12+.png
Главная О библиотеке Поиск в электронных каталогах Региональный центр Президентской библиотеки Краеведение в Коми Национальная электронная библиотека КИБО Доступная среда
Рейтинг@Mail.ru
 »  »

Обзоръяслöн архив "Лыддьысям комиöн", 2012

1Василий Лодыгин.jpgЛодыгин В. Г. Чибльöг : кывбуръяс, серпасъяс / Василий Лодыгин ; ред. В. И. Трошев ; фот. В. Г. Лодыгин [и др.]. - Сыктывкар : Анбур, 2012. - 191, [1] л. б. : фот. – Пер. загл.: Берестяной черпачок. - На коми яз.

Василий Лодыгин чужис Усть-Кулом районса Габово грездын. Сыктывкарса пединститут помалöм бöрын уджаліс республикаса радиоын, «Коми му» газетлöн редакцияын. Öні зільö Эжва йывса войтырлöн «Парма гор» газетын. Василий Григорьевич - Коми республикаын культураса заслуженнöй уджалысь, пырö Россияса журналист да гижысь котыръясö, Иван Куратов нима Коми Республикаса Государственнöй премияа лауреат.

Петавлісны торъя небöгъяс: «Вуграсигöн», «Менам улича», «Ставыс на водзын», «Мича лун», «Вуджанiн», «Мусукасян рöм», «Гыбад», «Чалльöг» да мукöд. Василий Лодыгинлысь кывбуръяссö вуджöдöма мукöд йöзлöн кывъяс вылö. Йöзöдчö «Би кинь», «Войвыв кодзув», «Север» журналъясын; «Парма гор», «Выль туйöд», «Звезда», «Маяк Сысолы», «Молодежь Севера» да «Коми му» республика газетъясын.

«Чибльöг» нима выль небöг лöсялас став арлыда йöзлы: верстьöлы, и томлы. Вöр-ва йылысь кывбуръясын да серпасъясын тыдалö гижысьлöн чужан му дінö помтöм муслун. Торйöн нин лöсялас школаын велöдчысьяслы, мед найö гöгöрвоасны, мый вöр-ва – тайö олöмлöн подув, татчöс войтырлöн оланног. Сборникö пыртöм кывбуръяссö да серпасъяссö юклöма циклъяс вылö: «Тані олö шоныд руöн Нэмсö бордъя коми йöз»; «Овны велöдö и вöр, Тшöтш и визув юыс»; «Пармаыс менам и батьöй, Пармаыс менам и мам»; «Пипу пыжöн ката чужанінöд, Кыркöтш йылö петіс гажа яг», «Менам потшöсöй öдвакö пöрас, Сійö – нэмъясöн сулалысь вöрыс», «Миянлы медся öд дона Эжва йыв – ас чужан му»; «Китыр морта грездöй Менам медся рай», «Тайö гажа Парма вылыс – Миян муса чужанін»; «Тані майбыралö лов, Тані муса ставыс».


3Надежда Павлова.jpgПавлова Н. М. Кор алöй биöн ойдас лежнöг : кывбуръяс / Надежда Павлова ; ред. А. Г. Елфимова ; серпасалiс Н. И. Гиголян. - Сыктывкар, 2011 (Йошкар-Ола). - 174, [2] л. б. : серпас. - Пер. загл.: Когда зацветёт шиповник. - На коми яз.

Надежда Павлова чужліс Емдiн районса Семуков сиктын. Помаліс Перымса культура институт. Уджавліс аслас районса юрсиктса культура керкаын, «Радуга» шöринын. Öні олö Сыктывкарын, зільö Коми национальнöй гимназия бердын педагог-организаторöн. Надежда Павлова - Республикаса литературнöй «Эзысь борд» конкурсса лауреат.

Гижö школасяньыс. Кывбуръяссö йöзöдліс Емдiн районса «Вперёд» газетын, «Войвыв кодзув» журналын.

Выль небöг «Кор алöй биöн ойдас лежнöг» лоö коймöд кывбурчукöрöн. Петіс 2011-öд воын. Надежда Павловалöн кывбуръясын тыдалö аслыспöлöс киподтуй да видзöдлас. Сійö гижö Ай му йылысь, сьöлöмыслы дона йöз йылысь, чужан Семуков сикт йылысь. Кывбуръясыс юклöма циклъяс вылö : «Эзысь бордъя чужанін», «Крестöн юр весьтті нуöдіс тöлысь», «Сьöлöм бытшкöд – олöм пасъяс», «Вай, зэрö, сьылышт, лöньöд дой – Мед воам став ас ордымö», «Сьылысь тöвру», «Туй ни сьылан мед эз помась». Небöгын эм водзкыв, кодöс гижöма Владимир Тимин, Коми республикаса нимйöза гижысь. Сійö тöдчöдö, мый Надежда Павловалöн поэзияын аслыспöлöс сюрöс да тэчанног, эм мича сигöртöм. Чужан мулы сиöм гижöдъясыс шоныдöсь, а радейтчöм йылысь кывбуръясын кылö радлун да кыпыдлун. Кывбуралысь век аддзö мыйкö выльöс, быд кывбурын дзирдыштöны кывмичьяс: «менам юмов шог», «шуд войт», «шондікöд муслун катовтчö» да с.в. Надежда Павловалысь кывбуръяссö вуджöдöма мари да мокша кывъяс вылö.


2Виктор Напалков 001.jpgНапалков В. Е. Войся ангел : роман, повесьт / Виктор Напалков ; ред. В. И. Трошева ; серпасалiс М. Беллон ; АУ РК Редакция газеты «Эскöм», ООО «Анбур». - Сыктывкар : Эскöм, 2012. - 412, [4] л. б. : серпас. - Пер. загл.: Ночной ангел. - На коми яз.

Виктор Напалковлöн нимыс уна во тöдса лыддьысьысьяслы. Чужліс Кулöмдін районса Джеджим грездын. Помаліс Ухтаса лесотехническöй техникум. Виктор Егорович - Коми республикаса заслуженнöй уджалысь, 1991 восянь пырö Россияса гижысьяслöн котырö. Медводдза кывбуръяссö йöзöдліс 1958-öд воын «Войвыв кодзув» журналын, а медводдза повесьтсö «Козьнав мортлы муслун» - 1974-öд воын.

Гижö висьтъяс, повесьтъяс да кывбуръяс, кодъясöн автор корö лоны йöзсö шаньджыкöн да сöстöмджыкöн. Шöр геройяс – бать-мам да налöн челядь, том йöз, сиктса олысьяс, вöвлöм фрöнтöвикъяс. Гижöдъяссö йöзöдліс сідзжö «Россияне» журналын, «Югыд туй» да «Коми му» республикаса газетъясын, «Куим сьыланкыв» да «Антология коми поэзии» öтувъя небöгъясын.

Эмöсь торъя небöгъяс: «Козьнав мортлы муслун», «Чолöм и прöщай», «Туйвежъяс», «Ме тіянöс радейта», «О, Енмöй!...», челядьлы сиöм «Миян Пиля дед», «Кöсъя тöдмасьны» да мукöд.

Талун корам тöдмасьны «Войся ангел» нима выль небöгöн. Петіс 2012-öд воын «Эскöм» газет редакцияын. Татчö пыртöма книгакöд öткодь нима роман да «Шойтöм крест» повесьт. Видлöг вылö босьтам «Войся ангел» роман, кöні петкöдлöма коми войтыр олöмысь ыджыд кадколаст. Автор висьталö репрессия кад йылысь, война да öнія кад йылысь.

Шöр геройяс пиысь öти, Як Марья, том дырйиыс кузь сьöд кöсаа мича ныв, 1940-öд воын петіс верöс сайö Емель Вань сайö. Лöсьыда пансьöм олöмсö гозъялысь торкис война. Вочасöн мужиктöммис Ягдор сикт, фронт вылö босьтісын пыр выль и выль йöзöс.

Öнись Пекла да Уркай Зось - вöвлöм гозъя. Пеклакöд торйöдчöм бöрын овмöдчис Юсьбöжö. Уркай Зось, ар комына мужичöй, латшкöс тушаа, паськыд пельпома, гражданскöй война вылысь воöм морт, гöтрасис ёртыслöн Клава чой вылö. 1941-öд воын муніс фронт вылö, война вылысь локтіс 1943-öд воын сой пöлаöн да морöсас некымын наградаöн.

Еншор сиктса олысьяскöд öтлаын лыддьысьысь вермас нимкодясьны и шогсьыны, радейтны и вежöгтыны.


Тимин.jpgТимин В. В. Важ пöльяслöн му вылын : кывбуръяс, поэма = На земле предков : стихи, поэма / Владимир Тимин ; лöсьöдiс А. Г. Попов ; серпасалiс Ю. Н. Лисовский ; вуджöдiсны : А. Попов, Ю. Ионов, Н. Мирошниченко [и др.]. - Сыктывкар, 2011. - 508, [2] л. б. : серпас.

Корам тiянöс тöдмасьныс нимйöза поэт Владимир Тиминлöн выль небöгöн, нимыс сылöн «Важ пöльяслöн му вылын». Татчö пырисны сылöн кывбуръясыс да поэма. Эмöсь и тöдса нин кывбуръяс, и неважöн на гижöмаяс. Быд кывбур вуджöдöма роч кыв вылö. Вуджöдчысьясыс : Андрей Попов, Александр Суворов, Юрий Ионов, Александр Алшутов, Надежда Мирошниченко да мукöд. Лыддьысьысьлöн эм позянлун донъявны, кыдзи поэтлысь мöвпъяссö вуджöдöма роч кыв вылö. Юриндалысь вöчöма куим пельö, юкöнъяссö нимтöма со тадзи : «Мед мичсö сьöлöм восьтас тэд…», «Тэ менам югыд шуд», «Любовь и счастье властвуют во мне...».

Кывбуръясыс Владимир Васильевичлöн петöны сьöлöмсяньыс, кокниа лыддьысьöны. Наын кылö и чужан сиктыс, и войвыв юыс, и öнія да важ олöм вылö аслас видзöдласыс. Унатор йылысь гижö кывбуртэчысь, но шöр визьнас лоö Чужан му дорö муслун.

Öктöдö пырисны сiдзжö миян республикаса поэтъяслöн кывбуръясыс, кодъясöс комиöдiс Владимир Тимин. Тайö Валерий Вьюхин, Юрий Ионов, Андрей Канев да мукöд. А гöгрöстöны небöгсö роч кывъя кывбуръяс.

Владимир Тиминлöн «Важ пöльяслöн му вылын» выль небöг лоö коланаöн и коми, и роч лыддьысьысьлы.


Егор Рочев.jpgРочев Е. В. Кутшöмöсь асьным : «Кузь вöт» да мукöд гижöдъяс / Егор Рочев ; серпасалiс Е. Григорян. - Сыктывкар, 2011. - 318, [2] л. б. : серпас. – Пер. загл. : Какие мы сами : «Долгий сон» и другие произведения.

Корам тiянöс тöдмасьны Е.В. Рочевлöн «Кутшöмöсь асьным : «Кузь вöт» да мукöд гижöдъяс» выль петасöн. Небöгсö лэдзöма 2011 воын гижысьлöн 75 арöс тыригкежлас.

Егор Васильевич чужис тундраын кöр видзысьяслöн семьяын. Коми Республикаса заслуженнöй уджалысь. Пырö Россияса гижысьяслöн котырö.

Некымын во сайын «Кутшöмöсь асьным» ним улын Егор Рочевлöн петаліс очерк, кöні олöмын петкöдчысь лёкторъяслы паныд сійö аддзис мöрччана кывъяс. Гижöд öктöдыс воссьö «Тундраса кутш» висьтöн. Шöр герой, Проньö Саватей, воштö кык пöв уджалысь öтка синсö, а вежöрнас пöрысь кöр видзысь аддзö олöмсö ичöт Митруклöн синъясöн.

Книгаö пырисны Егор Рочевлöн медбур висьтъясыс: «Сöмын милицияö эн сюрöдчы», «Висьмис пинь», «Сет, мый тшöктіс мамыд», «Тöварыш Кöсьта»; повесьтъяс: «Дзолюк», «Кöрысь тэрыбджык», «Кузь вöт», «Тер Мишлöн висьтасьöм». А эштöдö небöгсö «Корся пельетон» гижöд. Öктöдö пыртöм унджык висьт-повесьтсö позьö аддзыны водзынджык петавлöм «Морттуй» (1991) да «Кузь вöт» (1998) нима небöгъясысь.

Егор Рочев тöдса кöр видзысьяслöн олöмöн, уджöн, тундралöн гусяторъясöн. «Кузь вöт» нима повесьтын авторыс висьталö шöр герой Бомж Вась йылыь. Гижысь оз дивит мужичöйöс, коді лэччысис вина юöм улö, а сыкöд öтшöтш майшасьö, корсьö воча кыв, мыйла тадзи лои? Индö помкаяссö, кодъяс вайöдісны мортöс бомж туйöдз. Вась шань морт, небыд сяма, ёртъясыс быдмисны служба кузяыс, а сійö тапикасьö öти местаын. Гöтырыс видö, сы вöсна Вась удж бöрас кутiс сёрмöдчыны, а гортас сійöс дугдiсны пыдди пуктыны.

Сылысь гижöдъяссö позьö лыддьыны «Войвыв кодзув», «Арт», «Север», «Молот» журналъясысь, а сідзжö роч кыв вылын «Живая вода» да «Плоты плывут» öтувъя небöгъясысь.


Коми челядьлы антология / [лöсьöдіс Е. В. Козлова ; серпасалiс В. А. Клейман]. - Сыктывкар : Анбур, 2009-2010. – Пер. загл.: Антология коми детской литературы. – На коми яз.

антология-1.jpg антолог.-2.jpg антология-3.jpg

Медводдза небöг : [кывбуръяс, сьыланкывъяс, висьтъяс, мойдъяс]. - 2009. - 222, [2] л. б. : серпас. - Пер. загл.: Первая кн. : [стихи, песни, рассказы, сказки].

Мöд небöг : [кывбуръяс, сьыланкывъяс, висьтъяс, мойдъяс]. - 2010. - 350, [2] л. б. : серпас. - Пер. загл.: Вторая кн. : [стихи, песни, рассказы, сказки].

Коймöд небöг : [кывбуръяс, висьтъяс да мойдъяс]. - 2010. - 334, [2] л. б. : серпас. - Пер. загл.: Третья кн. : [стихи, рассказы и сказки].

Коми челядьлы куим небöга антология лöсьöдіс Елена Козлова, коми гижысьяслöн котырöн веськöдлысь. Коми челядьлы куим небöга антологияысь Елена Васильевна Козловалы таво сетісны Коми Республикаса Правительстволысь премия да лауреат ним. Антологиясö дасьтыны отсалісны Зинаида Прошева, Зоя Остапова, Валентина Лимерова да мукöд. Небöгö пырисны коми гижысьяслöн медбур гижöдъясыс. «Коми челядьлы антология» медводдза небöгö пыртöма кывбуръяс, сьыланкывъяс, висьтъяс да мойдъяс медся посни челядьлы лыддьöм вылö, кодъясöс гижисны Вячеслав Бабин, Альберт Ванеев, Юрий Васютов, Сергей Куликов, Александр Лужиков да мукöд.

Антологиялöн мöд небöг кутö ас пытшкас кывбуръяс, сьыланкывъяс, висьтъяс да мойдъяс посни челядьлы лыддьöм вылö, кодъясöс гижисны Иван Белых, Михаил Лебедев, Егор Потапов, Зоя Шиликова, Николай Щукин да мукöд.

Коймöд (бöръя) небöгö пыртöма кывбуръяс, висьтъяс да мойдъяс челядьлы лыддьöм вылö Альбина Ануфриевалысь, Пётр Бушенёвлысь, Иван Коданёвлысь, Нина Куратовалысь, Василий Лодыгинлысь, Соломония Пылаевалысь да мукöд авторъяслысь.

Антология лоö колана небöгöн гортын да школаын лыддьöм вылö, а сідзжö позьö котыртны лыддьысьöмъяс посни челядьöс видзанінъясын.


Асъя кыа1.jpg

Некрасов А. И. Асъя кыа : сьыланкывъяс, кывбуръяс, висьтъяс / Александр Некрасов (Гамса). - Сыктывкар : Кола, 2011. - 126, [2] л. б. : фот.

Александр Иванович Некрасов - Емдін районса Гам сиктса олысь. Чужліс 1931-öд воын. Школа помалöм бöрын велöдчис Сыктывкарса учительскöй институтын. Чужан сиктас, комын куим во чöж вöлі шöр школаса директорöн, велöдіс математика. Александр Иванович - Коми АССРса нимöдана велöдысь да Емдiн районса пыдди пуктана олысь.

Гижысьлöн петавлiсны небöгъяс: «Восьтiс öшиньсö кыа», «Авъя лэбач – коми кыв», «Гöрд сатин дöрöм», «Шудыд-тэрыб лэбач», «Таланты были, есть и будут», «Чужанінöй менам-мыла сьыланкыв», «Олöмыслöн рöмпöштан», «Они ковали Победу».

Öнi тöдмасьöй «Асъя кыа» нима коми кывъя выль петасöн. Татчö пырисны Александр Некрасовлöн бöрйöм гижöдъясыс: сьыланкывъяс, кывбуръяс да висьтъяс. Аслас гижöдъясын сійö висьталö сиктса нывкаяслöн да зонкаяслöн олöм-вылöм йылысь, налысь вöр-вакöд топыд йитöд да чужан му дорö помтöм муслун; пемöсъяс, лэбачьяс да вöр-ва йылысь. Небöгыс петіс «Кола» небöглэдзанінын.


Гавкалон палича1.jpgКлимов В. В. Гавкалöн палич : повесьт / Василий Климов ; вуджöдiс М. А. Плоскова ; рец.: И. И. Белых, Р. П. Попова ; серпасалiс А. В. Мошев. - Сыктывкар : Кола, 2011. - 165, [3] л. б. : серпас.

Мария Алексеевна Плоскова - коми кыв велöдысь, Россияса журналист котырса член, Россияса Федерациялöн тöдöмлунъяс сетöм кузя отличник. Чужис Кулöмдін районса Улыс Воч сиктын. Сыктывкарса каналан университет помалöм бöрын велöдіс школаясын. Мария Алексеевна пырö велöдчысьяслы учебникъяс дасьтан котырö, лоö Национальнöй библиотекалöн попечительöн.

Мария Плосков вуджöдiс коми кыв вылö Василий Климовлысь небöг «Гавкалöн палич». Василий Климов – коми-пермяк, гижысь, фольклорист, этнограф. Чужис-быдмис Перым муын. 1968 воын гижліс челядьлы повесьт «Гавкалöн бедь», кöні висьталіс челядьдырся кад йывсьыс. Петька - сиктса зонка, мöсъясöс видзигöн тöдмалö Жысь Ёгорсянь уна миф да легенда. А Гавкалöн палич йылысь легенда ышöдö детинкаöс фронтлы отсöг сетöм вылö корсьны чудьяслысь озырлунсö. Заводитчö небöгыс «Сьöкыд тулыс» юкöнсянь. Водзö авторыс тöдмöдö Ёгор пöлькöд, кодi висьталö Гавка йылысь висьт. Багатыр Гавка - чудь рöдысь, зэв вына, киас - сус пуысь вöчöм кызь пудъя палич, кодлысь воропсö мичмöдöма дона изъясöн, йывсö дорöма югыд зарниöн. Иньватö воськовтлöма öти воськолöн, сёйлöма куим морт мында.

Небöг бердас пуктöма DVD диск, кытысь позьö кывзыны «Гавкалöн палич» повесьтсö да авторыслысь ас йывсьыс висьталöмсö. А нöшта тайö небöгсьыс аддзанныд «Кöк синва» да «Дзуздялöн шуд» легендаяс, «Вöльнöй зон» кывбур. 


Лöсьöдiс В.Н. Казаринова


English version
фото В. Иванова