртсö.

Пара рюмка курыдтор юыштöм бöрын пöдругаяс заводитöны сьывны да казьтывны томдырся кадсö. Пöдругаяс разöдчисны.

Наталь баб пуксьö лабичö : «Öкмысдасöд со Степанöй сиис овны. Гашкö и ола да. Сылöн шуöмыс кö инас. Мый огыс? Сэтчöтö öд мый тэрмасян. Степан дорö кö ог? Аддзысьны кö шуöма, сыкöд позьö и сёрöнджык паныдасьны».

Тöдмасим Алексей Поповлöн олан туйöн да гижан сямöн. Тöд вылö уськöдим «Коркö öд аддзысям» пьеса.

Чужан кыв вылын небöгъяс тi верманныд аддзыны и лыддьыны Коми Республикаса Национальнöй библиотекалöн ас му туялан да войтырсикас литература юкöнын. Лыддьысьöй миянкöд öтшöтш, лыддьысьöй комиöн!

Листбоксö дасьтic Татьяна Юрьевна Королева


1чисталев.jpegЧисталев В. Т. Изкар : пьеса / Вениамин Тимофеевич Чисталев // Эжва йывса колип. – Сыктывкар, 2000. – Л. б. 189-197.

Вениамин Тимофеевич Чисталев чужис Вöлöгда губерниялöн Усть-Сысольск уездса Помöсдiн сиктын. Велöдчис сиктса школаын, помалiс Дереваннöйса мöдöд тшупöда школа. 1908-1931-öд воясö велöдiс Пожöгса да Помöсдiнса школаясын. Уджалiгас лöсьöдöма коми шыпаскуд да комиöн челядьлы лыддьысян небöг. Медводдза мирöвöй война дырйи веськавлiс Украинаö. Гражданскöй войнавывса участник. 1918-öд восянь дас вит во чöж велöдiс коми кыв Помöсдiнса школаын.

Медводдза кывбуръяссö гижлiс 1908-öд воö. Ёна сöвмöдiс коми литература 1920-1930- öд воясö. Паськыда тöдсаöсь сылöн кывбуръяс «Тувсовья», «Поэзия артмöм», «Менам кывъясöй»; поэмаяс «Ленин гу дорын», «Му вежöм» да пьесаяс «Изкар», «Ныв сетöм». Гражданскöй война вояс петкöдлic «Шог асыв» да «Тшыг воö» висьтъяс. Вöлi вуджöдчысьöн. 1929-öд воö гижис «Трипан Вась» - коми литератураын медбур висьтъясысь öти. СССР- СА гижысь котырын 1934-öд восянь.

1937-öд воö Вениамин Чисталевöс мыжтöг пуксьöдiсны. Кулiс 1939-öд вося йирым 13-öд лунö Сыктывкарса тюрьмаын.

Казьтыштам «Изкар» пьеса. Петiс сiйö торъя книгаöн 1926 воын. Медводдза ворсöмыслöн заводитчöмыс зэв лирическöй. Вöрань вöтчö да юасьö кöклысь, дыр-ö кутас овны да дыр-ö оз пет верöс сайö. Сэсся сус-пожöм сора коз вöрын аддзысьöны Майбыран да Вöрань – ыджыд öксьылöн пиыс да ыджыд тöдысь тунлöн нылыс. А помасьö тайö тайö петкöдчöмыс трагическöя – майбыран кутö Вöраньöс, найö бура дыр вермасьöны. Мöд да коймöд ворсöмъясын висьтавсьö ыджыд грек йылысь, кодöс вöчис Ыджыд Войпель ен нима вöрын Майбыран – Корлöн пиыс. Нёльöд серпасалöмыс Изкарса кось бöрын. Майбыран Вöранькöд пышйöны гуся туйöд. Вöрмортöс виöны, медбöръя кывъясыс сылöн чукöстöм кодь: «Он вермöй бырöдны комиöс. Миян бöрын нöшта на кольöны олысьяс!».

«Войвыв кодзув» 10-öд номера журнал ставнас сиöма Тима Веньлы. Юриндалысьысь : «Менам кывъясöй»; «Мый лыддьывлiсны пöльясным»; «Бур кывйыс сьöлöманым йиджö»; «Тима Веньлöн ритма проза»; «Морт да война» тема Тима Вень прозаын; «Тима Веньлöн олан тшупöдъяс; Тэнад олöмыд саридз кодь джуджыд; Тима Вень нима; Менам олöм.

Тима Веньлöн олан туйöн да гижан сямöн быдöн вермас тöдмасьны «Гижысь йöзöс югыдлань нуысь» выставка вылын, кодöс позьö аддзыны

Коми Республикаса Национальнöй библиотекалöн ас му туялан да войтырсикас литература юкöнын.

Листбоксö дасьтic Татьяна Юрьевна Королева


Яковлев12.jpegЯковлев Ю. Ас туй : висьтъяс, притчаяс (вуджöдöм) / Ю. Яковлев. – Сыктывкар : Кола, 2015. – 222, [1] л. б.

Юрий Яковлев чужис 1955 вося юнь 27 лунö Удора районса Кöдж грездын. 1973 воын помалiс шöр школа. Служитiс армияын, та бöрын уджалiс милицияын, пöжарнöйöн. Вит во чöж ноксис аэропортса клубын. «Тайö кадсö лыддя медся шуда кадколастöн, сэки вöлi позянлун гöгöртны став Коми мусö», - висьталö сiйö.

Бöръя вояссö олiс Питерын, сэнi гижис кыксё гöгöр висьт да очерк.

Комиöн Юрий Яковлев босьтчис гижны 1997 воын. 2002 воын чукöрмис «Катыдпом» висьт чукöр», 2003 воын – «Сöдзим». Йöзöдöма найöс «Йöлöга» да «Коми му» газетъясын, сiдзжö «Войвыв кодзув» журналын.

«Ас туй» выль небöг артмö «Сöдзим – чужанiн»; «Арся мойд»; «Нюмсера висьтъяс»; «Сашка Нина казьтывлö»; «Притчаяс» юкöнъясысь.

Быд гижöд шымыртö мортлысь олöм. Öд прöста абу шуöма гижысь небöгсö «Ас туй». Быдöнлы шуöма восьлавны ас туйöд : кодлыкö вичмö кокньыд да шыльыд туй, а кодкö кыссьö изъя – кырöда ордым кузя, кыв шутöг нуö сьöкыд крестсö.


1войвыв кодзув.jpegЛыткин В. Öтнас : висьт / Владимир Лыткин // Войвыв кодзув. 2015. 6 №. Л. б. 78-80.

Владимир Александрович Лыт­кин чужис 1958 вося декабр 23 лун Сыктывдiн районса Выльгорт сиктын. Помалiс Выльгортса шöр школа, 1977-79 воясö служитiс армияын. Сэсся дыр кад шопералiс, мыйтакö уджалiс «Коми му» газетын корреспондентöн. Öкмыс-дасöд воясö «челнокалiс».

Медводдза висьтъясыс — «Ок тi, мужикъяс!» да «Дой» — петалiсны «Войвыв кодзув» журналын 1987 воын. Йöзöдчылiс и мукöд коми газет-журналын.

Владимир Александрович висьталö: «Гижны босьтчи дас нёль арöcöн. Заводитi гижны аслым, некодлы эг петкöдлы. Сöмын ар кызь кöкъямысъясын смелмöдчи. Гижöдъясöн окота вöрзьöдны мортсö, мед лолаc дзебöм гусяторйыс воссис мукöдыслы, мед коми мортыс эз пов да лоис тыдаланаджык. Окота ассьым да йöзыслысь олöмсö тöдмавны-восьтны: кутшöмöсь ми, мыйла олам, мый тшöктö миянöс вöчны тадзи. Медшöрыс — эн пов аслад мöвпъяссьыд, олан кö морт ногöн, тэ абу омöльджык мукöд войтырсьысь, а уналаын и вылынджык. Эн пов, эскы аслад сьöлöмыдлы. Тайö сьöлöм-вежöртö тэныд ceтic миян нэмöвöйся оланногным. А миян оланногыс, слабог, мукöдсьыс лёкджык некор эз вöвлы».

2015 вося 6-öд номера Войвыв кодзув журналын йöзöдöма Владимир Лыткинлысь «Öтнас» челядьлы висьт, кöнi шöр геройнас лоö Митя. «Öшиньдорса лабич вылын пукалö шег кодь зонка да öшинь пыр видзöдö ывлаö. Сылы гажтöм. Садьмöм бöрас детинка эськö сетлiс гöлöссö, думнас чукöстiс гортсаяссö, но некод эз вочавидз. Öнi сiйö öтнас. Лöнь.

Öтнамöс колисны! А öд Танялы мам тшöктic колльчыны асывнас гортö, менö видзны…. Гортын и ывлаын лöнь. Йöз абу. Сöмын пон котöртö. Ыджыд сьöд. Картупель коръяс костас кодкö-мыйкö тыдалö. Васька кань тайö. Ылiсянь эргöм шы воö. Митя тöдö нин – тайö самолет лэбö. Недыр мысти Митя пукалö лабич вылын да йирö какао кубик. Тайö мамыс гöснеч вайöма».

Со и тöдмасим Владимир Лыткинлöн творчествокöд да сылöн «Öтнас» висьтöн.


1войвыв кодзув.jpgКуратова Н. Аппассионата : висьт / Нина Куратова // Войвыв кодзув. 2015. 2 №. Л. б. 4-11.

2015 вося «Войвыв кодзув» журналын 2-öд номерын öти юкöн сиöма Нина Куратова Никитьевналы. Таво сылы тыри 85 арöс.

Куратова Нина Никитьевна чужис 1930 вося февраль 17 лунö Сыктыв районса Кебра сиктын. 1946 воын татчöс шöр школа помалöм бöрын велöдчис Сыктывкарса педучилищеын, уджалiс детсадъясын. Мыйтакö уджалiс ГДР-ын, сэсся 1971 воöдз, пенсия петтöдз, вöлi Коми АССР-са гижысь котыр правлениеын литконсультантöн. 1978 восянь – СССР-са гижысь котырын.

Нина Никитьевна – Коми АССР-са культураын заслуженнöй уджалысь, И. А. Куратов нима Государственнöй премияа лауреат. 2001 воын сылы сетöма «Коми Республикаса народнöй писатель» почёт ним.

«Войвыв кодзув» журнал вöзйö лыддьысьысьяслы гижысьлысь «Аппассионата» медводдза висьт.

Медшöр геройясыс - Геня да Дуся. Том зон машинаöн катайтчигмоз воис карсянь аслас чужан муö. Геня эз удит нимкодясьыштны ни тувсовъя шондiнас, ни гажа ягнас, сы вöсна мый, сы дорö шыöдчисны отсöгöн. Дусялы колö вöлi веськавны бурдöдчанiнöдз кок чегöм понда. Машинаöн мунiгöн детинкалы дум вылö уси комсомольскöй собраниеяс, уджалан бригадаяс и Дуся. Генялöн некыдз оз вермы вунны тайö ныв вылас öбидаыс. Öд сы понда зонлы весиг ковмыс мунны сиктысь.

Недыр мунöм бöрын машина пондiс буксуйтны, сэсся дзикöдз сибдiс. Жаль нылыс лои. Сiйö пукалic быг кодь еджыд чужöма, куньса синъяса, лöзöдöм вом доръяса. Шöйöвошöм зон недыр сулалiс чöла. Сэсся сылöн синъясас югнинтiс би, тшöктiс нывлы сöвны мушку вылас.

Дуся садьмис асывнас, сы дорын пукалiс Геня. Найö чöв олiсны. Да и колiс –ö сёрнитны, кор нывлöн и зонлöн синъясыс висьталiсны ставсö.


1изьва.jpegКузнецова В. П. Мый тöда, сiес и висьтала. Изьватас кыв вылын гижöдъяс / Валентина Петровна Кузнецова. – Сыктывкар : Кола, 2014. -80 л. б.

Валентина Кузнецова чужис кöр видзысьяслöн семьяын 1950-öд вося Семен лунö Кола кöджса тундраын, Поной ю бокса Кос-ты дорын. Челядьдырыс колис кöр дорын да Краснощелье сиктын. Уджавлiс стрöительöн «Ижма», «Луявврь» котыръясын. Нуöдлiс Ловозерса районнöй радио пыр «Изьватас олöм» нима радио уджтас. Йöзöдчывлiс «Ловозерская правда» газетын, «Арт» журналын, «Сьöлöм гаже – изьва кыы» сборникын.

Гижысь пасйö: «Öти рытö меным сюри важся тетрадь, кытчö гижавлi мойдъяс, притчаяс, тешьяс, радейтана кывбуръяс да сьыланкывъяс. Аддзöмторйöн ошйыси пöдругалы, кодi сетiс мöвп гижны неыджыд фольклор сборник ижма диалект вылын».

Небöглöн медводдза юкöнö пырö коми-изьватаслöн, стöчджыка кö Кольскöй ю дорын олысьяслöн, фольклор. Мöд юкöнö чукöртöма Валентина Кузнецовалысь висьтъяс, нöдкывъяс, туналöмъяс, шусьöгъяс, кывбуръяс, сьыланкывъяс да очеркъяс.

Коймöд юкöн шымыртö казьтылöмъяс авторлöн мамыслысь. Небöг помын Валентина Кузнецова вайöдöма ассьыс рöдвуж йылысь пасйöдъяс да фотографияяс.

Дзоля дырсянь мойд, серамбана теш, кывйöз да нöдкывъяс пыр ышöдöны чужан кыв дорö муслун. Выль небöг лоö отсöгöн изьва-коми диалект видзöмын да сöвмöдöмын.


1Войвыв кодзув 2014-12.jpgГордеева А. Льöм розъялан кад / Антонина Гордеева // Войвыв кодзув. 2014. 12 №. Л. б. 34-47. Пер. загл.: Время цветения черёмухи : рассказ. Текст коми.

Удора чужтiс уна енбиа гижысьöс, кодъяс йылысь висьталö «Литература лунпас 2014 во вылö». Восьтам кö тайö календарлысь октябр тöлысся лист бок, аддзам Антонина Гордеевалысь фото, тöдмалам дженьыдик юöрысь сылöн олан туй йылысь, лыддям сылысь кывбур.

Нöшта восьтам «Сьöлöмшöрöй менам Удора» öтувъя небöг, татчö пыртöма Антонина Гордеевалысь 5 кывбур.

Антонина Гордеева чужис Удора районын, велöдчис Косланса шöр школаын. Сыктывкарса медицинскöй колледж помалöм бöрын 10 во уджалiс лаборантöн Удора районса шöр больничаын.

Антонина Гордеева гижö 8-öд классянь, комиöн да рочöн, кывбуръяс да висьтъяс. Öткымын кывбурысь артмисны весиг сьыланкывъяс, шыладсö на вылö гижлiс Михаил Скомороков. Кыдзи тöдчöдö ачыс, сьöлöмыс кыскö гижны водзö. 2014-öд воын Сыктывкарса ООО «Типография «Полиграф-сервис» лэдзис Антонина Гордеевалысь «Лэба ме лебачöн» асшöр кывбура небöг, кодöс сiйö козьналiс Косланса шöр библиотекалы.

Антонина Гордеевалысь «Льöм розъялан кад» висьт йöзöдiс «Войвыв кодзув» журнал 2014 вося 12-öд номерын. Шöр геройяс – Таня, Настя да Гриша. Висьтын сёрниыс мунö мусукасян кад йылысь. Лоöмторйыс вöлi сиктын. Гриша да Настя радейтöны öта-мöднысö. Кыкнанныслöн вöлiны сöмын батьяс. Настя мунiс велöдчыны карö да Гриша кутiс лöсявны Танякöд. Сэсся Настя бöр воис гортас. Настя да Гриша костын бара ловзис радейтчöм. А Таня оз аддзы инсö, бöрдö, кöсйö лоны Гришакöд. И тайö ыджыд муслуныс вайöдö нылöс Öдöй баб дорö, кодöс висьтын орччöдöма Ёма Бабакöд. Тайö еретничаыс сетiс нывлы ёкмыль, кодöс тшöктiс пуктыны Настялöн керка дорö. Öдöй баб дорö ветлöмыс зло весьшöрö да вайис ставныслы ыджыд шог.


1Войвыв кодзув 2014-12.jpgНапалков В. Джеджимса тетрадьысь «Олöм воясыс лэбöны» : кывбура цикл / Виктор Напалков // Войвыв кодзув. 2014. 12 №. Л. б. 30-33. Пер. загл.: «А годы жизни летят»: из Жежимской тетради : стихотворный цикл. Текст коми.

Виктор Напалков чужис-быдмис Кулöмдiн районса Джеджим грездын. Сiйö нималана коми гижысь, Коми Республикаса нимöдана уджалысь, Кулöмдін районса пыдди пуктана олысь. Пырö Россияса гижысьяслöн котырö.

Виктор Егорович гижö проза да кывбуръяс. Напалковлöн гижöдъясын - шань да сöстöм сьöлöма йöз, бать-мам, том йöз да челядь, вöвлöм фрöнтöвикъяс, Эжва катыдса олысьяс, кодъяслöн тöждъясöн да радлунöн олö авторыс.

Виктор Напалковлöн петавлiсны торъя небöгъяс: «Козьнав мортлы муслун» (1981), «Туйвежъяс» (1986), «Томъяс» (1988), «Чолöм и прöщай» (2000), «Эзысь перна» (2004), «О, Енмöй» (2007), «Утка туй» (2008), «Войся ангел» (2012). Йöзöдчö сiдзжö öтувъя небöгъясын, «Войвыв кодзув» журналын, «Коми му» газетын. Сылöн «Эжва катыд» кывбурысь артмис мича сьыланкыв, шыладсö вöчис Василий Гущин.

Виктор Напалковлöн олан туй да творчество йылысь позьö лыддьыны Владимир Дёмин, Александра Мишарина, Евгений Игушев, Василий Лодыгин, Диана Холопова да мукöд туялысьяслöн гижöдъясысь.

2014-öд вося «Войвыв кодзув» журналын 12 номерын печатайтöма Виктор Егоровичлöн Джеджимса тетрадьысь «Олöм воясыс лэбöны» нима циклысь 5 выль кывбур: «Колльöдчигöн», «Сиктса пöчьяс», «Наследство», «Рытгорув», «Чужан сиктын».


1Чупров Я.И 001.jpgЧупров Я. И. Чупров Яков Иванович (Биа Öгыр). Поэтлöн да поэт йылысь бöрйöм гижöдъяс / небöгсö лöсьöдiсны : Н. Митюшева, С. Терентьев, Э. Чупрова. - Сыктывкар : Кола, 2013. - 144 л. б. - Текст коми.

Яков Чупров чужлiс 1906-öд вося юнь 3-öд лунö Изьва районса Бакур сиктын квайт челядя гöль крестьянин семьяын. Дас квайт арöсын чужан сиктас лои медводдза комсомолечöн.

Яков Чупровлöн сайним - Биа Öгыр. Нёбдiнса Виттор Яков Чупровлысь медводдза кывбур донъялiгöн, шуис ёртыслы татшöм кывъяс: «Сьöлöмсянь сиам водзö уджавны Биа Огырлы: мед öгырыс оз кус, мед сiйö разалö паськыд Коми муöд да öзтö пемыд войтырлысь сьöлöмъяссö выль биöн!» (Ордым журнал. 1927. № 3).

Яков Иванович велöдчис ичöт школаын, помалiс Изьваса I тшупöда да Сыктывдiнса II тшупöда совпартшколаяс. Изьва районса кöр видзысьяс пöвстын нуöдiс культура сöвмöдан удж.

Cэсся помалiс Молотов нима Войвыв крайса Вылыс тшупöда партийнöй коммунистическöй видз-му школа. Уджалiс Емдiн райкомын, сэсся «Сыктывса ударник» райгазетын редакторöн.

1937 воын гижысьöс арестуйтiс НКВД, мыж эз сюр. 1939 воын Яков Чупровöс реабилитируйтiсны. Война пансьытöдз уджалiс «Комилес» трестын.

1941 вося декабрын мунiс ыджыд тыш вылö. 1942 вося апрель тöлыссянь Яков Чупров лыддьыссьö юöртöг вошöмöн. Сылы вöлi сöмын 35 арöс.

Ловъя дырйиыс гижысь эз удит лэдзны торъя небöг. Сылысь кывбуръяссö йöзöдлiсны «Ордым», «Ударник», бöрынджык «Войвыв кодзув» журналъяс. Поэт йылысь гижлiсны сiдзжö «Краснöй знамя», «Молодёжь Севера», «Коми му» газетъяслöн лист бокъяс вылын да öтувъя сборникъясын.

2013-öд воын петiс «Чупров Яков Иванович (Биа Öгыр)» нима литература-художествоа небöг. Татчö öтувтöма поэтлöн да поэт йылысь бöрйöм гижöдъяс. Эм небöг лöсьöдысьясöн гижöм водзкыв, Биа Öгырöн гижöм автобиография. Хронология серти сетöмаöсь кывбуръяс да поэмаяс, коми кыв сöвмöдöм кузя статья да роч вылö вуджöдöм уджтасъяс. Позьö аддзыны поэтлöн олан да гижан кад йылысь пасйöдъяс, Яков Чупров нывлысь казьтылöмъяс, Надежда Митюшёва, Диана Холопова, Геннадий Беляев да мукöд туялысьяслысь статьяяс.

Яков Чупров аслас кывбуръясын петкöдлö 1920-1930-öд воясся йöзлысь олан туй да мöвпъяс, томлунлысь вын, чуксалö öтув тэчны выль шуда олöм. Эм сiдзжö радейтчöм да чужан мулы сиöм кывбуръяс. А мам дорö муслун да сiйöс пыдди пуктöм век олiс поэтлöн сьöлöмын.


Листбоксö дасьтic Татьяна Юрьевна Королева


English version
фото В. Иванова