12+.png
Главная О библиотеке Поиск в электронных каталогах Региональный центр Президентской библиотеки Краеведение в Коми Национальная электронная библиотека КИБО Доступная среда
Рейтинг@Mail.ru
 »  »

Обзоръяслöн архив "Лыддьысям комиöн", 2013


1Латышева.jpgЛатышева В. А. Выль коми лирика : монография / Вера Алексеевна Латышева. – Сыктывкар : Кола, 2012. – 176 л. б. Пер. загл.: Новая коми лирика. На коми яз.

Вера Алексеевна Латышева чужис 1933 воын Луздор районса Абъячой сиктын. 1956-öд воын Москваса каналан университет помалöм бöрын пöшти 15 во уджаліс Россияса наукаяс академиялöн Коми наука шöринса кыв да литература юкöнын. Тані лоис искусствоведение кузя кандидатöн. Сэсся велöдіс Коми пединститутын да республикаса велöдысьяслысь тöдöмлунъяс кыпöдан институтын.

1993-öд восянь Вера Алексеевна филологияса доктор.

Донъялö литература да театр. Медводз видлаліс Виттор Савинлысь да Тима Веньлысь нимавтöм пьесаяс, сэсся Геннадий Юшковлысь драматургия, Александр Ларев да Василий Лекановлысь пьесаяс, Иван Куратовлысь да Каллистрат Жаковлысь творчество. Туялö сідзжö сьöлöм вылас воысь авторъяслысь гижöдъяссö, тайö: Иван Торопов, Егор Рочев, Серафим Попов, Владимир Тимин, Василий Журавлёв-Печорский, Александр Суворов, Пётр Столповский, Надежда Мирошниченко, Валерий Вьюхин.

Вера Латышевалöн эмöсь и торъя небöгъяс: «Дыхание паpмы»; «Анализ литературного произведения в школе»; «Конфликт и характер в коми драматургии»; «Певец зырянского края»; «Драматургия и жизнь»; «Зарождение драматургии и театра народа коми»; «Язык поэзии коми» да уна мукöд.

2012 воын Сыктывкарса Кола небöг лэдзанінын Вера Латышевалöн петіс «Выль коми лирика» нима монография. Тані эм «Выль коми кывбур тэчысьяс» нима юкöн, кöні видлавсьö Галина Бутыревалöн «Пас туйын» нима небöг да Александр Лужиковлöн сборник; автор шензьö Михаил Елькинöн Жаковлысь «Биармия» поэма вуджöдöм да Алёна Ельцоваöн пыдісянь олöм кылöм вылö.

«Эм саридз менам – олöм…» нима юкöнын нуöдö сёрни Александра Мишариналöн кывбуръяс йылысь, а «Радейтчан вын» юкöн сиö Владимир Тиминлöн творчестволы. Монографияын сідзжö видлавсьöны Евгений Валерианлöн, Елена Афанасьевалöн, Анжелика Елфимовалöн, Эдуард Тимушевлöн, Нина Обрезковалöн, Олег Уляшевлöн кывбуръясыс.

И сідз, корам тöдмасьны Вера Латышевалöн «Выль коми лирика» нима монографияöн.


1Вавилин_1.jpgВавилин Иван Михайлович (Баярса Иван) : биобиблиогр. пособие / Центр. б-ка им. М. Н. Лебедева ; сост. Г. Р. Изъюрова. – Корткерос, 2011. – 10 с.

2011-öд воын Баярса Иванлы 100 во тыригкежлö Кöрткерöс сиктса Михаил Лебедев нима Шöр библиотека лэдзис «Вавилин Иван Михайлович» нима биобиблиография индöд. Татысь позьö аддзыны гижысь йылысь неыджыд юöр, Серафим Попов да Альберт Ванеевлысь мöвпъяссö, Иван Вавилинлöн гижöдъяс вылö список да сылöн олан туй йылысь литература. Индöд помас сетöма небöг коркаяслысь фотояс. Йöзöдöма кык кывбур: коми вылын «Менам Парма», роч кывйöн - «О моём характере».

Иван Михайлович чужліс Кöрткерöс районса Баяркерöс грездын 1911-öд воын, нимлуныс Виттор Савинкöд öткодь - ноябр 21-öд лун. Улыс тшупöда школа помалöм бöрын уджаліс батьыслöн овмöсын, а сэсся Чöддінса лесопунктын. 14 арöссянь кыдзи селькор чукöртіс газетъясö материал, сэсся велöдчис Помöсдін сиктса колхозса том йöзлöн школаын. Армияысь локтöм бöрын уджаліс «Вöрлэдзысь» республикаса газетын. 1925-öд воын «Коми сикт» газетын йöзöдіс «Вывсянь мича, пытшкöс лёк» медводдза кывбур. 1949-öд воын пырис Россияса гижысьяслöн котырö.

Ыджыд тышлöн медводдза лунъяссянь муніс фронт вылö. Тайö кадö Иван Вавилинлöн петісны «Ни öти шаг бöрö» да «Сöветскöй воин» кывбура сборникъяс.

Разнöй кадö петавлісны «Менам Парма» (1957), Тарас дед (1959), «Дружнöй котыр» (1962), «Зу» (1963), «Мувыв кодзувъяс» (1965), «Миян пароход» (1970), «Сьöлöм сьылöм» (1976) да мукöд торъя небöг.

Иван Михайлович гижліс сідзжö басняяс: «Кöин да сылöн суседъяс», «Сісь пу да сылöн кöзяева», «Сэм да сімöм ем» да посни войтырлы мойдъяс: «Миша вöчö йöв», «Кысук да Серко» да с.в.

Коми вылö вуджöдіс Александр Твардовскийлысь поэма, Тарас Шевченко да Янис Райнислысь кывбуръяс, удмурт да коми-пермяк авторъяслысь некымын гижöд.

«От зари до зари» сборникысь 1973-öд воын Иван Вавилинлы сетісны Иван Куратов нима Государственнöй премия.

Кулі 1975-öд воын, гуалісны Выльгорт сиктын.

И сідз, корам тöдмасьны Иван Вавилинлöн творчествоöн. 


1Мишарина.jpgМишарина А. П. Чужанінын, гортын : кывбуръяс / Александра Мишарина. – Сыктывкар : Анбур, 2013. – 192 л. б. Пер. загл. : На Родине, дома.

Александра Мишарина чужліс Кöрткерöс районса Ыджыд Видз сиктын. Сiйöс тöдö коми, роч, финн, венгр лыддьысьысь. 1990 воын пырис Россияса гижысьяслöн котырö.

1966-öд восянь, Сыктывкарса 1-öд номера педучилищеын велöдчигас на, заводитіс йöзöдчыны. Кывбуръяссö сиис Коми мулы, муса чужанiныслы, Войвыв мичлы, вöр-валы. Висьталöны найö йöз дорö вежавидзöм да радейтчöм йылысь, эмöсь шмонитана кывбуръяс, мукöдлаас гижöма поэт-ань гижö ас йывсьыс.

Кывбуръясыс петавлісны öтувъя сборникъясын да газет-журналын. Вöліны торъя небöгъяс: «Тэ менам - кок ув му» (1977), «Войвыв дзоридз» (1980), «Коми муöй, сьöлöмшöрöй» (1981), «Быдмам Войвылын» (1987), «Рытъя сёрни» (1991), «Сьöлöм дой» (1996), «Машалы козин» (2001), «Шань сьöлöмöн сьыла» (2005).

2013 воын «Анбурын» петіс кывбуралысьлöн öкмысöд асшöр небöг «Чужанінын, гортын», кодöс Александра Петровна эз нин босьт киас. Водзкывсö гижис Анжелика Елфимова. Сборникö чукöртöма Александра Мишариналысь чужан сиктас гижöм кывбуръяс: «Коми Республикалöн чужан лунлы», «Турöб бöрын», «Матын Пöкрöв», «Асъя кывбур», «Ёрткöд сёрни» да уна мукöд.

И сідз, корам тöдмасьны Александра Мишариналöн творчествоöн да сылöн «Чужанінын, гортын» выль кывбура петасöн.


Втюрина Л.З..jpgВтюрина Л. З. Тöвся öшкамöшка : [кывбуръяс] = Зимняя радуга : сборник стихотворений / Л.З. Втюрина (Зарни Люся). - Сыктывкар, 2013. - 97, [3] л. б. - На коми яз.

Людмила Втюринаöс унаöн тöдöны кыдзи Зарни Люсяöс. Людмила Зарниевна чужис-быдмис Изьва районса Кельчиюр сиктын. Помаліс шöр школа, сэсся Перымса каналан культура институт.

1985 восянь зільö Маршак нима челядьлöн Коми Республикаса Национальнöй библиотекаын, юрнуöдö Коми му туялан юкöнöн.

Кывбуръяссö гижö рочöн да комиöн. Зарни Люсялысь гижöдъяссö вуджöдöма эст кыв вылö. Сійö йöзöдчö республикаса газет-журналын. Сылысь кывбуръяссö сідзжö позьö лыддьыны: «Сыктывкар», «Был у меня хороший друг», «Собрание разлук», «У камелька» öтувъя гижöд чукöръясысь.

Людмила Зарниевналöн медводдза небöг петаліс 2006-öд воын «Шоныд дiяс» ним улын. Тайö ичöтик кывбура небöгыс пырис «Шуд войт» нима öтувъя öктöдö. 2010-öд воын «Народная библиотека» серия лэдзис Зарни Люсялысь «Майбыр кад» нима небöг. Аслас кывбуръясын гижысь юксьö майбыр кадся мöвпъясöн, висьталö сьöд кымöръяс да вöтъяс йылысь, сиö гижöдъяссö муса мортыслы, ывлаыслы, шондіыслы, чужан муыслы.

Таво май 27-öд лунö дас кöкъямысöдысь пасйим библиотекаяслысь став Россияса лун. Людмила Зарниевна пыраліс небöг видзысьяслöн лун водзын Коми Республикаса Национальнöй библиотекаö да козьналіс ассьыс «Тöвся öшкамöшка» нима выль петас. Книгасö лэдзöма Коми Республикаса академия госслужбалöн типографияын, 2013-öд воын. Небöгас 100 гöгöр листбок.

Корам тöдмасьны Зарни Люсялöн «Тöвся öшкамöшка» нима небöгöн


1Мишарина А.П..jpgАлександра Петровна Мишарина : [плакатъяс] / С. М. Маршак нима Коми Республикаса челядьлöн Национальнöй библиотека ; лöсьöдiс Н. В. Коваль ; серпасалiс Е. А. Смолева. - Сыктывкар, 2012. - 1 папка (7 отд. л.) : серпас. - (Коми гижысьяс - челядьлы = Коми писатели - детям). - На коми яз.

Александра Петровна Мишарина чужис Кöрткерöс районса Ыджыд Видз сиктын. Сыктывкарса педучилище бöрын некымын во велöдіс чужан сиктас. Сэсся помаліс Сыктывкарса каналан университет. Уджаліс «Войвыв кодзув» журналын, тані йöзöдліс ассьыс медводдза кывбуръяссö.

Александра Мишарина - Россияса гижысьяслöн котырса член, паськыда нималö Комиын, Россияын, сійöс тöдöны Финляндияын, Венгрияын. 1997-öд воын «Сьöлöм дой» кывбура сборникысь Александра Петровналы сетісны Иван Куратов нима Коми Республикалысь Государственнöй премия.

1977 воын петіс «Куим сьыланкыв» нима öтувъя сборник, кытчö вöлі пыртöма Александра Мишариналысь «Тэ менам – кок ув му» медводдза кывбура небöг. Бöрынджык петісны «Войвывса дзоридз», «Рытъя сёрни», «Шань сьöлöмöн сьыла» да мукöд небöгъяс.

Кывбуръяссö сиö Коми мулы, чужанiныслы, вöр-валöн мичлунлы, радейтöмлы. А со кутшöм мича орччöдöмъяс: сувтны эськö пелысьöн, лоны эськö шондiöн, петны эськö тöлысьöн, ывлаыс зэр тусьöн коясьö, асъя кыа шевкнитö нин борд да сідз водзö.

Эмöсь тайö аньыслöн и ичöт войтырлы гижöдъяс. 2012-öд воын Маршак нима челядьлöн Коми Республикаса Национальнöй библиотека дасьтіс «Коми гижысьяс – челядьлы» серияын плакатъяслысь комплект, кытчö пырö «Александра Петровна Мишарина» йылысь 7 плакат. Плакатъяс вылын поэтлöн фото, сылöн олан туй да гижöдъяс йылысь юöр, авторлöн челядьлы сиöм небöгъяс: «Коми муöй, сьöлöмшöрöй», «Быдмам войвылын», «Вильышпоз», «Машалы козин».

Шуам, «Быдмам Войвылын» книга кузя плакат дженьыдика тöдмöдö небöгнас, кыш вывса серпасъяснас да сетöма книгасьыс босьтöм некымын кывбур.  

А «Вильышпоз» небöг кузя плакат вылын - ывлавывса зонка моздорас кутö каньöс, лым вылын пукалöны кык жонь, позьö лыддьыны Васька да Буско йылысь ичöтик кывбуръяс.

И сідз, корам тöдмасьны «Коми гижысьяс – челядьлы» серияысь «Александра Петровна Мишарина» плакатъяса комплект, коді отсалас поэтлысь творчество велöдігöн, кыдзи велöдысьяслы, сідзи и челядьлы да налöн бать-мамлы.


1Дона менам Пысса.jpgДона менам Пысса : кывбур чукöр / лöсьöдiс Н. В. Логинова. - Сыктывкар : Изд-во СыктГУ, 2013. - 35, [1] л. б. : серпас. - На коми яз.

«Дона менам Пысса» нима выль петас лэдзöма 2013 воын, Сыктывкарса каналан университетлöн небöглэдзанiнын. Дасьтöма сiйöс Надежда Логинова. Öтувъя сборникö чукöртöма Удора районса да Пыисдiн сиктын чужлöм йöзлысь гижöдъяссö. Ставныс найö ёна радейтöны ассьыныс чужанiннысö, сэтчöс вöр-васö. Быд кывбурын кылö дой, мый он нин бергöд челядьдыр, казьтылöны чужан сиктын кольöм вояс йылысь, сиöны томлунлы да муслунлы ассьыныс стрöкаяс.

Став авторыс, кодъяслысь гижöдъяссö пыртöма тайö небöгас, гижöмаöсь Пыисдiн сикт йылысь. Сідз, Коми Республикаса нимйöза кывбуртэчысь Альберт Ванеев да коми гижысь Юрий Васютов Пыисдiнö волöм бöрын эз вермыны не сины тайö войвывса сиктыслы ассьыныс гижöдъяснысö. Налöн кывбуръясöн и воссьö «Дона менам Пысса» сборник. Нöшта татчö пырисны : Альбина Бушенёва, Альбина Селиванова, Надежда Логинова, Надежда Христова (Мингалёва), Галина Нифёдова (Бушенёва), Татьяна Бушенёва, Любовь Ванеева (Логинова), Светлана Ванеева (Букина), Светлана Байтынгер (Логинова).

Корам тöдмасьны «Дона менам Пысса» нима выль петасöн.


Торопов.jpgТоропов И. Г. Шуриклы шыд : [висьт] = Бульон для Шурика : [рассказ] / Иван Торопов ; вуджöдiс С. Панкратов ; серпасалiс Ю. Н. Лисовский. - Сыктывкар : АУ РК «Редакция журнала «Арт», 2013. - 46, [1] л. б. : серпас.

Иван Торопов - паськыда тöдса Коми Республикаса нимйöза гижысь. Чужис 1928-öд воын август 27-öд лунö Сыктыв йывса Койгорт сиктын. Уджавліс колхозын, вöр кылöдчанiнын. 1954-öд восянь оліс Сыктывкарын. Помаліс рытъя школа, сэсся литературнöй институт.

Шоныд кывъясöн казьтывліс бать-мамсö. Найö гöтрасьлöмаöсь томöн, помавлöмаöсь нёль тшупöда школа. Батьыс - колхозса председатель, усьöма фронт вылын. Мамыслы вöлöма сöмын 35 арöс.

Унаöн радейтöны И. Тороповлысь «Кöні тэ, кар?» да «Проса рок» висьтъяс, «Регыд дас квайт» да «Но, биа-бордаяс!» повесьтъяс, «Чужин кö мортöн» роман да уна мукöд гижöд. Нöшта сылöн эм очеркъяс да кывбуръяс.

Буретш дас во сайын, 2003-öд воын, петавліс куим небöгö öтувтöм гижöд чукöр, кытчö пыртöма нималана гижысьлысь висьтъяс, повесьтъяс, пьесаяс, очеркъяс, статьяяс, кывбуръяс, интервью, автобиография, челядьлы лыддьöм вылö гижöдъяс.

Вуджöдліс коми кыв вылö Гогольлысь «Гöтрасьöм», Тургеневлысь «Кутшöм мичаöсь, кутшöм том-вежöсь вöліны розаяс».

1984-öд воын «Тіянлы водзö овны» книгаысь Иван Григорьевичлы сетісны Горький нима Россияса Государственнöй премия, «Кöні тэ, кар?» небöгысь - Коми АССР-са Куратов нима Государственнöй премия.

Кулі Иван Торопов 2011-öд вося апрель 21-öд лунö.

2013 воын «Арт» журнал козьналіс школаын коми кыв да литература велöдысьяслы да шöр арлыда велöдчысьяслы «Шуриклы шыд» нима небöг. Неыджыд петасысь позьö лыддьыны коми да роч кывъяс вылын тайö висьтсö, а сэсся тöдмасьны «О рассказе И.Г. Торопова «Шуриклы шыд» статьяöн, кодöс гижис педагогическöй наукаса кандидат, литературовед В.А. Лимерова.

«Шуриклы шыд» висьт пырö школаса программаö. «Мелехинскöй цикл» артмöдысь гижöдъяс велöдöны «Литература народов Российской Федерации» курс вылын.


1ижем. характ..jpgИжемский характер : сб. произведений ижем. авт. / Никон Хатанзейский и др. ; лöсьöдiс А. Попов ; серпасалiс В. Истомин. - Сыктывкар : Титул, 2012. - 101, [1] л. б. : серпас. - На коми, рус. яз.

«Ижемский характер» нима небöгö пыртöма Изьва районса авторъяслысь кывбуръяс да проза, роч да коми кывъяс вылын. Тайö öнія кадö гижысьяс: Никон Хатанзейский, Людмила Втюрина, Любовь Ануфриева, Семён Терентьев, Александр Поташёв, Степан Семяшкин, Алёна Дедяева, Иван Семёнов, Владимир Истомин да мукöд. Сборниксö отсаліс лэдзны партия «Единая Россия».  

«Ижемский характер» небöгö пыртöма и Татьяна Кирпиченколысь куим висьт да кывбуръяс. Том гижысь чужöма Новосибирскын 1990 воын. Овлöма Ухта кардорса Боровöйын, сэсся Изьва районса Діюр грездын. Красноборын помалöма шöр школа. Öні велöдчö Сыктывкарса университетын. Йöзöдчö «Новый Север», «Радуга», «Коми му» газетъясын да «Войвыв кодзув» журналын.

Ассьыс висьтъяссö сиö матысса йöзлы. Шуам, «Куим лун да нэм» - Ольга Тиуковалы, «Миян ичöтик герой» - Лида чойыслы, а «Мыжаяс» сиö Лена Логиновалы.

Нöшта öти ним - Надежда Вокуева. Чужöма Кöрткерöс районса Шойнаты сиктын. Помалöма Сыктывкарса канму университет. 1979-öд восянь олö Изьваса Мошьюга грездын, велöдö школаын коми кыв да литература. Йöзöдчö «Войвыв кодзув» журналын. Тайö öктöдас пыртöма сылысь квайт кывбур.

Василий Чупровлы сöмын на 20 арöс. Помаліс том филологъяслысь гожся университет. Öні велöдчö Сыктывкарса канму университетын. Гижö кывбуръяс.

И сідз, тöдмасьöй «Ижемский характер» нима небöгöн да Изьва районса авторъяслöн гижöдъясöн.


Лужиков1.jpgЛужиков А. М. Лэбö лолöй енэж шöртi : кывбуръяс = За душою следом : стихи / Александр Лужиков ; лöсьöдiсны: Г. А. Попов, Н. А. Обрезкова. - Сыктывкар : АУ РК «Редакция газеты «Коми му», 2012. - 127, [1] л. б. : серпас. - На коми, рус. яз.

Александр Михайлович Лужиков чужис Кулöмдін районса Кекур грездын. Помаліс Сыктывкарса педучилище, сэсся Горький нима Литературнöй институт. Уджаліс радиоын, вöлі «Би кинь» журналын шöр редакторöн. 1991-öд восянь пырис Россияса гижысьяслöн котырö.

Олігас на петавлісны «Ме тэнö радейта» (1989) да «Енэжшöрса ордым» (1994) кывбура небöгъяс. Сылысь кывбуръяссö позьö аддзыны «Парма гор» нима литературно-художественнöй гижöд чукöрысь, куим книгаа «Коми челядьлы антологияысь»; 5-öд, 8-öд, 11-öд классъясын велöдчан да лыддьысян «Коми литература» небöгъясысь. Кывбуралысь йылысь эмöсь статьяяс «Югыд туй» (öнія «Коми му»), «Ленин туйöд» (öнія Парма гор), «Красное знамя», «Вечерний Сыктывкар», «Голос строителя» газетъясын.

Александр Лужиковлöн вöлі дженьыд нэм.

2012-öд воын удж ёртъясыс лэдзисны «Лэбö лолöй енэж шöрті». Кывбура небöг петіс «Коми му» редакцияын, дасьтöмö уна вын пуктісны Андрей Попов да Нина Обрезкова. Öні поэтлöн кывбуръяс лоины гöгöрвоанаöсь не сöмын коми, но и роч лыддьысьысьлы. Роч вылö вуджöдöмъяссö вöчисны Андрей Попов, Сергей Филатов, Дмитрий Фролов, Владимир Сорочкин, Виктор Стрелец, Владимир Лавров, Валерия Салтанова.

Водзкывсö гижöма Борис Лукин. Сійö пасйö, мый небöг вылын уджалігöн петкöдчöма коми поэзиялöн аслыспöлöслуныс. Книгалöн петöм сетö позянлун роч филологъяслы пырöдчыны поэтлöн творчествоö.

И сiдз, корам тöдмасьны Александр Лужиковлöн «Лэбö лолöй енэж шöрті» кывбура небöгöн.


Белых.jpgБелых И. И. Кöмтöм кока челядьдырöй! : висьтъяс / Иван Белых ; серпасалiс Е.М. Коюшева. - Сыктывкар, 2012. - 238, [2] л. б. : серпас. – Пер. загл.: Моё босоногое детство. – На коми яз.

Иван Ильич Белых - Коми Республикаса заслуженнöй уджалысь, пырö Россияса журналист да гижысь котыръясö, Коми Республикаса Правительстволöн премияа лауреат.

Чужис Сыктывдін районса Паль сиктын. Коми пединститут помалöм бöрын уджаліс «Югыд туй» (Коми му) газетын корреспондентöн, отделöн веськöдлысьöн, редакторöс вежысьöн. Кутшöмкö кад вöлі шöр редакторöн Коми небöглэдзанінын, сы бöрти веськöдліс «Йöлöга» газетын литература да искусство отделöн. Сэсся бара уна во зілис «Коми му» газетын. Öні пенсия вылын, но газет-журналкöд топыд йитöдсö оз орöд.

Иван Белыхлысь висьтъяссö йöзöдлісны «Войвыв кодзув», «Север», «Би кинь», «Чушканзі» журналъясын, «Коми му», «Йöлöга», «Красное знамя», «Радуга», «Республика» газетъясын да литера­турнöй альманахъясын.

Коми лыддьысьысь бура тöдö сылысь челядьлы сиöм торъя небöгъяссö: «Гуся керка», «Челядьдырся параходъяс», «Важыс уськöдчывлö вöтöн», «Öзйы, бипурöй менам».

И со нöшта öти асшöр небöг «Кöмтöм кока челядьдыр». Выль 2012-öд вося петасö пыртöма 70-ысь унджык висьт: «Сьылысь Улляна», «Вуграсигöн», «Медводдза букварь», «Визув шор», «Вöлі мича арся лун», «И воис гажа тулыс» да уна мукöд. И. Белыхлöн шöр геройясыс – шань да чужанінсö пыдди пуктысь войтыр. Аслас казьтылöмъяс отсöгöн гижысь вайöдö лыддьысьысьöс коми сиктö, тöдмöдö посни войтырлöн олöм-вылöмöн да налöн тöжд-могöн. Висьтысь висьтö зонпосни верстяммö, лоö вежöраджыкöн да тöлкаöн.


Рочев Я..jpgХозяинов В. Певец Печорского края : [воспоминания о жизни и творчестве коми писателя Я. М. Рочева] / Валерий Хозяинов. - Ухта, 2011. - 119, [1] л. б. : серпас, фот. - На коми, рус. яз.

Коми классик Яков Митрофанович Рочев, Коми АССР-са наука да культураын заслуженнöй уджалысь, Иван Куратов нима Коми АССР-са Государственнöй премияа лауреат, творчествоын вермöмъяссö пасйöма «Знак Почета» орденöн.  

Чужлiс Яков Рочев 1909-öд вося тöв шöр 23-öд лунö Усть-Ухта сиктын, сэки - Архангельск губерния, Печора уезд, а öнi - Сосногорск район. Помаліс Коми пединститут. Уджавлiс учительöн, сэсся корреспондентöн Изьва районса «Красная Печора» газетын, вöлi редакторöн Коми небöглэдзанiын да «Войвыв кодзув» журналын. 1942-öд восянь пырис СССР-са гижысь котырö. Кулi 1977-öд воын. 

Гижысьöс бура тöдöны «Кык друг», «Изьва гызьö» да «My вежöм» трилогия серти. Романъясын висьтавсьö революция да гражданскöй война дырйи лоöмторъяс йылысь. Коми классиклысь гижöдъяссö вуджöдöма роч да украинскöй кывъяс вылö.

«Певец Печорского края» небöг Валерий Хозяинов сиöма Яков Рочевлы, аслас земляклы. 2011 вося книгаö пыртöма 20 сайö статья, кодъясöс гижисны сылöн ёртъясыс. Казьтылöмъяссö сетöма комиöн да рочöн. Эмöсь фотояс.

Эм тані Яков Рочевлöн «Паськыд туй вылö ме пета» дневникысь лист бокъяс. Александра Мишариналысь казьтылöмъяссö нимтöма «Льöмъюын». Сетöма сідзжö 1996-öд вося «Коми му» газетысь «Друг йылысь» статья, кöні Яков Рочев казьтылö Василий Юхнинöс, эм кык ёртлöн фото.

Диана Григорьевна Холопова тöдмöдö «Восьлалiм олöмас орччöн» нима статьяöн. Архив видлалiгöн сылы сюрöма Василий Юхнинöн Рочевлы гижöм письмöяс.

Коми небöглэдзанiнын вöвлöм директор Степан Раевский казьтылö ёртсö «Менам друг йылысь кыв» гижöдын.


Мальцев.jpgМальцев Н. В. Енкай : повесьтъяс, висьтъяс / Николай Мальцев ; ред. Е. В. Козлов ; сепасалiс Н. Мальцев. - Сыктывкар : Кола, 2012. - 253, [3] л. б. : серпас. - Пер. загл.: Божья птица. - На коми яз.

Николай Васильевич Мальцев чужліс 1932 вося апрель 29 лунö Сыктыв районса Волся сиктын. Служитіс Армияын. Помавліс педагогическöй да техническöй училищеяс, Коми пединститут. Уджавліс велöдысьöн да вöлі завучöн. Öні пенсия вылын. Серпасасьö, гижö кывбуръяс, проза.

2012 воын Николай Васильевичлöн петіс «Енкай» нима öтувъя небöг. Татчö пырисны повесьтъяс да висьтъяс, унджыкыс Ыджыд тыш да коми сикт йылысь. Водзкывсö гижöма профессор Вера Алексеевна Латышева. Небöгыс воссьö «Енкай» повестьöн. «Öдзöс вуг» нима висьт тöдмöдö важся кадысь босьтöм збыльторъясöн. А «Шпанаяс» гижöд висьталö вöвлöмторъяс йылысь. Эмöсь сідзжö татшöм висьтъяс, кыдзи: «Кызь нёль», «Эн менö джагöд, мамö», «Мыйысь?», «Кык лопта пелыс» да сідз водзö.


Серафим Попов 001.jpgПопов С. А. Войвыв кодзувлань туй : кывбуръяс, поэмаяс, казьтылöмъяс = Дорога к Полярной звезде : стихи, поэмы, воспоминания / Серафим Попов ; лöсьöдiс Н. А. Обрезкова ; серпасалiс Ю. Н. Лисовский ; Союз писателей Республики Коми. - Сыктывкар : Коми Республикаса гижысь котыр, 2012. - 382, [2] л. б. : серпас, фот. - На коми, рус. яз.

Видза оланныд, дона радиокывзысьяс! Талунъя уджтасын корам Тiянöс тöдмасьны медводдза нимйöза поэт, журналист, фронтöвик Серафим Поповлöн творчествоöн. Чужліс сійö 1912-öд вося декабр 26-öд лунö, а выль стиль серти кö - 1913-öд вося тöвшöр (январ) 7-öд лунö Вöлöгда губернияса Усть-Сысольск уездса Зöвсьöрт сиктын (öнія Емдін район).

Серафим Попов миян литератураö пырис кыдз кывбур гижысь, коді восьтіс коми кывлысь тöдлытöм на мич. Со кывзыштöй сылысь öти кывбур.

Аслас произведениеясын «Сталинградскöй баллада» да «Генерал Микушев да сылöн 41-öд стрелковöй дивизия йылысь баллада» авторыс петкöдлö йöзöс, кодъяс оз повны кулöмысь да олöны мöвпöн, мый колясны историяö нэмъяс чöж. А «Машук» да «Вошлöм морт» поэмаясын поэт индö, мый сійö кадся йöзлы шудыс эз вичмы, век вöлі кутшöмкö тыш либö неминуча. А öд йöзыс эскылісны аскиа шуда лунö.

И со выль петас, шусьö «Войвыв кодзувлань туй». Книгасö сиöма Серафим Поповлöн чужöмсянь 100 во тыригкежлö. Дасьтіс сійöс Нина Обрезкова. Небöгö öтувтöма кывбуръяс, балладаяс, поэмаяс, рöдвужыслысь да ёртъясыслысь казьтылöмъяс. Снимокъяссö босьтöма Серафим Попов семьялöн архивысь, Коми Республикаса гижысь котыр, «Войвыв кодзув» журнал да республикаса Национальнöй музей фондъясысь. Гижöдъясыс коми да роч кыв вылын.

Сборникыс воссьö «Поэзияыс сьöлöмтö вöрзьöдö» нима водзкывйöн, кодöс гижис Коми республикаса нимйöза поэт Владимир Тимин. Сійö тöдчöдö, мый унджык гижöдыс тöдса, но кор выльысь лыддян, век гумовтан мыйкö выльöс, гöгöрвоан олöмсö пыдісяньджык. Серафим Поповлы дона чужан муыс, аслас поэзияöн сійö пыр чуксаліс видзны веж Парма, вöр-ва. Со татшöм бурсиöм кылö сылöн кывбурын: «Чужан му джынвыйö шуда сійöн, Мый сылöн нин эм. Том войтыр асланыс уджöн Тэчасны мичаджык нэм». Сетöма роч кыв вылын нималана литературовед Владимир Дёминлысь да Серафим Поповлысь статьяяс. Эмöсь тані водзынджык петлöм «Фронтöвöй туй», «Миян войвыв», «Ме славита мир», «Дружба йылысь стихъяс», «Лöз енэж улын», «Муслун» да мукöд небöгъясысь юкöнъяс.

«Войвыв кодзувлань туй» небöг серти Национальнöй библиотека декабр помас нуöдіс поэтöс нимöдана рыт. Волісны сылöн рöдвужыс, нывъясыс, Анатолий Попов. Диана Холопова, Иван Куратов музейöн веськöдлысь, сёрнитіс презентация вылын да бур кывйöн казьтыліс поэтöс. Выль книгаысь позьö лыддьыны Диана Григорьевналысь «Огö вунöдöй» нима статья. Ме лыддя тіянлы татысь неыджыд юкöн с. 213.

Небöгысь позьö аддзыны поэт йылысь казьтылöмъяс Вера Латышевалысь, Николай Щукинлысь, Иван Белыхлысь, Юрий Ионовлысь, Нина Куратовалысь да уна мукöд гижысьлысь.


Лöсьöдiс В.Н. Казаринова


English version
фото В. Иванова