Страница краеведа

Лыддьысям Веракöд

 Обзоръяслöн архив:  2012  2011  2010  

Видза оланныд, коми кыв вылын лыддьысьны радейтысьяс!

Менö шуöны Вераöн. Национальнöй библиотекаын уджала 32 во, джынсö на пиысь зіля чужан му туялан юкöнын. Радейта лыддьысьны коми кыв вылын и кöсъя, медым унджык морт тöдісны да лыддьысисны миян мелі, муса, мича коми кыв вылын. Öнія олöмысь кокни казявны, кыдзи вочасöн дугдöны лыддьыны коми небöг. Дерт, кодкö шуас, мыйла волывлыны библиотекаас, кор ставсö позьö аддзыны да лыддьыны Öтуввезйысь? А библиотекаса уджалысьяслы зэв окота, медым лыддьысьысьлöн эз кус небöгъяс дорас муслуныс. Та вöсна ми дасьтім «Краеведлысь листбок», кöні кутам тöдмöдны выль коми небöгъясöн. Аддзыны найöс позьö Чужан му туялан юкöнысь, кöні котыртлöны небöга выставкаяс, висьталöны на йылысь «Миян кад» передачаын «Коми гор» радио пыр, лöсьöдöны «Книги в наличии и печати» индöдъяс.

Коми челядьлы антология / [лöсьöдіс Е. В. Козлова ; серпасалiс В. А. Клейман]. - Сыктывкар : Анбур, 2009-2010. – Пер. загл.: Антология коми детской литературы. – На коми яз.

Медводдза небöг : [кывбуръяс, сьыланкывъяс, висьтъяс, мойдъяс]. - 2009. - 222, [2] л. б. : серпас. - Пер. загл.: Первая кн. : [стихи, песни, рассказы, сказки].

Мöд небöг : [кывбуръяс, сьыланкывъяс, висьтъяс, мойдъяс]. - 2010. - 350, [2] л. б. : серпас. - Пер. загл.: Вторая кн. : [стихи, песни, рассказы, сказки].

Коймöд небöг : [кывбуръяс, висьтъяс да мойдъяс]. - 2010. - 334, [2] л. б. : серпас. - Пер. загл.: Третья кн. : [стихи, рассказы и сказки].

Коми челядьлы куим небöга антология лöсьöдіс Елена Козлова, коми гижысьяслöн котырöн веськöдлысь. Коми челядьлы куим небöга антологияысь Елена Васильевна Козловалы таво сетісны Коми Республикаса Правительстволысь премия да лауреат ним. Антологиясö дасьтыны отсалісны Зинаида Прошева, Зоя Остапова, Валентина Лимерова да мукöд. Небöгö пырисны коми гижысьяслöн медбур гижöдъясыс. «Коми челядьлы антология» медводдза небöгö пыртöма кывбуръяс, сьыланкывъяс, висьтъяс да мойдъяс медся посни челядьлы лыддьöм вылö, кодъясöс гижисны Вячеслав Бабин, Альберт Ванеев, Юрий Васютов, Сергей Куликов, Александр Лужиков да мукöд.

Антологиялöн мöд небöг кутö ас пытшкас кывбуръяс, сьыланкывъяс, висьтъяс да мойдъяс посни челядьлы лыддьöм вылö, кодъясöс гижисны Иван Белых, Михаил Лебедев, Егор Потапов, Зоя Шиликова, Николай Щукин да мукöд.

Коймöд (бöръя) небöгö пыртöма кывбуръяс, висьтъяс да мойдъяс челядьлы лыддьöм вылö Альбина Ануфриевалысь, Пётр Бушенёвлысь, Иван Коданёвлысь, Нина Куратовалысь, Василий Лодыгинлысь, Соломония Пылаевалысь да мукöд авторъяслысь.

Антология лоö колана небöгöн гортын да школаын лыддьöм вылö, а сідзжö позьö котыртны лыддьысьöмъяс посни челядьöс видзанінъясын.

Лöсьöдiс В.Н. Казаринова

Дата размещения: 17.05.2012