12+.png
Главная О библиотеке Поиск в электронных каталогах Региональный центр Президентской библиотеки Краеведение в Коми Национальная электронная библиотека КИБО Доступная среда
Рейтинг@Mail.ru
 »  »

Обзоръяслöн архив "Лыддьысям комиöн", 2014


1Лит.календарь.jpgЛитературный календарь на 2014 год = Литература лунпас 2014 во вылö / Отд. культуры администрации МР «Удорский» ; ММУК «Центр социально-культурной деятельности» ; ММУК «Удорская централизованная библиотечная система». [12 л.].

Выль петас «Литературный календарь на 2014 год = Литература лунпас 2014 во вылö» тöдмöдö удораса енбиа гижысьяскöд. Удора озыр нималана гижысьяснад. Тані ли­тератураыс кутöма сöвмыны Ыджыд вой­на бöрын. Владилен Крюков, велöдысь да мед­воддза удораса кывбуртэчысь, петкöдіс гижан ордым вылö Борис Палкинöс, Леонид Палкинöс, Анатолий Афанасьевöс, Юрий Васютовöс, Альберт Ванеевöс. А водзö туйсö писькöдісны Эраст Ванеев, Михаил Худяков, Евгений Афа­насьев, Галина Бутырева, Нина Обрезкова, Пётр Бушенев.

Календарö пыртöма Удораысь дас кык авторöс. Быд лист бок вылын эм гижысьлöн фото, сылöн олан туй йылысь юöр да тöлысь вылö календар.

Январ тöлысся лист бок вылын Светлана Говорухина йылысь юöр. Сійö тэчö кывбуръяссö дзöлядырсяньыс, рочöн да комиöн. Йöзöдчö «Коми му» да «Выль туйöд» газетъясын, öтувъя öктöдъясын. Кольöм во январ тöлысьын Светлана Ювинальевналöн петіс «Збыльмытöм вöт» нима медводдза небöг.

Листыштам водзö. Февраль тöлысьысь лыддям Алексей Вурдов йылысь юöр. Чужис Инта карын, кытчö бать-мамыс ветлісны уджавны. 1958-öд воын бöр локтісны овны Удораö. Тані Алексей помаліс Косланса шöр школа, сэсся Архангельскса лесотехническöй институт. Алексей Вурдов пырö Россияса гижысь котырö. Петіс 4 асшöр небöг.

Апрель тöлысся лист бок сиöма Альберт Ванеевлы, Коми Республикаса йöзкостса гижысьлы. Тайö каднас, 1949-öд воын сылöн петісны медводдза кывбуръяс.

Водзö листыштам юнь тöлысь. Тайö лист бокыс висьталö Альбина Селиванова йылысь, коді гижö верстьöлы да поснилы, да нöшта на и серпасасьö.

Восьтам кö октябр - аддзам Антонина Гордеевалысь фото. Сылöн петавлісны кык асшöр небöг, сьыланкывъяс, кодъяслы шыладсö лöсьöдліс Михаил Скомороков. Тайö петасысь аддзанныд сідзжö мукöд гижысьясöс: Галина Бутырева, Елена Афанасьева, Пётр Бушенёв, Нина Обрезкова, Александр Вылегжанин, Владилен Крюков.


1Коми гижысьяс.jpgКоми гижысьяс = Коми писатели : комплект из 23 фотографий. Часть I / сост. и ред. А.В. Попов ; компьютерная вёрстка Л.Т. Попова ; корректоры: Г. В. Холопова, Е. В. Плетцер ; худож. Н. Н. Коносова. – Сыктывкар, 2013 (ООО «Коми республиканская типография»).

Дона лыддьысьысь! Национальнöй библиотекаö воис выль небöг «Коми гижысьяс = Коми писатели». Медводдза юкöн. Корам тöдмасьны.

«Коми гижысьяс = Коми писатели» петас лэдзны сьöмнас отсалöма Коми Республикаса национальнöй политика министерство.

Öтувъя петасö пырисны комиöн гижысьяслöн 23 фото. Öтар лист бокас сетöма фото, мöдарас - роч да коми кывъяс вылын гижысьлöн олантуй да творчество йылысь неыджыд юöр. «Коми гижысьяс» пöвстын: Елена Афанасьева, Вячеслав Бабин, Иван Белых, Галина Бутырева, Алексей Вурдов, Гений Горчаков, Анжелика Елфимова, Михаил Елькин, Елена Ельцова, Евгений Козлов, Елена Козлова, Нина Куратова, Александр Ларев, Василий Лодыгин, Александра Мишарина, Виктор Напалков, Нина Обрезкова, Алексей Попов, Владимир Тимин, Александр Ульянов, Олег Уляшев, Александр Шебырев, Николай Щукин. 

«Коми гижысьяс=Коми писатели» петас отсалас уджас велöдысьяслы, библиотекаръяслы, велöдчысьяслы, студентъяслы да налы, кодъяс кöсйöны тöдны коми литература.


1Ульянов.jpgУльянов А. В. Олöмыдлöн пыдöсыс оз тыдав : повесьтъяс, висьтъяс, публицистика юкöн / Александр Васильевич Ульянов. – Сыктывкар : Эскöм, 2013. – 408 л. б. – Пер. загл. : У жизни дна не видно : повести, рассказы, публицистика. Текст коми.

Александр Васильевич Ульянов (Паш Вась Öльöксан) чужис 1953-öд воын Кулöмдiн сиктын. Дереваннöйса шöр школа бöрын помаліс Сыктывкарын Коми пединститут, сэсся Ленинградын высшöй партшкола. Уджаліс республикаса «Красное знамя», «Югыд туй» («Коми му») газетъясын, «Войвыв кодзув» да «Би кинь» журналъясын. Юрнуöдіс Коми небöг лэдзанiнöн да «Коми му» газет редакцияöн, кытчö öтувтісны коми кывъя нёль газет-журнал.

Александр Ульянов пырö Россияса гижысь котырö, Коми Республикаса заслуженнöй уджалысь.

Гижны заводитіс школаас велöдчигöн на. Йöзöдчис районса «Парма гор» газетын, «Войвыв кодзув» да «Север» журналъясын; «Авария», «Белый бор» да «Берега» öтувъя небöгъясын. Уна гижöд вуджöдöма финн-йöгра кыв вылö.

Александр Ульяновлöн петалісны «Сьöд ар», «Изъя чой», «Выль керка», «Деревенька моя», «Глубинка» проза небöгъяс.

Корам Тіянöс тöдмасьны Александр Ульяновлöн нöшта öти петасöн. 2013-öд воын петіс «Олöмыдлöн пыдöсыс оз тыдав» нима небöг, кытчö авторыс пыртіс ассьыс коркö гижöм да выль повесьтъяс да висьтъяс. Александр Ульянов петкöдлö коми сиктлысь да сэні олысьяслысь тöжд-дойсö, майшасьöмсö. Эм небöгас сідзжö публицистика юкöн.


1жаков.jpgЖаков К. Ф. Биармия : коми литературный эпос / Каллистрат Жаков. – Сыктывкар : Союз писателей Республики Коми, 2013. - 352 с. : цв. вкл.

Каллистрат Жаков, паськыда нималана философ, енбиа туясьысь да гижысь, чужліс 1866 воын. Дасьтіс аслыспöлöс лимитизм система, художествоа гижöдъяс.

Чужис-быдмис сійö Давпон сиктын уна челядя семьяын. Велöдчис Киевса да Петербургса университетъясын. Вöлі Петербург университса приват-доцентöн, уна во чöж уджаліс Психоневрологическöй институтын. 1917-öд воын веськаліс Прибалтикаö. Сэсся Жаковöс кутісны шуны, мый сійö белоэмигрант да антисоветчик.

Каллистрат Жаков кулі 1926-öд воын Ригаын.

«Биармия» Жаков гижліс 1916-öд воын. Эз кокни вöв поэмалöн лыддьысьысь дорö туйыс. 1924 воын «Биармияысь» юкöн йöзöдлісны латыш кыв вылын, вуджöдöмсö вöчліс кывбур тэчысь Я. Райнис, коді Ригаын волывліс профессор Жаковлöн лекцияяс вылö.

Жаковлöн чужанінын поэмасö йöзöдісны 1993-öд воын. Коми кыв вылö вуджöдіс Михаил Елькин, водз кывсö гижліс профессор Анатолий Микушев.

Биармия – сійö асыв-войвывса Россияса Европалöн юкöнын легенда сяма му, мый йылысь заводитісны казьтывлыны 9-13 нэмъясын важся скандинавияса сагаясын. Поэмалöн сюжет серти, Биар­мия - важ Пермьлöн рöдвуж. Шöр герой Яур, Пермьса князь, Биармияысь вайö аслыс гöтыр. Кыдзи сійö корсис невестасö, сылöн да Райда гöтырыслöн судьбаяс, семьяын олöм да челядь быдтöм йылысь висьтасьöмöн автор петкöдлö йöзлысь муслун образ, а вöр-ва серпасъясöн – чужанінлысь öблик. «Биармияöн» авторыс кыпöдö коми войтырлысь этшсö.


1Сьолом гаже.jpgСьöлэм гажеизьва кыы / книгасö думыштіс да лöсьöдіс Семён Терентьев. – Сыктывкар, 2012. – 108 л. б. – Пер. загл.: Радость сердца – ижемский говор. Текст коми.

Семён Терентьев чужис Большеземельскöй тундраса Кöсьта ты вылын, челядьдырыс коли кöръяс дорын. Служитіс Армияын, помаліс Лесотехническöй техникум, уджаліс Сыктывкарса механическöй заводын. Сылысь висьтъяссö йöзöдлісны «Войвыв кодзув», «Арт» да «Чушканзі» журналъяс, «Сикöтш» нима öтувъя небöг. Эмöсь асшöр петасъяс: «Деревня Ярпияк – прошлое и будущее», «Лемванырд», «Заранъяс», древнепермскöй алфавит вылын у помысь гижöм кызь гöгöр небöг.

Öктöдыс зэв аслыспöлöс, гижöма изьва диалект вылын. 1970-öд воын изьваса ног сёрнитысьыс вöлі 50 сюрс сайö морт, на пиысь 40 сюрс гöгöрыс олісны Комиын. Важысянь уз учёнöйяс туялöны изьваса сёрни, налöн уджъяс серти позьö тöдмавны кывлысь фонетика да морфология. Тайö öтувъя небöгыс отсалас петкöдлыны изьва сёрнилысь мичсö, озырлунсö да аслыспöлöслунсö.

Öктöдö пыртöма Василий Чупровлöн, Татьяна Кирпиченколöн, Евгений Габовлöн, Александра Сарыевалöн, Валентина Кузнецовалöн, Семён Терентьевлöн, Людмила Втюриналöн, Лиза Терентьевалöн, Иван Кустышевлöн, Елена Вокуевалöн, Валентин Чупровлöн, Елизавета Поповалöн да с.в.

Шуам, Надежда Митюшевалöн, тайö небöгас пырисны Изьваысь петлöм учёнöй-краевед Михаил Истомин йылысь архив материалъяс.

«Сьöлэм гаже-изьва кыы» выль небöгысь аддзанныд изьваса гижысь Альбина Ануфриевалöн проза йылысь пасйöдъяс, кодъясöс дасьтіс Татьяна Кузнецова, филология узя кандидат.

Галина Рочевалöн, коді велöдчö Сыктывкарса каналан университетын коми да финн-йöгра филология факультетын, пырис «Луд» кежлö дасьтöм кывбур-частушка.

Корам тöдмасьны «Сьöлэм гаже-изьва кыы» выль небöгöн.


1Елькин.jpgЕлькин М. А. Кодзула эжа : кывбуръяс / Михаил Елькин. – Сыктывкар : Коми Республикаса гижысь котыр, 2013. – 144 л. б. Пер. загл.: Звёздная целина. Текст коми.

Дона лыддьысьысь, корам тöдмасьны Михаил Елькинлöн «Кодзула эжа» нима кывбура небöгöн.

Михаил Андреевич Елькин, кывбур тэчысь, чужис 1958-öд вося ноябр 21-öд лунö Сыктывдін районса Шошка сиктын. 8 класс бöрын кылöдіс вöр, уджаліс гидрологöн Ухтаса экспедицияын. Сэсся помаліс рытъя школа да Москваса Горький нима Литература институт. 1986-öд восянь «Войвыв кодзув» журналын, 1996-öд восянь - сэтчöс шöр редактор.

Каллистрат Жаковлысь «Биармия» поэма комиöдöмысь Михаил Елькинлы сетісны Иван Куратов нима Коми Республикаса Государственнöй премия. Коми кыв вылö вуджöдіс сідзжö Виктор Кушмановлысь, Дмитрий Фроловлысь, Александр Суворовлысь, Андрей Каневлысь кывбуръяссö.

Михаил Елькинлöн петавлісны торъя небöгъяс: «Öзын» (1986), «Восьса сьöлöмöн» (1989), «Лысва» (1994), «Бурас эскöмöн» (2000), «Арся дзоридзьяс» (2004).

2013 воын Михаил Елькинлöн петіс «Кодзула эжа» нима нöшта öти кывбура небöг. Поэт гижö чужан му йылысь, сэні олысь йöз йылысь, казьтылö челядьдыр кадсö, уна кывбур сиö мамыслы, вöр-ва темалы.

«Кодзула эжа» кывбура небöг куим юкöна: медводдзаыслöн нимыс öткодь небöгыскöд - «Кодзула эжа»; мöдыслöн - «Мöдлпöлас…Талапöлас…», коймöдыс - «Сылы, коді дона…». Медуна кывбур пыртöма «Кодзула эжа» нима юкöнö, со найö: «Кор вöртассö шоныда сывъялö кыа...», «Шоныд зарниöн ывлаыс тырас…», «Кор локтö веж тулыс» да с.в.

«Мöдлпöлас…Талапöлас…» юкöнысь аддзанныд «Августын кисьмöны кодзувъяс», «Нывбаба гожöм», «Лолöй, коньöр, йизьöма», «Куим гожся серпас» да мукöд кывбур. 

«Сылы, коді дона…» коймöд юкöнö пыртöма сизим кывбур: «Арся ывлаыслöн норысь», «Юля», «Радейтчан биын ми ловъясöн сылам!», «Эновтан кö – эновт…», «Зарни пос…», «Асывсянь пемдытöдз парматі шöйта…», «Кыпавліс мед сьöлöм…».


1Попов В 001.jpgПопов В. «Ме да ас сиктсаяс» : висьтъяс / Василий Попов. – Сыктывкар : Коми йöзöдчан керка» КРАУ, 2014. – 240 л. б. – Пер. загл.: Я и мои односельчане : рассказы. Текст коми.

Пыдди пуктана лыддьысьысьяс! Корам тіянöс Василий Вячеславович Поповлöн творчествоöн.

Василий Попов чужис Кöрткерöс районса Ыджыдвидз сиктын. Служитіс Армияын, уджаліс Сыктывкарса вöр заводын. А сэсся велöдчис Ленинградын киномеханикö да уна во чöж уджаліс чужан сиктас, петкöдліс кино, сы вöсна сійöс быдлаын тöдöны кыдзи Кино Васьöс. Нöшта ворсö гудöкöн да радейтö шмонитны, чукöртö серамбана лоöмторъяс.

Василий Поповлысь гижöдъяссö йöзöдöны «Чушкан зі» да «Войвыв кодзув» журналъяс, «Коми му» газет. Найöс тöдöны телевизор видзöдысьяс да радио кывзысьяс.

А öні корам тöдмасьны Василий Поповлöн «Ме да ас сиктсаяс» нима медводдза выль небöгöн. Татчö чукöртöма серамбана висьтъяс. Небöгсö лэдзисны 2014-öд воын «Коми йöзöдчан» керкаын. Выль небöгын 234 лист бок, тані вель уна висьт налы, кодлы сьöлöм вылас воö шмонитöм да радейтö серавны. Воссьö небöгыс «Пыж мотор» нима висьтöн, аддзанныд сідзжö висьтъяс: «Вöралöм», «Бур олöм», «Коми сёрни», «Сюсь пи», «Со кытчöдз воим», «Сюсь аппарат», «Выль медаль», «Чина войтыр», «Кöкъяс», «Вöвлытöмтор», «Вöралöм», «Бур олöм», «План тыртöны» да уна-уна мукöд.


1Война 001.jpgВойнаöн нырöм челядьдыр / сост.: Н. А. Лютоев, В. П. Нестеренко. – Сыктывкар : Кола, 2014. – 120 л. б. – Пер. загл.: Войной опалённое детство. Текст коми.

Пыдди пуктана лыддьысьысьяс! Корам тіянöс тöдмасьны «Войнаöн нырöм челядьдыр» нима вöвлытöм небöгöн. Книга дасьтысьяс козьналiсны сiйöс Кулöмдінса войтырлы, челядьлы, кодъяс пыр мунiс Ыджыд война.

Талун Кулöмдінын олö 200 сайö морт, кодъяслöн челядьдырыс лöсяліс Ыджыд война мунан лунъясö. Небöгас пыртöма фото да 175 мортлысь казьтылöм, 27-ыс на пиысь чужлісны мöд муын, но сьöкыд воясö веськалісны Кулöмдін районö да лоины ас йöзöн.

«Войнаöн нырöм челядьдыр» небöг воссьö Кулöмдін районса юралысь да администрацияöн веськöдлысь Дмитрий Шатохинлöн водзкывйöн. Сэсся лыддьысьысьяс дорö шыöдчöны Кулöмдін районса ветеранъяслöн сöветöн юрнуöдысь Г. Кравченко да Кулöмдін сикт администрацияöн веськöдлысь С. Рубан.

«Корöмнытö могмöдім» ним улынын шыöдчöны книга лöсьöдысьяс – журналистъяслöн Россияса котырö пырысь Николай Александрович Лютоев да Кулöмдінса ветеранъяслöн котырöн веськöдлысь Валентина Петровна Нестеренко. Найö висьталöны, мый татшöм петасыс районын медводдза. Небöгыс артмöма виччысьтöг, некымын тöлысь чöж чукöртöмаöсь материал да фото.

Книгаын овъяс сетöма алфавит серти, эм сiдзжö важ воясся фотояс: Кулöмдінса детдом 1937-öд воын; Детдомса челядь ёлка дорынöсь да пионерлагерын.


1Туй дор бадь 001.jpgКозлова Е. В. «Туй дор бадь» : повесьтъяс, висьтъяс, пьеса / Елена Козлова. – Сыктывкар: Коми Республикаса гижысь котыр, 2014. – 144 л. б. – Пер. загл.: Придорожная ива : повести, рассказы, пьеса. Текст коми.

Дона лыддьысьысьяс! Корам тіянöс тöдмасьны Елена Козловалöн «Туй дор бадь» нима выль небöгöн.

Коми войтыр тöдö Елена Васильевнаöс ёнджыкасö кыдзи челядьлы гижысьöс, а «Туй дор бадь» небöг гижöма верстьö йöзлы. Лэдзис сiйöс 2014-öд воын Коми Республикаса гижысь котыр. Сборниксö öтувтöны «Озъякерöсанöй» нима повесьт ; «Рытъя кыаöй менам» письмöяса повесьт ; «Сё майбырöй олöмöй» повесьт ; «Нюм» да «Кыр йылын бöрдiс гудöк» кык висьт ; «Туй дор бадь» психологическöй драма.

Видлöг вылö босьтам «Кыр йылын бöрдiс гудöк» висьт. Шöр геройясöн петкöдчöны Парасковья Николаевна да Зина. Ныв кывзö олöма аньлысь казьтылöмсö, сылысь томдырся кадсö, кыдзи аддзысисны верöсыскöд - Гудöк Ёгоркöд. Сiйö вöлöм лёка аддзö, радейтö гудöкасьны. Вочасöн том морт дзикöдз синтöммö, но тайö неминучаыс оз торк налысь радейтчöмсö. Уна во олiсны гоъзя öта-мöдсö пыдди пуктöмöн, вуджисны Ыджыд война.

А со «Озъякерöсанöй» нима повесьт. Гижöдсö йöзöдлiс «Войвыв кодзув» журнал 2007 вося кöкъямысöд номерын. Повесьтын некымын юкöн: «Клава чой», «Мича Васька», «Мöдысь аддзысьöм», «Госпитальын», «Победа войö», «Гортö» да мукöд. «Озъякерöсанöй» повесьтсö авторыс сиöма воча чойыслы - Клавдия Ивановна Мовчанлы.


1Куратов 001.jpgИван Алексеевич Куратов – поэт, лингвист, просветитель : биобиблиогр. указ. ; статьи / ГБУ РК «Национальная библиотека Республики Коми», библиогр. отд. ; сост.: Н. А. Нестерова, О. Л. Анциферова, М. Г. Лапина, М. А. Першина ; ред. Н. А. Нестерова. – Сыктывкар : Изательский дом Коми, 2014. – 400 с.

Дона лыддьысьысьяс! Корам тіянöс тöдмасьны Иван Куратов творчествоöн. Олігас поэт этша йöзöдчыліс, вöлі сöмын некымын кывбур Гугов псевдоним улын. Паськыда Иван Куратовöс кутiсны тöдны сöмын ХХ нэмын.

2014-öд воын коми литератураын вöлi тöдчана тшупöд - медводдза коми поэтлы чужöмсяньыс тырис 175 арöс. Тайö пас кежлас Коми Республикаса Национальнöй библиотека сиис поэтлöн творчестволы «Иван Алексеевич Куратов - поэт, лингвист, просветитель» нима выль небöг. Нёль юкöда петас дасьтiсны библиографическöй отделын уджалысьяс. Татчö пыртöма уджъяслöн индöд, Иван Куратовлöн олöм да творчество йылысь туялан уджъяс. Найöс гижисны: Евгений Цыпанов, Геннадий Тираспольский, Татьяна Кузнецова, Лидия Сурнина, Алексей Мусанов, Маргарита Дружинина. Диана Холопова гижис «Иван Куратов литературнöй музей дасьтöм йылысь» статья. Эмöсь серпасъяс, фото, нимъяслöн индысь, поэтлöн кывбуръяс да с.в.


1Закар ордын 001.jpgКуратов И. А. Закар ордын / сост. и вступ. статья В. А. Лимеровой. – Сыктывкар : Анбур, 2014. – 32 л. б.

Дона лыддьысьысьяс! Корам тіянöс тöдмасьны нöшта öти выль небöгöн, кодöс сiдзжö сиöма Иван Куратовлöн творчестволы.

«Закар ордын» небöг петiс 2014-öд воын Анбур небöг лэдзанiнын шöр арлыда челядьлы. Дасьтiс сiйöс да водзкывсö гижис Валентина Александровна Лимерова. Серпасъясыс Аркадий Мошевлöн, небöг кышсö серпасалöма Геннадий Шарипков. Небöг дасьтысьяс аттьöалöны отсöгысь Иван Куратов литературнöй геройяслöн музейын уджалысьясöс. Фотояссö босьтöмаöсь Коми Республикаса Национальнöй музейысь.

Фотоясыс вывтi нин мичаöсь. Тайö: Кебра гöра; Иван Куратовлöн чужан керка местаын казьтылан пас; «Кöч Закар керкалöн» фото (1985 во); «Менам муза» гаж мунö выль музей керка дорын (2013 во); музей жыръясын вöчöм снимокъяс да с.в.

Эмöсь сiдзжö геройяс вылö серпасъяс: Ошпи Макар, Кась Вась, Руч Вань, Пыш Тош Спиридон, Митрöпан, Поп Педь, Петрö Öльöш Герман да мукöд.

Лыддьöй небöгсö челядьныдкöд öтлаын.


Лöсьöдiс В.Н. Казаринова


English version
фото В. Иванова