12+.png
Главная О библиотеке Поиск в электронных каталогах Региональный центр Президентской библиотеки Краеведение в Коми Национальная электронная библиотека КИБО Доступная среда
Рейтинг@Mail.ru
 »  »

 Страница краеведа 

Обзоръяслöн архив "Лыддьысям комиöн", 2010


Белых обложка.jpg

Белых И. И. Гуся керка : челядьлы висьтъяс / И. И. Белых ; ред. А. Ульянов ; серпасалic Е. Григорян. - Сыктывкар : Эскöм, 2008. - 157, [3] л. б. : серпас. - Пер. загл.: Таинственный дом : рассказы для детей. - На коми яз.


Иван Ильич Белых чужис Сыктывдін районса Паль сиктын. Коми пединститут помалöм бöрын став олöмсö йитіс коми печатькöд. Уна во уджаліс «Югыд туйын» (öнія «Коми му») газетын. Первой корреспонденталіс, сэсся веськöдліс отделöн, вöлі редакторöс вежысьöн. Сы бöрын вит во уджаліс Коми небöг лэдзанінын, «Йöлöга» газетын. Öні бара зільö «Коми муын». Сылöн висьтъясыс петавлісны «Север», «Войвыв кодзув», «Би кинь», «Чушканзі» журналъясын, газетъясын, литера­турнöй альманахъясын. Эмöсь сылöн торъя небöгъяс.

«Гуся керка» небöг, коді петіс 2008-öд воын, Иван Ильич гижис посни войтырлы. Татысь челядь аддзасны уна пöлöс висьт: «Лöз куртка», «Выль кöмкот», «Смел лэбачьяс», «Кывзысьтöм зі», «Ниа да сус» да мукöд.


%D0%9A%D1%83%D1%80%D0%B0%D1%82%D0%BE%D0%B2%20%D0%92%D0%B8%D1%82.jpgКуратов В. К. Мусуктö сьöлöмыд бöрйö : повесьтъяс, висьтъяс, олöмысь войтъяс, пьеса / Виталий Куратов ; ред. Л. Н. Хатанзейская ; серпасалiс А. В. Мошев. - Сыктывкар : Анбур, 2009. - 430, [2] л. б. : серпас. – Пер. загл.: Любимую выбираем серцем : повести, рассказы, заметки, пьеса. - На коми яз.


Виталий Константинович Куратов чужліс 1933 вося январ 6 лунö Коми автономной обласьтын Сыктыв районса Кебра сиктын. Тані жö помалiс шöр школа, сэсся велöдчис Сыктывкарса öтиöд номера Краснозатонса ремесленнöй училищеын, рытъя школаын да Ленинградса высшöй партийнöй школаын. Вöлі кочегарöн, электрикöн, журналистöн, партия райкомын инспекторöн, Койгортса «Новая жизнь» газетын шöр редакторöс вежысьöн, экономистöн, уджавліс Коми Республикаса видз-му овмöс министерствоын.

Виталий Куратовлысь медводдза висьт «Салдат тэрмасьö гортас» 1956 воын йöзöдлiс «Войвыв кодзув» журнал. Сэсся вöліны повесьтъяс «Мусуктö сьöлöмыд бöрйö», «Олöмыс чуксалö», «Радейтам тэнö, Олеся» да некымын висьт. 2003 воын петіс сылöн медводдза проза чукöр «Кöин котыр». Аслас гижöдъясын автор висьталö радейтчöм да ёртасьöм йылысь, уджын водзмöстчысьяс йылысь, серамбана ёсь гижöдъяснас янöдiс олöмсö дзугысьясöс, юысь-кодалысьясöс да дыш йöзöс.

2003 вося октябр 20 лунö Виталий Константинович кувсис. Анна Фёдоровна гöтырыс, бур йöзыс да гижысь-ёртъясыс водзмöстчисны да дасьтісны «Мусуктö сьöлöмыд бöрйö» выль небöг, коді петіс 2009-öд воын «Анбур» небöглэдзанінын. Выль гижöд чукöрö пырисны медводдза небöгысь висьтъяс да «Войвыв кодзув» журналын йöзöдлöм гижöдъяс, повесьтъяс, олöмысь войтъяс, пьеса. Виталий Куратовлöн гижöдъясын шöр геройяснас лоöны ныв-зонъяс, мужичöйяс, нывбабаяс, кодъяслöн петкöдчö öта-мöдкостса йитöдъясныс, семьякостса миритчыны позьтöм мытшöдъясныс, горш йöзкöд веныс. И быдтор позьö венны, кор эм радейтöмлöн би.


Куратова Нина.jpgКуратова Н. Н. Менам дона сикöтш-ожерельеöй : повесьтъяс, висьтъяс, пьесаяс, олöмысь серпасторъяс / Нина Куратова ; ред. В. И. Трошева ; серпасалiс Г. Н. Шарипков. - Сыктывкар : Анбур, 2009. - 749, [3] л. б. : серпас. - На коми яз. - Пер. загл. : Ожерелье моё драгоценное : повести, рассказы, пьесы.


Лыддьысьны радейтысьяслы бура тöдса Нина Никитична Куратова, Коми Республикаса нимйöза гижысь да Коми АССР культурын нимöдана уджалысь. 1985-1987 воясын «Бобöнянь кöр» да «Батьяс йылысь» повесьтъяс гижöмысь сылы сетісны Коми АССР-са Куратов нима Государственнöй премия лауреатлысь ним.

Медводдза «Аппассионата» висьт вöлі йöзöдöма 1964 воын, а дас во мысти петіс сылöн медводдза сборник «Радейтана муса».

И со лыддьысьысьяслы Нина Куратова вöчис бур козин - дасьтіс сборник «Менам дона сикöтш ожерельеöй». Повесьтъяс, висьтъяс, пьесаяс да олöмысь серпасторъяс, кодъясöс аддзанныд небöгысь, унджыкыс автобиографичнöй, сы вöсна мый авторыс казьтылö олöмсьыс паныдасьлысь лоöмторъяс. Татчö пырис книгаыскöд öткодь нима повесьт «Менам дона сикöтш-ожерельеöй» да нöшта «Чеччыштны увлань юрöн», «Пöкрöв субöта» да «История урöк» повесьтъяс. Сэсся эмöсь висьтъяс: «Иван дядь», «Сідзкö, ловъя на», «Бур Козин» да «Благöвещенньö». Пьеса жанр радейтысьяслы сетöма: «Кылалö йи» да «Гажа асыв» пьесаяс, а сідзжö олöмысь öкмыс серпастор.


Куратов.jpgКуратов И. А. Тi кöть шудаöсьджык лоöй! : кывбурьяс, поэмаяс / Иван Куратов ; лöсьöдiс В. В. Тимин ; серпасалiс Г. Н. Шарипков ; ред. Е. В. Ветошкина ; Союз писателей Республики Коми. - Сыктывкар : Коми гижысь котыр, 2009. - 286, [2] л. б. : серпас. - (Звезды Севера). - На коми яз. - Пер. загл. : Будьте счастливы : стихи, поэмы.


2009-öд воын медводдза коми кывбуртэчысь Иван Алексеевич Куратов чужан лунсянь тырис 170 арöс. Тайö пас кежлас Коми республикаса гижысь котыр отсöгöн петіс небöг «Ті кöть шудаöсьджык лоöй!», кытчö пырисны поэтлöн медся нималана да тöдчана кывбуръясыс, роч да суйöрсайса классикаысь вуджöдöмъяс.

Олігас Иван Алексеевич этша йöзöдчыліс, сöмын вöлі некымын кывбур Гугов псевдоним улын. Сылöн творчествоыс паськыда лои тöдса сöмын ХХ нэмын. Иван Куратов вуджöдліс Жуковскийöс, Пушкинöс, Лермонтовöс, Анакреонöс, Вольтерöс, Шиллерöс, Беранжеöс.

Лыддьысьысь тöдмалас поэтлöн олöм да мöвпъяс йылысь, мый сійöс майшöдліс. Аслас кывбуръясын авторыс тöждысьö коми войтыр вöсна, гижö налöн оласног йылысь, кутö лача, мый коми мортлöн вежсяс олöмыс.


Логинова Л.jpgЛогинова Л. П. И вошлö узян ун...: висьтъяс, кывбуръяс, сьыланкывъяс, притчаяс / Лидия Логинова. - Сыктывкар, 2009. - 64 л. б. : фот. - Пер. загл.: И пропадает сон : рассказы, стихи, песни, притчи. На коми яз.


Коми Республикаса народнöй артистка, Коми Республикаса государственнöй премия лауреат Лидия Логиноваöс тöдö республикаса быд олысь. Сійö абу сöмын мичаа сьылысь да бур актриса, а нöшта, вöлöмкö, гижö висьтъяс, кывбуръяс, сьыланкывъяс да притчаяс. Став тайö гижöдыс пырис сылöн выль небöгö «И вошлö узян ун...». Татчö пырисны висьтъяс: «Лöз дора чашка», «Гижсисны-гöтрасисны», «Ок и чöсмасим», «Бöра кино», «Лöгасьлім» да мукöд. Висьтъясын авторыс висьталö аслас кöмтöм челядьдыр йывсьыс, кыдзи быдмис да велöдчис, ныв-ёртъяс, бать-мам да семья йывсьыс да с.в. «Акöтö-бакöтö» ним сетöма притчаяс юкöнлы. Небöгас эмöсь сідзжö кывбуръяс: «Шуда мам», «Иван чож», «Мамöлы», «Талун рытыс мыйкö вывті рам» да мукöд.

А нöшта тайö гижöд чукöрсьыс позьö аддзыны сьыланкывъяс: «Öтчыд Илля лунö», шыладыс Михаил Оверинлöн; «Гозъя-гозйöн», шыладыс Ирина Чувъюровалöн; «Шуда мам», шыладыс Лидия Логиновалöн да с.в. Небöгас сетöма Лидия Логиновалöн семейнöй альбомысь уна фото да сьыланкывъяса диск.


Парма гор.jpg«Парма гор» - чужан кывъя шор : Кулöмдiн районса «Парма гор» газет редакцияын уджалысьяс да налы отсасьысьяс йылысь висьт / АУ МО МР «Усть-Куломский», «Редакция газеты «Коми гор» ; лöсьöдiс В. Г. Лодыгин ; серпасалiсны : Н. А. да Л. И. Лютоевъяс. - Сыктывкар, 2009. - 165, [1] л. б. : серпас, фот., ноты. - Пер. загл.: Голос Пармы - родноязычный ручей. На коми яз.


Кулöмдін районса «Парма гор» газетлы 80 во тырöмкöд йитöдын тані уджалысьяс дасьтісны книга «Парма гор» - чужан кывъя шор». Небöгыс висьталö редакцияын уджалысьяс да налы отсасьысьяс йылысь, ставныслöн налöн аслыспöлöс ордым да киподтуй. Тайö каднас чужан кыв вылын газет вöчисны уна морт, гижлісны сьöлöмö йиджана очеркъяс да висьтъяс. Бур, мый татшöм кылöмыс эм и талун да газет вöчысьяс и водзö бурмöдöны йöзлысь сьöлöмсö, отсалöны налы олöмас да уджас.

Татысь позьö аддзыны журналистъяслысь казьтылöмъяссö, кыдзи овсис да уджавсис «районкаын», кутшöм аддзысьлöмъяс вöліны. «Гижліс районса газет» юкöнö пыртöма газетъясысь босьтöм дженьыдик гижöдъяс, кодъясын зэв ясыда петкöдчö районлöн олöмыс, син водзад сувтö кольöм кадыс, кылан весиг сійö кадся кывворсö.

Сборникас уна снимок редакторъяслöн, журна­листъяслöн, газетлы отсасьысьяслöн. Йöзöдöма лыддьысьысьяслысь «Миян муса Эжва йыв» конкурс вылö ыстöм фотояс, Эжва йывса авторъяслысь выль коми сьыланкывъяс.

Кыдзи тöдчöдöны небöг дасьтысьяс, «Парма гор» газет пыр петіс коми кыв вылын, и тайö туйвизьöдыс кутас мунны водзö.


Некрасов.jpgЛöз öзын : [сьыланкывъяс] = Синий причал : лучшие песни XX века на рус. и коми яз. / лöсьöдiс С. А. Некрасова ; вуджöдic коми кыв вылö Александр Некрасов ; рец.: Е. А. Цыпанов, Н. А. Щукин ; серпасалiс А. М. Гагарин. - Сыктывкар, 2010. - 303, [1] л. б. - На рус., коми яз.


Александр Васильевич Некрасов чужöма 1952 вося ноябрь нёльöд лунö Сыктывдин районса Паль сиктын. Помалöма Позялом посёлокса начальнöй школа, велöдчöма витöд классын Придашын. А сэсся батьсö мöдöдöмаöсь велöдчыны Ленинградса вылыс партийнöй школаö да сiйö босьтöма писö сьöрсьыс. Танi зонка помалöма квайтöд да сизимöд классъяс.

Чужан кывлысь муса кöрсö тöдмалöма сöмын Сыктывкарса каналан университетса филология факультетын велöдчигöн, а сэсся вуджöма Ленинградса университетö. Кывбуръяссö артмöдö олöмыслысь мичлунсö аддзöмöн. Дзöля дырсяньыс син водзас сулалiсны сиктлöн мича серпасъясыс.

Корам тöдмасьны Александр Васильевичлöн выль петасöн «Синий причал =Лöз öзын». Татшöм сьыланкыв чукöрыс петö медводдзаысь, лэдзöма Коми республиканскöй типографияын 2010 воын. Татчö чукöртöма ХХ нэмса медбур роч сьыланкывъясыс, кодъясöс Александр Некрасов вуджöдöма коми кыв вылö. Ставыс артавсьö 102, тайö и «Три танкиста», «Жди меня», «В лесу прифронтовом», «Одинокая гармонь», «С чего начинается родина», «Гори гори моя звезда», «Малиновый звон», «Миллион алых роз» да уна мукöд. Уна йöзлы найö зэв тöдсаöсь.

Кыдзи пасйö ачыс авторыс, мый Есенинлысь кывбуръяссö вöлі вуджöднысö сьöкыд, а сьыланкывъяс вуджöдöмыс вöлöма нöшта на сьöкыдджыкöн. Сьыланкывйын вежсьö кывбурыслöн öдлуныс, овлö, мый весиг быд куплетын. Öдсьыс кö торксян, сьыланкывйыс вошö. Öд сьыланкывъяссö гижöмаöсь уна сикас автор, быдöнлöн аслыспöлöс гижан сям да кужанлун.


Пыстин И.jpgПыстни И. И. Бöрйöм гижöдъяс : [повесьтъяс, висьтъяс, пьесаяс] / Илья Пыстин ; ред. Е. В. Козлов ; обл. Н. В. Вахнинлöн ; М-во Нац. политики Респ. Коми. - Сыктывкар : Кола, 2009. - 541, [3] л. б. : фот. - Пер. загл.: Избранное : [повести, рассказы, пьесы]. - На коми яз.


Коми гижысь Илья Иванович Пыстин (сайнимыс - Иливапыс) чужліс 1907 вося июль 15-öд лунö Мылдінын. Тані помаліс сиктса земскöй училище, пырис комсомолö да уна во уджаліс активистöн. Велöдчис Коми областнöй совпартшколаын. Уджаліс «Вöрлэдзысь» газетын, Коми госиздатын, «Ударник» журналын.

1931-öд воын сійöс вуджöдöны уджавны Москваö. 1934 воын бöр воö Сыктывкарö, зільö небöглэдзанінын, а редактор-вуджöдчысьяслысь курс помалöм бöрын индöны Кировö обласьтувса небöглэдзанінса директорöн.
Ыджыд Войналöн медводдза лунъяссянь фронт вылын. 1944 воын контузия бöрын демобилизуйтісны гортас.

1951 вося октябр 31 лунö Илья Иванович кувсьö.

Литератураö локтіс кызьöд вояс помын. 1928-öд воын гижис медводдза висьтъяс: «Пöжар», «Вын», во мысти петіс «Зук Егор». Сэсся вöліны «Запань» да «Еджыд во» повесьтъяс. Война помасян воö йöзöдö «Фронтöвöй лун-войяс» повесьт, а 1949-ын помалö «Бушкола вояс» пьеса.

Тайö гижöдъяссö верманныд лыддьыны «Бöрйöм гижöдъяс» выль небöгысь, коді петіс 2009-öд воын «Коми Республикаса государственнöй кывъяс видзöм да сöвмöдöм» уджтас серти. Уна вын небöг дасьтöмас пуктіс Илья Пыстинлöн Клара Ильинична нылыс. Сійö козьналіс миян библиотекалы батьыслысь уджсö.


Лöсьöдiс В.Н. Казаринова


English version
фото В. Иванова