12+.png
Главная О библиотеке Поиск в электронных каталогах Региональный центр Президентской библиотеки Краеведение в Коми Национальная электронная библиотека КИБО Доступная среда
Рейтинг@Mail.ru
 »  »

Обзоръяслöн архив "Лыддьысям комиöн", 2011

Терентьев С..jpg

Терентьев С. К. Заранъяс : висьтъяс, очерк, поэма, кывбуръяс, эссе, сьыланкыв / Семён Терентьев. – Сыктывкар : Кола, 2010. – 176, [2] л. б. - На коми яз.

Семён Константинович Терентьев чужліс 1945-öд воын Большеземельскöй тундраса Кöсьта ты вылын. Сылысь висьтъяссö позьö лыддьыны «Войвыв кодзув», «Арт» да «Чушканзі» журналъясысь, «Сикöтш» нима öтувъя небöгысь. Вöліны сылöн кык асшöр петас: «Деревня Ярпияк – прошлое и будущее» да «Лемванырд». Таысь öтдор Семён Константинович велöдіс 14-öд нэмса Вежа Степанлысь азбука, содтіс татчö судзсьытöм шыпасъяс, а сэсся древнепермскöй алфавит отсöгöн ки помсьыс гижис кызь кымын небöг. Корам тöдмасьны Семён Терентьевлöн «Заранъяс» нима коймöд асшöр небöгöн, коді воис миян библиотекаö. Петіс 2010 воын Сыктывкарын «Кола» небöглэдзанінын.

Выль петасö пырисны висьтъяс, очерк, поэма, кывбуръяс, эссе да сьыланкыв. Висьтъясыс да поэмаыс гижöма Ярпияк грездса кöр видзысьяс да вöралысьяслöн казьтылöмъяс серти, кодъяс и лоöны шöр геройясöн. Олöмысь босьтöм серпасъясöн авторыс петкöдлöма чужан войтырыслысь пытшкöсса озырлунсö, налысь оласногсö, тöжд-дойсö. И кыдзи тöдчöдö гижысьыс аслас небöглöн водзкывйын, унаöн на пиысь абу нин ловъяöсь, и тайö книгасö панöма сы ради, медым налöн нимныс колис водзö олысь бур йöз паметьö. Тайö петасыс тöдмöдö татшöм висьтъясöн, кыдзи: «Сашенька», «Юра морт», «Лёк морт», «Сочинение», «Вомидз» да мукöдъяс. Эм очерк «Ветымын кык час кöр видзысьяс ордын», поэма «Лемванырд», кывбуръяс: «Из сайсянь гöрд шондi рöдтö», «Енмöй, видз», «Мыйла лов вылын сьöкыд»; эссе «Тöрытъя вöт» да сьыланкыв «Югыд вальс».


Горчаков Пьесы.jpgГорчаков Г. Д. Пьесаяс / Гений Горчаков ; Коми Республикаса нац. политика м-во. - Сыктывкар, 2010. – 220 л. б. – Пер. загл.: Пьесы. На коми яз.

Корам тöдмасьны «Пьесаяс» нима выль сборникöн, петіс 2010 воын Сыктывкарын. Авторыс - Гений Дмитриевич Горчаков – нималана морт, Коми республикаса заслуженнöй артист, РСФСР-са культураын заслуженнöй уджалысь, пырö Россияса гижысьяслöн котырö.

Гижö пьесаяс, уна сикас висьт, йöзöдö найöс «Войвыв кодзув», «Чушканзі», «Би кинь» журналъясын, «Коми му» газетын. Сылöн пьесаяс серти мунісны спектакльяс Коми республикаса Виттор Савина нима драма театрын, Коми республикаса вужвойтырлöн шылада драма театрын, радио пыр.

Татчö пыртöма сизим пьеса: «Тундраса кöин», «Кыдзи Пера багатырöн лоис», «Мед ог вунöдöй найöс», «Радейтöмыд - бурдтöм дой», «Надея-лача эн вошты», «Йитчы-клеитчы», «Ок нин тайö вежöгтöм». Бöръясö босьтам видлöг вылö. «Ок нин тайö вежöгтöм» серамбана ворсантор, кöні олöм серсö вöчысьясöн петкöдчöны Ручов, Кира, Лиза, Фима да Öксинья. Карса патераын олöны Ручов гозъя: Кира да Петя Лиза нылвскöд. Кира локтö рытнас гортас, сылы оз кажитчы, мый верöсыс тшöкыда сёрмöдчывлö удж бöрас. Со и талун, кöкъямысöд час, а Петяыс век абу. Гöтырыс чайтö, гашкö пö, гуся пöдругаöс нин Петяыс лöсьöдіс. Нылыс невеста да абу дивö, мый оз гортас пукав, он и тöдлы, верöс сайö мунас. А сэсся Öксинья суседкаыс воліс да майшасьöмсö содтіс. Шуö, колö пö верöсъястö бура кутны, сюся на бöрся видзöдны, мед кутшöмкö ныв либö томиник дöва эз пышйöд. А мыйöн помасяс «Ок нин тайö вежöгтöм» гижöдыс, ті тöдмаланныд асьныд.

Тöдмасьöй сідзжö: «Тундраса кöин», «Кыдзи Пера багатырöн лоис», «Мед ог вунöдöй найöс», «Радейтöмыд - бурдтöм дой», «Надея-лача эн вошты» пьесаясöн.


Пемос.jpgПемöс, быдмöг да тшак серпаса комиа-роча экологическöй кывчукöр = Иллюстрированный коми-русский экологический словарь животных, растений и грибов / М-во нац. политики Респ. Коми ; лöсьöдiс В. И. Шомысов ; серпасалiс Д. М. Лужиков. – Сыктывкар : Кола, 2010. – 226, [2] л. б. : серпас. – На коми, рус. яз.

«Пемöс, быдмöг да тшак серпаса комиа-роча экологическöй кывчукöр» - аслыспöлöс небöг, кöні сёрниыс мунö миян вöр-ваын олысь звер-пöтка, чери, радейтана тшак да быдмöг йылысь. Öд быд ловъя лов олöмас колана. Дасьтіс кывчукöрсö Шомысов Владимир Игоревич, Пожöг школаын коми кыв да литература велöдысь. Звер-пöтка, чери, радейтана тшак да быдмöгъяс йылысь серпасъяс вöчис Дмитрий Михайлович Лужиков. Кывчукöрсö лэдзöма 2010 воын Сыктывкарын «Кола» небöглэдзанінын. Выль петас дасьтöма челядьлы лыддьöм вылö. Сійö отсалас налы бурджыка тöдмавны, кутшöм озыр да мича миян Коми муным, велöдас бура видзны Енмыслысь сетöмторсö.

Тайö небöгыс кутö сідзжö ас пытшкас мича серпасъяс миян вöр-ваын олысь звер-пöтка, чери, радейтана тшак да быдмöгъяс йылысь. Нимъяссö сетöма рочöн и комиöн, нöшта комын кокъямыс республикаса гижысь козьналöмаöсь на дінö ассьыныс кывбуръяснысö.

Экологическöй кывчукöр юкöма куим пельö: медводзöн сетöма «Пемöс сарство» юкöн, сэсся «Быдмöг сарство», коймöд юкöныслöн нимыс «Тшак сарство». «Пемöс сарство» юкöн воссьö Вöв, Чань, Кöр, Меж, Мöс да мукöд гортса пемöсъяс йылысь гижöдъясöн. Сэсся висьтавсьö вöрса зверъяс йылысь: Вурд, Кынь, Руч, Ур да с.в. «Пемöс сарствоысь» позьö аддзыны сідзжö гортса пöтка да вöрса лэбачьяс йылысь пасйöдъяс.

«Быдмöг сарство» юкöн кутö ас пытшкас вöдиттöг быдмысь быдмöгъяс йылысь юöр, быдсяма пу йылысь, быдтан-вöдитан быдмöг (зöр, шобді, свеклö, укроп) да уна мукöдтор.

«Тшак сарство» юкöн висьталö сёян тшакъяс йылысь.


Юшков.jpgЮшков Г. А. Чукöсты, Коми му, чукöсты : статьяяс, висьтъяс, пьесяс, кывбуръяс / Геннадий Юшков. – Сыктывкар : Коми Республикаса гижысь котыр, 2010. – 320 л. б.

Коми республикаса йöзкостса гижысь Геннадий Анатольевич Юшковлöн нимыс паськыда тöдса Россияын да весиг суйöр сайын. Литератураö сійö локтіс 50-öд воясын кыдзи кывбуртэчысь, драматург да прозаик. Оз быд гижысь вермы ошйысьны «Öтувтöм гижöд чукöрöн», а Геннадий Анатольевичлöн сэтшöмыс кык. Нёль небöгö öтувтöм 2001-öд вося гижöд чукöрыс коми кыв вылын. 2007-öдын Геннадий Юшковлöн нимлун кежлас лэдзисны куим небöга «Öтувтöм гижöд чукöр», кöнi гижöдъяссö йöзöдöма рочöн.

А талун корам тöдмасьны Геннадий Юшковлöн «Чукöсты, Коми му, чукöсты» выль небöгöн. Йöзöдны сiйöс дасьтiс Коми республикаса гижысь котыр. Тиражыс ичöт, ставыс сизимсё экземпляр. Книгалöн редакторыс Елена Козлова, серпасъясыс Юрий Лисовскийлöн.

Сборниксö заводитлöма дасьтыны ачыс авторыс на, чукöртöма бöръя воясö гижöмторъяссö, тэчöма сiдз, кыдзи кöсйöма да кыдзи сьöлöмыс лэптöма. А сэсся вайöма гижысьяслöн котырö, медым йöзöдны. Татысь аддзанныд статьяяс да висьтъяс, 10 пьеса: «Му вежан лун», «Гöтыртöгыд абу олöм», «Бара йöйталі», «Олöм вын» да мукöд; зэв уна кывбур, комын сьыланкыв, дасысь уна серамбана гижöд, öктас, шусьöгъяс, Геннадий Юшковлысь Владимир Тиминкöд ёрта сёрни. Авторлöн гижöдъясын кылö Коми му да сылöн войтырлöн аскиа лун вöсна тöждысьöм, найöс бур вылö ышöдöм.


Зарни Люся.jpgВтюрина Л. З. Майбыр кад : [кывбуръяс] / Зарни Люся ; ред. Анжелика Елфимова ; серпасалiс Ю. Н. Лисовский. – Сыктывкар : Изд-во Союза писателей Респ. Коми, 2010. – 31, [1] л. б. : серпас. – (Народная библиотека). – На коми яз. – Пер. загл.: Счастливая пора: стихи.

Коми кывбуралысь Людмила Втюрина (Зарни Люся) чужис-быдмис Изьва районса Кельчиюр сиктын. Шöр школа помалöм бöрын велöдчис Перымса каналан культура институтын. 1985 восянь уджалö Маршак нима челядьлöн Национальнöй библиотекаын. Кывбуръяссö гижö рочöн и комиöн. Öткымынöс на пиысь йöзöдöма республикаса газет-журналын; «Был у меня хороший друг», «Сыктывкар», «Собрание разлук», «У камелька» гижöд чукöръясын. Зарни Люсялысь кывбуръяссö позьö аддзыны и эст кывъя небöгысь.

2006-öд воын Коми небöглэдзанiнын петаліс «Шуд войт» сборник, кытчö пырисны Людмила Втюриналöн, Анастасия Шомысовалöн, Алена Мальцевалöн да Надежда Павловалöн ичöтик кывбура небöгъяс. Аньяслöн тайö вöлі медводдза асшöр небöг. Людмила Втюриналöн кывбура небöгыслöн нимыс - «Шоныд дiяс».

«Народная библиотека» серияын кутісны петавны ичöтик небöгъяс. Тайö мöвпсö олöмас пöртіс Сыктывкарса поэт Андрей Попов. Сійö тöдчöдіс, мый «Народная библиотека» серияын небöгъяссö лэдзöмыс лоö донтöмджыкöн да книгаыс öдйöджык аддзас ассьыс лыддьысьысьсö. Медводдза небöгъясыс петісны авторъяслöн тшöт весьтö. 2010-öд воын «Народная библиотека» серияын Зарни Люсялöн петіс «Майбыр кад» нима кывбура выль небöг. Татчö пыртöма коми кывъя да изьватас сёрнисикас 30 кывбур. Аслас кывбуръясöн авторыс висьталö майбыр кад йылысь, сьöд кымöръяс да вöтъяс йылысь, сиö найöс муса мортлы, ывлалы, шонділы, чужан мулы.


Щербаков.jpgЩербаков Ф. В. Менам куслытöм кодзув : кывбуръяс, драмаяс / Фёдор Щербаков ; лöсьöдiс В. В. Тимин ; серпасалiс Ю. Н. Лисовский. – Сыктывкар : Анбур, 2010. – 318, [2] л. б. : портр. – На коми яз.

Фёдор Щербаковлöн «Менам куслытöм кодзув» выль небöг петiс Ыджыд Вермöмсянь 65 во тыригкежлö «Анбур» небöг лэдзанiнын. Фёдор Васильевич Щербаков чужліс Туръяын 1914 вося рака 2 лунö гöль крестьяна семьяын. Помалiс школа да Ухтаса горнöй техникум, Коми пединститутын велöдчöмсö эновтiс 3-öд курсын. Вöлі Ыджыд война вылын, сьöкыда ранитчыліс. Кулiс 1978 вося лöддза-номъя 8-öд лунö.

Емваса кывбуртэчысь уджавлiс газет, радио, книжнöй издательство редакцияясын. Кывбуръясысь öтдор гижис сонетъяс, драмаяс, вуджöдіс роч гижысьясöс коми кыв вылö.

«Менам куслытöм кодзув» небöгö чукöртöма авторлысь 1930-1970 воясся кывбуръяс. Танi квайт юкöн: «Сьылöй, ворсöй, гажöдчöй…» (1930-öд воясын гижлöм кывбуръяс), «Кор гымалiс война» (1942-1945), «Менам Отчизна» (1940), «Кор ми аддзысьлам тэкöд» (1950), «Ме öд Пармаысь» (1960), «Сьöлöм восьтöм» (1970).


Безносиков.jpgБезносиков В. И. Ва моз визувтiсны вояс... / Владимир Безносиков ; лöсьöдiс М. Г. Колегова ; МУК "Сыктывдинская цетрализованная библиотечная система", Ыбский фил.-б-ка им. В. И. Безносикова. - Сыктывкар, 2010 (Полиграф-Сервис). - 43 л. б. : серпас, фот. - На коми яз.

«Ва моз визувтiсны вояс» выль кывбур чукöр дасьтöма Владимир Безносиковлöн киöн гижöм небöг серти, кодöс козьнавлöма ас кадö сиктса библиотекалы. «Ва моз визувтiсны вояс» небöгсö дасьтiс ыбса библиотекарь Марина Колегова. Сэтчö пырисны гижысьлöн кывбуръяс, кодъясöс мыйтакö вöлi йöзöдлöма газет-журналъясын, а унджыкыс на пиысь некöн эз петавлы. Татчö пыртöма сiдзжö Владимир Ивановичлöн серпасъяс.

Владимир Безносиков, Коми АССР-са культураын нимöдана уджалысь, Сыктывдiн районса нимöдана олысь, СССР-са гижысьяслöн котырын 1991 восянь. Чужлiс 1927 вося öшым 26 лунö Сыктывдiн районса Ыб сиктын. Велöдчис окотапырысь, школаын вöлi сизим во, а 8-öд классын велöдчöмысь босьтiсны нин дон. Но батьыслöн кувсьöм вöсна мамыс эз вермы мынтысьнысö и зонка пырис уджавны колхозö. 1944 воын сiйöс босьтiсны армияö НКВД войскаö. Танi окружнöй газетын мыччысьöны сылöн гижöдъясыс. 5 мысти воö чужанiнас, веськöдлö Культура керкаöн, уджалö библиотекарöн, корреспондентöн, художник-оформительöн, велöдö школаын военнöй делö.

1953 воын Владимир Безносиковлöн петö «На колхозной ферме» медводдза висьт, сысянь и заводитчö литератураö пырöдчöмыс. 1961 воын йöзöдöны «Дружба йылысь висьтъяс» нима медводдза небöг. Сэсся вöлiны петасъяс : «Жар гожöм», «Свöякъяс», «Вильыш вöръю», «Кöнi менан шудöй?», «Чужан сиктын олам-вылам» да мукöд. Ставыс чукöрмас дас небöг. Висьтьяс да повесьтъяс кындзи Владимир Иванович гижис пьесаяс да кывбуръяс. Нэмсö олiс сиктын, сы вöсна и гижöдъяссö сиис чужан сиктыслы да сылöн олысьяслы.


Колегов.jpgКолегов Е. В. Чужан му: кывбуръяс, фельетон / Егор Колегов ; лöсьöдiс М. Г. Колегова ; МУК "Сыктывдинская цетрализованная библиотечная система", Ыбский фил.-б-ка им. В. И. Безносикова. - Сыктывкар, 2010 (Полиграф-Сервис). - 101, [1] л. б. : фот. – Пер. загл.: Родная земля : стихи. – На коми яз.

Ыб сиктса медводдза коми гижысь Колегов Егор Васильевич чужліс 1895 вося кос му 29 лунö Сыктыв вожса Ыб вöлöсьтын гöль крестьяна семьяын. Челядь пиысь вöлі медыджыдöн. Быдмисны сьöкыда. Егорлы сöмын куим во удайтчис велöдчыны улыс тшупöда школаын. 1909 воын помаліс Ыбса улыс тшупöда меставывса училище.

1912 воöдз отсасис дядьыслы, вöлöсьтса писарлы. Сэсся муніс Усть-Сысольскö, уджаліс земствоса начальник дорын письмö новлöдлысьлы отсасьысьöн да нуöдіс му лöсьöдöм кузя делö. Медасьліс Дырносса кирпич вöчан заводö сёй талявны, грузчикаліс карса пристаньын, тэчліс пач.

Бура уджалöмсьыс мöдöдісны Маджаö вöлöсьтса писарöн, кöні оліс 1917-öд воöдз. Гöтрасис, гозъялöн чужис Елизавета ныв. Сэсся семьянас вуджисны Зеленечö. Армияын служитöм бöрас овмöдчисны Ыбö. 1920 воын вуджисны овны Усть-Сысольскö, кыпöдiсны оланiн, Киров улича вылын 57 номера керкаыс öнöдз на сулалö. Кызьöд вояс помын - комынöд вояс заводитчигöн сійö - зырянизация нуöдöм кузя инструктор, сэсся Коми небöг лэдзанінын литературнöй сотрудник.

Егор Колегов йöзöдны кывбуръяссö заводитіс сöмын Октябрса революция бöрын. Сылысь политика да эскöмлы паныда гижöдъяссö позис аддзыны «Удж» да «Югыд туй» газетъясысь, «Ордым» журналысь. Поэтлысь шмонитны кужанлунсö пасйыліс весиг нималана учёнöй Илля Вась.

Пуктіс ассьыс пай и посни войтырлы коми литература сöвмöмö. Челядьлы лыддьöм вылö гижис «Шор», «Ичöтдырся олöм», «Посни челядьлы сьыланкыв», «Йи чойöд ислалöм» да мукöд кывбуръяс. Ассьыс гижöдъяссö сиис сiдзжö выль олöмлы, Коми му сöвмöмлы, мöвпаліс аслас бöрйöм гижöдъяса сборник йылысь.

Поэт оліс да уджаліс öти кадö нималана коми гижысьяскöд : Нёбдінса Витторкöд, Михаил Лебедевкöд, Тима Венькöд. Вуджöдіс роч классикъяслысь гижöдьяссö коми вылö. Мича коми кывйöн сы отсöгöн юргисны Антон Чеховлöн, Владимир Маяковскийлöн, Демьян Бедныйлöн, Михаил Светловлöн кывбуръяс. Комиöдліс сідзжö сьыланкывъяс «Ылын-ылын роч Кавказын», «Колльöдöм».

Чорыда висьмöм бöрын овмöдчис чужанінас, Ыбын. Кувсис 40 арöсöн, 1937 вося йирым 19 лунö.

А öні тöдмасьöй «Чужан му» нима выль небöгöн. Кывбур чукöрсö дасьтöма ыбса библиотекарь Марина Колегова. Татчö пыртöма гижысьлöн олöм йылысь пасйöд. Егор Колеговлöн эз петавлыны кывбуръясыс торъя сборникöн, но унджыкыс на пиысь тöдса коми войтырлы кыдзи йöзкостса сьыланкывъяс. Кывбуралысьлöн гижöдъясыс видзсьöны Коми Республикаса Национальнöй архивын.


Михайлова.jpgМихайлова З. В. Килля-лыска пуяса чужанiн: кывбуръяс/ Зоя Михайлова ; ред. М. М. Попова. - Сыктывкар, 2010. - 111, [1] л. б. – Пер. загл.: Лесная родина моя : стихи. – На коми яз.

Коми АССР-са нимöдана велöдысь Зоя Васильевна Шиликова чужис Кöрткерöс районса Шойнаты сиктын 1940-öд воын да öнöдз олö сэні. Коми Пединститут помалöм бöрын воис чужан сиктас, и сэксянь пыр уджалö школаын да велöдö челядьöс радейтны коми кыв. Веськöдлö «Би кинь» литературнöй кружокöн, кытчö волывлöны том кывбуртэчысьяс. Зоя Васильевналы 48 во велöдöм мысти бур уджысь, том уловöс туйдöмысь, вичмöдiсны Россияса медбур велöдысь ним.

Йöзöдны ассьыс кывбуръяссö Зоя Васильевна заводитіс 1960-öд восянь. Гижö комиöн, унатор йылысь. Сылысь кывбуръяссö позьö аддзыны коми кыв велöдан небöгъясысь, «АРТ», «Войвыв кодзув», «Би кинь» журналъясысь; «Йöлöга», «Коми му», «Звезда» газетъясысь.

2010-öд воын петіс «Килля-лыска пуяса чужанін» сборник, кытчö пырисны Зоя Васильевналöн кывбуръясыс, сöмын овсö авторыс индöма - Михайлова. «Килля-лыска пуяса чужанін» кывбурчукöр кутас ышöдны школаса велöдысьясöс да сетас налы позянлун уджавны кыпыдджыка, велöдны радейтны челядьöс ассьыныс чужан кывнысö не сöмын урокъяс вылын, но и гортаныс. Кыдзи тöдчöдö ачыс авторыс : «Килля-лыска пуяса чужанінöс радейтны велöдіс менö ыджыд батьöй. Ичöтсянь сыкöд ми кыкöн ветлывлім вöрö. Сійö бура тöдмöдіс менö вöр-ваыскöд, и вöр-валысь коланлунсö гöгöрвоöмыс, сылысь мичсö казявны кужöмыс чужтісны менам сьöлöмын олöмсö пöся радейтöм».


Доронин Поминание.jpgДоронин Н. А. Поминание = Казьтылöм / Николай Доронин. - Сыктывкар, 2010. - 142 с. : ил.

Пожöг вож сетіс коми литературалы уна нималана гижысьöс: Михаил Доронинöс, Сталинград дорйигöн танк улö уськöдчысь смел салдат Михаил Шуктомовöс, «Чушканзіса» вöвлöм редактор Александр Матвеевöс, кывбур тэчысь Александр Некрасовöс.

А талун тöдмöдам Ай му туялысь Николай Доронинкöд, коді чужлöма Сыктывдін районса Шыладор грездын, олö Эжваын. Öні Николай Александрович йылысь он нин шу, мый сійö сöмын на босьтчöма уджас. Рöдвужлысь ордпу туялöм кузя весиг сетö мастер-классъяс.

Миянлы нимкодь, мый сійö оз вунöд Национальнöй библиотека йылысь, век козьналö ассьыс гижöдъяссö: «Сказ о родной земле», «Чужан му йылысь висьтасьöм», «Поминание. Казьтылöм». Бöръя небöгыс петіс 2010-öд воын 143 лист бока, ыджыд формата. Тайö петассö сійö сиöма Ыджыд тыш вылö ветлысь землякъясыслы. Гижöдсö дасьтігöн уджалöма «Республикалöн Паметь Книга» серти, со петіс нин 10-öд том. Шыладор грездса овъясысь артмöма кузь список. Татчö пыртöма найöс, кодъяс пуктісны юрнысö вир кисьтана тышын, и найöс, кодъяслы мойвиис бöр воны гортаныс. Авторыс кöсйö, мед тайö нимъяссö тöдісны ставöн да некор эз вунöдны.

Овъясысь кындзи небöгас сетöма войналы сиöм кывбуръяс - Александр Твардовскийлысь, Семён Гудзенколысь, Борис Олейниклысь, Владимир Высоцкийлысь, Виктор Кушмановлысь, Ананий Размысловлысь, Серафим Поповлысь…

Нöшта татысь аддзанныд Слудка сиктса веськöдлысьяс да депутатъяс дорö шыöдчöм. Кыдзи артмылöмаöсь шыладорса овъяс, авторлöн творческöй планъяс да мукöдтор.

И сідз, корам тöдмасьны Николай Доронинлöн выль небöгöн «Поминание. Казьтылöм».


Елфимова.jpgЕлфимова А. Г. Вемöсöн ли вöтöн... : кывбуръяс / Анжелика Елфимова ; ред. П. И. Симпелев ; серпасалiс Е. М. Коюшева. - Сыктывкар, 2010. - 158, [2] л. б. : серпас. - Пер. загл.:  Во сне ли, наяву... : стихотворения. На коми яз.

Анжелика Елфимова чужліс-быдмыліс Кöрткерöс районса Маджа сиктын. Енбиа кывбуралысь, ёсь перöа фельетонист, коми кыв бура тöдысь да сійöс пöся радейтысь. Сылöн нимыс бура тöдса не сöмын республикаса лыддьысьысьлы. Водзын Анжелика уджавліс Кöрткерöс районса «Звезда» газетын, а öні нимкодьöдö шмонитана гижöдъяснас «Чушканзі» лыддьысьясöс. Ёртасьö «Коми му» газеткöд, кодлöн лист бокъяс вылысь тшöкыда позьö аддзыны сылысь гижöд-пасйöдъяссö.

Анжелика Елфимовалысь кывбуръяссö окотапырысь вуджöдöны роч, удмурт, мари, эст , английскöй да французскöй кывъяс вылö.

Быд поэт гижö радейтчöм йылысь. Öд муслуныд отсалö кыпöдны мортлысь ловсö, лоны ыджыдджык сьöлöмаöн да меліöн. Муслун да радейтчöм – шöр визьыс и Анжеликалöн кывбуръясын. 2002-öд воын Коми небöглэдзанін петаліс Анжелика Елфимовалöн «Аддзысьлытöдз» небöг.

Выль во водзвылын «Коми му» газет редакция» автономнöй учреждение йöзöдiс Анжеликалысь кывбура мöдöд небöг, коді шусьö «Вемöсöн ли вöтöн». Со мый гижö небöглöн водзкывйын Коми Республикаса народнöй поэт Владимир Тимин: «Кывбуръясыс Анжеликалöн дженьыдикöсь, но топыдöсь, югнитасны, садьмöдасны быдлунъя рудсьыс, шензьöдасны виччысьтöм строкаöн. Кывбурысь кывбурö юрад дум, кутшöм чудеса лоö водзö? Дженьыд кывбуръяснас унатор кужö шуны. Вежласьöны серпас бöрся серпас. И мыйкö да быть чуймöдас…»


Лöсьöдiс В.Н. Казаринова


English version
фото В. Иванова