12+.png
Главная О библиотеке Поиск в электронных каталогах Региональный центр Президентской библиотеки Краеведение в Коми Национальная электронная библиотека КИБО Доступная среда
Рейтинг@Mail.ru

Стихи И. А. Куратова

Морт олöм

Метрикаад, дяк,

Кыдз тэ кужан ляк!

Тэ ног, мем дас сизим во?

Ылö сiдз оз ло!

 

Ассьыд висьтав мем,

Да ас межлысь нэм...

Мортлысь вежа олöм рöд,

Аддза, тэ он тöд.

 

Ме дас сизим во

Джудждаммиг эг во

Öнöдз морт нимöдз. И коз

Быдмö миян моз.

 

А ме лоа морт!

Аддзан, гижанборд

Кыдзи быдмöм ки вылын:

Виршын эм нин вын.

 

Оз ко меысь пет

Гижысь и поэт,

Борд пыдди ме босьта чер –

Mенам лоас сер.

 

Оз кö меысь пет

Некутшöм поэт,

Мед оз пет и пöнöмар,

Гöрдлысь, сöрысь, яр...

 

Ог кö аркирей,

Лоа мед epeй,

Гашкö, лоа oфицер –

Mенам артмас сер.

 

Уна гырысь сан,

Этша ён талан,

Кодлысь войтыр кывзö гор,

Веськыд шензянтор.

 

Ыджыдлы и юр

Лэптавлыны бур...

Лоа кö бур сьöлöма,

Ме нин морт нима!

 

Усяс дона пуд,

Кор ме йöзлы шуд

Сета... Кутшöм шуд? Он кут

Рифма вылö тут.

 

(1857)

 

 

 

***

Кор ме тэкöд войын вежсим окасьöмöн,

Эз некодi аддзыв мелiасьöмöс…

Кодзувъяс енвевтын тiркöдчисны сöмын,

Но эз повзьöд кодзув чукöр миянöс…

 

Со енвевтсянь югыд кодзув мулань лыйис

И ми вылö саридзлы сэк висьталiс,

А лöз саридз быдсöнлы нин вашкöдiс:

Пелыссяньыс тöдiс тайöс чери кыйысь.

 

Черикыйысь сьылiс мусаыслы нин

Вой шöр войся миян мелiасьöм йылысь;

Ныла-зонъяс велöдчисны сьылан сылысь,

Сьылöны пыр каръясын и грездъясын!

 

(1859)

 

 

Выль сьыланкыв

Мый нö, зонъяс, горöктылам?

Гашкö, выль ног важсö сьылам…

Дыр-ö кульöс ныр улö

Ымзам, тöв мед нуалö?..

 

Корсям сьыланкыв ас шöрысь,

Ас му-ва вылысь, ас вöрысь,

Асланым гöль грездъясысь,

Юасигöн ныв-зонлысь…

 

Кодыр асланым ног сьылам,

Шог-гаж морта-мортлысь кылам…

Кысь пыр долыд сьылансö?..

Пондi ме, тi кутчысьö!

 

(1860)

 

 

Пемыд

Миян му вылын сьöд вой

Сувтöм ме ог тöд нин корсянь;

Войын йöзыс сьöд жö, тась

Весьшöрö тай йöзöс корсян…

 

Он, он аддзы! Мукöдыс

Эськö-й еджыд паськöмаöсь,

Да и сэнi найööс

Бордъя шыръяс вевттьöмаöсь!

 

Еджыд вылö лёк вампир

Горша сатшкысьö… И тöда,

Кыа петтöдз татöнi

Татшöм пемыдын ме пöда…

 

Мортлы дзескыд пемыдын…

Шондi петмысьт быдсö татi

Паськöдас тай… тiянлы!

Лолыштанныд кокньыда тi!

 

Петас, вокъяс, шондi-й тан!

Ме нин аддза – рöммö ылын…

И енвевтса лысваыс

Югйыштас сэк шондi вылын!

 

(1865)

 

 

Том ныв

(Александра Ивановна Поповалы)

 

Шондiбанöй,

Бур таланöй,

Муса, мича ныв!

Ошкöм öкты,

Зон моз йöкты,

Вильшась, серав, сьыв!

Юрас думсö,

Вомас нюмсö

Петкöд том мортлысь!

Мед тэ бöрысь

Гажмас пöрысь,

Сьöлöм гажöдысь!

Югыд шондi!

Долöд, шонды

Став енвевт увсö!

Мича нылö!

Мыччыв милы

Кокньыд олöмсö!

 

(1865)

 

 

Висьöм

Сьöкыд мем кыв джын нин шуны,

Висьöмöй морöсöс личкö...

Морöсöс му личкас: нуны

Ковмас и сэки тай кыдзкö!

 

(1865)

 

 

Мыж

Сьöкыд мыж эм лолöй вылын,

öти мыж и эм!

Дзик чöв олi, кор «тэ муса»

Сiйö шуис мем!

 

(1865)

 

 

Гöсьтьяс

(Гуговлöн)

Мича гöсьтъяс чукöртчисны,

Кияснысö чабралiсны,

Морта-мортлы шмыньялiсны...

Бара аддзысьöдöм ен!

Муза, радлöмныс мый сэн!

Олас, тырмас... Мый сiдз? Дыр-ö?

Абу кагаяс нин! Жырö

Тшайöн астрапель-ныв пырö...

Быдсöн лючки пуксьöны

Сöрöмъяснас юксьыны.

 

(1865)

 

 

Турöб

Сэтшöм пемыд вой, мый сöмын

Турöб аддзö ветлöдлыны

Керка гöгöр и быд öшинь

Böрзьöдны да йиркöдчыны.

Абу турöб тaйö, чайтсьö

Öткöнлы мем висьöдчигöн,

Тайö кулöм менам ноксьö,

Сöмын оз куж восьтны иган.

 

(1866)

 

 

Шудтöмъяс

Бöрдö-бöрдö мам;

Пиыс дiнас рам...

Сёшайт вильыш, шань,

Кор эм йöв да нянь!

Сэнi-й батьыс эм –

Сылы дзик тай нем!

Куйлö, куйлö лун и вой,

Удж вылö оз лэпты сой!

Со нин коймöд лун

Удж вылö оз мун,

Куньсьöм, олö чöв,

Бöрдöмысь оз öв,

Из кодь сьöлöма

Сiйö лоöма...

Куйлö, куйлö лун и вой,

Оз лэпты ни юр, ни сой!

Мортыс, тыдалö,

Аслыс арталö

Гортсьыс пышйыны,

Гуö дзебсьыны...

Коркö шогсьывлiс,

Коркö ноксьывлiс...

Тырмас сы серти! Сы шой

Куйлас тан медбöръя вoй!

 

(1866)

 

 

Тулыс

Дас вит арöс меным тырис,

Сöмын воис кад и вын –

Mый нö бара меö пырис?

Удж оз кутчысь киясын?

Енлöн гажа, гажа! Кайлы

Кокньыд лэбавны, а мем

Сьöкыд лоис аслам яй-лы –

Тадз эг чездывлы ме нэм!

Mыйкö колö мем? Кöть кыла –

Вöйпöдö мам югыдлун,

Видзöда пыр ывла вылö,

Оз-ö сэтi тöдса мун...

 

(1867)

 

 

***

Мый ті бара вензяд, видчад,

Морта мортлы фига мыччад?

«Роч мед лоас комиысь…»

Мый ті корчсянныд и кысь?

Мед нö коркö лоас коми

Роч кöть, яран, кöть суоми,

Кöть и коми водзö ло ми,-

Мылкыдджык да озырджык

Лоам мед, кöть этшаник.

 

(1867)

 

 

***

Сандра, сьöлöмшöрöй!

Сьöкыд менам висьöм.

Быд лы разсьöм, торъя,

Куйла кыдзи киссьöм.

Сандра, сьöлöмшöрöй!

Дöзмöді и тэнö:

Сьöкыд öні-й тэныд

Мусалнытö менö.

 

(1867)

 

 

***

Öтпыр зэв мем дзугыль лоис,

Ас пиö эз ло нин тöрöм!

Мый нин? – шуа. Пурт ме босьтi –

Да и вундi… няньысь шöрöм!

 

Мöдысь сьöлöм потлiс шогысь,

Видзöд – гöгöр дзугси, гартчи…

Дыр-ö?.. Шыбитчи ме юö –

Да ме мöдлапöлас вартчи!

 

Коймöдысь ме ёр иолöм,

Кувны ковмис меным бара –

Шыбитчи нин би вылö сэк –

Да и öзтi ме сигара!

 

Пуртöй, ваöй, биöй! Кыдзи

Дона олöмöс тi босьтад?

Шогысь тiянöс ог корсь нин…

Шогъяс! Асьныд менö косьтад!

 

(1867)

 

 

Гуговлöн

Кутшöм коми виршъяс

Сета тэныд рама?

Ода-ö Стефанлы,

Кодысь пышйис Пама?

 

Эпос-ö, кыдз Яг-морт

Важöн овлiс-вывлiс,

Кепысь пöвнас йöзлы

Шондi тупкывлывлiс?

 

Колö-ö легенда,

Кыдзи вöлiс виöм

Коми Михаил князь,

И кыдз абу сиöм

 

Сылы мöдысь кувны?

Гашкö, тэ зэв долыд

Йöктан сьыланкывлысь

Гажмö шуда лолыд?

 

Гашкö, зiля корсян

Трагикöс? Со видзöд

Коми йöзöс: кыдзи

Синватö оз пычöд?

 

Сэн быдсöнлы

Сьöлöм серти волö…

Со тай сiйö – лыддьы,

Кор сатира колö.

 

(1870)


English version
фото В. Иванова